တောင်ငူမြို့မှ ဆီကုန်သည်များနှင့် တွေ့ဆုံဆွေးနွေး

       ပဲခူးတိုင်းဒေသကြီး၊ စားသုံးသူရေးရာဦးစီးဌာန၊ တောင်ငူခရိုင်ဦးစီးမှူး ဦးမျိုးအောင်သည် နိုဝင်ဘာလ ၉ ရက်နေ့ မွန်းလွဲပိုင်းက ခရိုင်ဦးစီးမှူးရုံး အစည်းအဝေးခန်းမ၌ တောင်ငူမြို့မှ ဆီကုန်သည်များနှင့် တွေ့ဆုံ၍ စားအုန်းဆီလက်လီလက်ကား ဝယ်ယူခွင့်ရရှိသည့် ကုန်သည်များအနေဖြင့် ရန်ကုန် အထိုင် ရည်ညွှန်းလက်ကားဈေးအပေါ် သယ်ယူပို့ဆောင်ခ ကုန်ကျစရိတ်များ ထပ်ပေါင်း၍ ၂ ရာခိုင်နှုန်း အမြတ်ထက်မပိုသောဈေးနှုန်းဖြင့် ရောင်းချနိုင်ရေး ဆက်လက်ကြိုးပမ်း ဆောင်ရွက်ကြရန်ကိုလည်းကောင်း၊ စီးပွားရေးလုပ်ငန်းများ လုပ်ဆောင်ရာတွင် စားသုံးသူကာကွယ်ရေးဥပဒေတွင် ပြဌာန်းထားသည့် ပြဌာန်းချက်များနှင့်အညီ ဆောင်ရွက်ကြရန်ကိုလည်းကောင်း ဆွေးနွေးခဲ့ပါသည်။

        ရှေးဦးစွာ ခရိုင်ဦးစီးမှူးက ပထမပိုင်းအနေဖြင့် တိုင်းဒေသကြီးဝန်ကြီးချုပ် တောင်ငူမြို့သို့ လာရောက်စဉ်က တက္ကသိုလ်၊ ကောလိပ်များမှ သင်ကြား/စီမံ ဝန်ထမ်းများအား လစဉ် သက်သာသော နှုန်းထားဖြင့် စားသုံးဆီများ ရောင်းချပေးနိုင်ရေးဆောင်ရွက်ရန် လမ်းညွှန်မှာကြားခဲ့ကြောင်း၊ ခရိုင်စီမံ အုပ်ချုပ်ရေး အဖွဲ့ဥက္ကဌကလည်း တိုင်းဒေသကြီးဝန်ကြီးချုပ် လမ်းညွှန်မှာကြားချက် နှင့်အညီ ဆောင်ရွက်နိုင်ရေး ညွှန်ကြားလာပါကြောင်း၊ သို့ဖြစ်ပါ၍ ယနေ့ဆီကုန်သည်များနှင့် တွေ့ဆုံ၍ တက္ကသိုလ်ကောလိပ်များမှ သင်ကြား/စီမံ ဝန်ထမ်းများအပါအဝင် တောင်ငူခရိုင်အတွင်းရှိ ဌာနဆိုင်ရာ ဝန်ထမ်းများနှင့် အခြေခံလူတန်းစားများအား စားသုံးဆီများကို သက်သာသော ဈေးနှုန်းဖြင့် ရောင်းချ နိုင်ရန်အတွက် ဆီကုန်သည်များအနေဖြင့် စားအုန်းဆီများအား ရည်ညွှန်းဈေးဖြင့် ဝယ်ယူနိုင်ရေး အတွက် ဆွေးနွေးကြရန်ပြောကြားပါသည်။

      ဆက်လက်၍ ဒုတိယပိုင်းအနေဖြင့် စီးပွားရေးလုပ်ငန်းများဆောင်ရွက်ရာတွင် စားသုံးသူကာကွယ်ရေးဥပဒေပါ ပြဌာန်းချက်များကို လိုက်နာဆောင်ရွက်ကြရန် လိုအပ်ပါကြောင်း၊ စားသုံးသူကာကွယ်ရေးဥပဒေ အခန်း ၁၈ ပါ ကုန်အညွှန်းအမှတ်အသား ဖော်ပြခြင်းဆိုင်ရာ ပြဌာန်းချက်နှင့် ပတ်သက်၍ လုပ်ငန်းရှင်များ လိုက်နာဆောင်ရွက်နိုင်ရန် မြန်မာနိုင်ငံစားသုံးသူကာကွယ်ရေး ကော်မရှင်က ညွှန်ကြားချက်အမှတ် ၂/၂၀၁၉ နှင့် စီးပွားရေးနှင့်ကူးသန်းရောင်းဝယ်ရေးဝန်ကြီးဌာန မှ ညွှန်ကြား ချက်အမှတ် ၁/၂၀၂၁ တို့ကို ထုတ်ပြန်ထားပြီး ဖြစ်သည်ကို လုပ်ငန်းရှင်များသိရှိပြီး ဖြစ်ပါကြောင်း၊ ညွှန်ကြားချက်များကို လုပ်ငန်းရှင်များထံ ဖြန့်ဝေထားပြီးဖြစ်ပါကြောင်း၊ ကုန်အညွှန်း အမှတ်အသား နှင့်ပတ်သက်၍ ထုတ်လုပ်သည့် လုပ်ငန်းရှင်များတွင်သာ တာဝန်ရှိသည်မဟုတ်ဘဲ ရောင်းချသည့် လုပ်ငန်းရှင်များတွင်လည်း တာဝန်ရှိပါသဖြင့် လုပ်ငန်းရှင်များအနေဖြင့် ဥပဒေပြဌာန်းချက်များနှင့်အညီ လိုက်နာဆောင်ရွက်ကြရန် ယခုလို တွေ့ဆုံခွင့်ရတုန်း ထပ်မံအသိပေးပြောကြားလိုပါကြောင်းဖြင့် ပြောကြားပါသည်။

      ဆက်လက်၍ တက်ရောက်လာသည့် လုပ်ငန်းရှင်များက ရည်ညွှန်းဈေးဖြင့် စားသုံးဆီများ ဝယ်ယူရရှိနိုင်ရေး ဆောင်ရွက်ချက်များကိုလည်းကောင်း၊ စားသုံးသူကာကွယ်ရေးဥပဒေပါ ကုန်အညွှန်း အမှတ်အသား ဖော်ပြခြင်းဆိုင်ရာ ပြဌာန်းချက်များ၊ ညွှန်ကြားချက်များနှင့် ပတ်သက်၍ လည်းကောင်း တင်ပြဆွေးနွေးကြရာ ခရိုင်ဦးစီးမှူးက ဖြည့်စွက်ဆွေးနွေးခဲ့ကြောင်းနှင့် ဆွေးနွေးပွဲသို့ တောင်ငူမြို့မှ ဆီလုပ်ငန်းရှင် ၈ ဦး တက်ရောက်ကြောင်း သိရှိရပါသည်။

DOCA(ပဲခူး)