စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန၊ မိတ္ထီလာခရိုင်ဦးစီး မှူးရုံး၊ ခရိုင်ဦးစီးမှူး၏ လမ်းညွှန်မှုဖြင့် မိတ္ထီလာမြို့နယ်တာဝန်ခံ ဒေါ်စိမ်းစိမ်းထွေးနှင့်အဖွဲ့သည် (၁၉ . ၁၁ . ၂၀၂၅) ရက်နေ့၊ နံနက် (၁၁:၀၀) နာရီအချိန်တွင် ပြည်တွင်း MSMEs ကဏ္ဍလုပ်ငန်းများ ဖွံ့ဖြိုး တိုးတက်ရေးရည်ရွယ်၍ မိတ္ထီလာမြို့၊ မြင်းကန်အုပ်စု၊ ဆည်ကုန်း ကျေးရွာရှိ “အောင်ဟိန်းဝင်း” ပဲကြော်လုပ်ငန်းရှင်နှင့်တွေ့ဆုံကာ ထုတ်လုပ်မှုအဆင့်ဆင့်နှင့်ဈေးနှုန်း၊ ဈေးကွက်များအား ကွင်းဆင်း မေးမြန်းခဲ့ပါသည်။
ထိုသို့ကွင်းဆင်းမေးမြန်းရာတွင် ပဲကြော်လုပ်ငန်းရှင်မှ ယခုလက်ရှိအချိန်တွင် ပဲကြီးခြမ်းကြော် များ ရောင်းအားသွက်လျက်ရှိပါကြောင်း၊ ကျောက်ပန်းတောင်း၊ မကွေး၊ မှုံရွာမြို့များမှ ပဲကြီးများ ဝယ်ယူကြောင်း၊ ပဲကြီး တစ်ပိဿာ (၈၉၀၀) ကျပ်ဖြင့် ဝယ်ယူရကြောင်း၊ တစ်နေ့လျှင် ပျမ်းမျှပိဿာ အချိန် (၁၂၀) ပိဿာ ကြော်ရကြောင်း၊ မိသာစုလုပ်အားကိုသာ အဓိကထားလုပ်ကိုင်ကြပြီး၊ ပြင်ပ လုပ်သားအနည်းငယ်ဖြင့်သာ လုပ်ကိုင်လျက်ရှိပြီး ၊ မိသားစုစားဝတ်နေရေးအဆင်ပြေ၍ တွက်ချေကိုက်ကြောင်း သိရှိရပါသည်။
ပဲကြီးခြမ်းကြော်ကို လက်ဘက်နှင့်တွဲ၍ စားသုံးလေ့ရှိရာဒေသတွင်း စားသုံးမှုသာမက မိတ္ထီလာ မြို့၊ သာစည်၊ မလှိုင်မြို့များသို့ လက်လီလက်ကားရောင်းချရန်လည်းကောင်း၊ နယ်မှမိတ်ဆွေများ အတွက်ဒေသလက်ဆောင်အနေနှင့်ဝယ်ယူသူများကြောင့် ဝယ်လိုအားကောင်းကြောင်းသိရပါသည်။ ပဲကြီးခြမ်းကြော်ကိုဈေးကွက်၌ ဒေသအခေါ် ပဲဖူးကြော်ဟူ၍ခေါ်တွင်ကာ တစ်ပိဿာလျှင် (၁၄၀၀၀) ကျပ်ဈေးရှိကြောင်းသိရှိရပါသည်။
DOCA(မန္တလေး)