တောင်ကိုရီးယားနိုင်ငံ၏ ပြည်တွင်းဖြစ် Semiconductors များ ဝယ်လိုအား မြင့်တက်နေခြင်းကြောင့် ဖေဖော်ဝါရီလအတွက် ပို့ကုန်တင်ပို့မှုမှာ စံချိန်တင် အမြင့်ဆုံးသို့ရောက်ရှိသွားကြောင်း မတ်လ ၁ ရက်နေ့တွင် ထုတ်ပြန်သည့် အစိုးရကိန်းဂဏန်းများအရ သိရသည်။
စီးပွားရေးစနစ်၏ ထက်ဝက်ခန့်ရှိသော ပို့ကုန်ကဏ္ဍသည် ဖေဖော်ဝါရီလတွင် ၂၉ ရာခိုင်နှုန်း အထိ ခုန်တက်သွားပြီး အမေရိကန်ဒေါ်လာ ၆၇.၄၅ ဘီလီယံအထိ ရှိခဲ့သည်။ ၎င်းမှာ ယခင် ဖေဖော်ဝါရီလများတွင် တင်ပို့ခဲ့သည့် စံချိန်အားလုံးထက် ကျော်လွန်သွားခြင်းဖြစ်ကြောင်း ကုန်သွယ်ရေး၊ စက်မှုနှင့် အရင်းအမြစ်ဝန်ကြီးဌာနက ဆိုသည်။
တစ်ရက်လျှင် ပျမ်းမျှ ပို့ကုန်တင်ပို့မှုမှာလည်း ၄၉.၃ ရာခိုင်နှုန်း မြင့်တက်လာပြီး ၃.၅၅ ဘီလီယံဒေါ်လာအထိ ရှိခဲ့ရာ ပထမဆုံးအကြိမ်အဖြစ် ၃ ဘီလီယံဒေါ်လာအထက်သို့ ရောက်ရှိခဲ့သည်။ သွင်းကုန်တင်သွင်းမှုမှာ ၂၀၂၅ ခုနှစ်၊ ဖေဖော်ဝါရီလနှင့် နှိုင်းယှဉ်ပါက ၇.၅ ရာခိုင်နှုန်း တိုးတက်လာပြီး ၅၁.၉၄ ဘီလီယံဒေါ်လာ ရှိခဲ့ရာ ကုန်သွယ်မှုပိုငွေမှာ ၁၅.၅၁ ဘီလီယံဒေါ်လာအထိ ရရှိခဲ့သည်။
တရုတ်နှစ်သစ်ကူး ရုံးပိတ်ရက်များကြောင့် အလုပ်လုပ်ရက် နည်းပါးခဲ့သော်လည်း နိုင်ငံ၏ အဓိက ပို့ကုန် ၁၅ မျိုးအနက် ထုတ်ကုန် ၅ မျိုးမှာ ပြည်ပတင်ပို့မှု တိုးတက်ခဲ့သည်။ Chip တင်ပို့မှုမှာ ၁၆၀.၈ ရာခိုင်နှုန်းအထိ သိသိသာသာ မြင့်တက်ခဲ့ပြီး တစ်လအတွင်း အမြင့်ဆုံးစံချိန်အသစ်ဖြစ်သည့် ၂၅.၁၆ ဘီလီယံဒေါ်လာသို့ ရောက်ရှိခဲ့ကာ ၃ လဆက်တိုက် ဒေါ်လာ ၂၀ ဘီလီယံအထက် တင်ပို့နိုင်ခဲ့သည်။
အဆိုပါ စံချိန်တင် Chip တင်ပို့နိုင်မှုမှာ ဉာဏ်ရည်တု (AI) နည်းပညာတွင် ရင်းနှီးမြှုပ်နှံမှုများ တိုးချဲ့လာခြင်းကြောင့် ဝယ်လိုအား အလွန်အမင်း မြင့်တက်လာခြင်းနှင့် Memory Chip ဈေးနှုန်းများ ခုန်တက်သွားခြင်းတို့ကြောင့်ဖြစ်သည်။ အမေရိကန်နိုင်ငံ၏ အခွန်စည်းကြပ်မှုဆိုင်ရာ ဆိုးကျိုး သက်ရောက်မှုများရှိနေသော်လည်း Chip ဝယ်လိုအား အလွန်မြင့်မားမှုကြောင့် အမေရိကန်သို့ တင်ပို့မှုမှာ ၂၉.၉ ရာခိုင်နှုန်း မြင့်တက်ခဲ့ပြီး ၁၂.၈၅ ဘီလီယံဒေါ်လာရှိခဲ့သည်။
အလားတူ အရှေ့တောင်အာရှနိုင်ငံများအသင်း (ASEAN) သို့ တင်ပို့မှုမှာ ၃၀.၄ ရာခိုင်နှုန်း တိုးတက်ပြီး ၁၂.၄၇ ဘီလီယံဒေါ်လာရှိကာ၊ ဥရောပသမဂ္ဂ (EU) သို့ တင်ပို့မှုမှာ ၁၀.၃ ရာခိုင်နှုန်း တိုးတက်ပြီး ၅.၆၀ ဘီလီယံဒေါ်လာ အသီးသီးရှိခဲ့ကြောင်း သိရှိရပါသည်။
Source : Xinhua
DOCA (ရန်ကုန်)