အိန္ဒိယနိုင်ငံတွင် ကြံစိုက်ပျိုးထွက်ရှိမှုလျော့ကျပြီး သကြားစက်ရုံများ၏ ကြံကြိတ်ဝါးလည် ပတ်မှု ပုံထက်ဆောလျင်စွာ ပိတ်သိမ်းခဲ့ကြရာ သကြားထုတ်လုပ်မှုမှာ စားသုံးမှုပမာဏအောက် ဒုတိယမြောက်နှစ်အဖြစ် ဆက်လက်ကျဆင်းဖွယ်ရှိသည်ဟု ကုန်သွယ်ရေးနယ်ပယ်မှ တာဝန်ရှိသူ များက ရိုက်တာသတင်းဌာနသို့ ဧပြီ ၂ ရက်နေ့၌ ပြောကြားခဲ့သည်။
ပြည်ပသို့တင်ပို့မှု တိုးတက်လျက်ရှိခြင်းနှင့်အတူ ထုတ်လုပ်မှုကျဆင်းခြင်းက ပြည်တွင်း သကြားလက်ကျန်ပမာဏကို လျော့ကျစေဖွယ်ရှိပြီး ရောင်းလိုအားပိုလျှံမှုများကြောင့် ဖိအားများ အောက်တွင်ရှိနေခဲ့သည့် ပြည်တွင်း သကြားဈေးနှုန်းများကို အထောက်အပံ့ပြုမည်ဖြစ်သည်။ မွန်ဘိုင်းမြို့အခြေစိုက် အိန္ဒိယထိပ်တန်းကုန်သည်တစ်ဦးက ယခုကြိတ်ခွဲရောင်းဝယ်ရေးရာသီနှစ် ၌ သကြားထုတ်လုပ်မှုသည် တန်ချိန် ၂၈ သန်းကို ကျော်လွန်ဖွယ်မရှိကြောင်း၊ သကြားစက်ရုံ အများစုသည် လုပ်ငန်းပိတ်သိမ်းခဲ့ကြပြီဖြစ်ကြောင်း၊ စက်ရုံအနည်းငယ်ကသာ ဆက်လက်ကြိတ် ခွဲမှုရှိပြီး ၎င်းတို့သည်လည်း ရှေ့လာမည့်သီတင်းပတ်များအတွင်း ပိတ်သိမ်းကြမည်ဟု ခန့်မှန်းရ ကြောင်း ပြောဆိုခဲ့သည်။
အိန္ဒိယနိုင်ငံ၏ သကြားထုတ်လုပ်မှုသည် တန်ချိန် ၂၈.၅ သန်းမှ ၂၉ သန်းအတွင်းရှိသော ပြည်တွင်းဈေးကွက်ဝယ်လိုအားထက် ပိုမိုလျက် တန်ချိန် ၃၁ သန်းခန့် ထွက်ရှိမည်ဟု အိန္ဒိယ သကြားနှင့်ဇီဝစွမ်းအင် ထုတ်လုပ်သူများအသင်း (ISMA) နှင့် အမျိုးသားသကြားစက်ရုံလုပ်ငန်းများ သမဝါယမအသင်းချုပ် (NFCSF) တို့ အပါအဝင် သကြားလုပ်ငန်းနယ်ပယ်မှ အဖွဲ့အစည်းများက ကြံကြိတ်ဝါးမှုရာသီ အစပိုင်း၌ ခန့်မှန်းထားခဲ့ကြသည်။ သို့သော် မိုးအလွန်အကျွံ ရွာသွန်းမှုကြောင့် ကြံအထွက်လျော့နည်းခဲ့ပြီး ယခုနှစ်တွင် စက်လည်ပတ်လုပ်ကိုင်ခဲ့သည့် သကြားစက်ရုံ ၅၄၁ ရုံ အနက် ၄၆၇ ရုံသည် မတ်လကုန်ပိုင်း၌ပင် လုပ်ငန်းရပ်နားခဲ့ကြကြောင်း၊ ယခင်နှစ်ကာလတူတွင် လုပ်ငန်းရပ်နားခဲ့သည့် စက်ရုံပေါင်းမှာ ၄၂၀ သာ ရှိခဲ့ကြောင်း NFCSF ၏ အချက်အလက်များအရ သိရသည်။
အိန္ဒိယသကြားစက်ရုံများသည် ယခုနှစ်စက်တင်ဘာလ၌ ကုန်ဆုံးမည့် ၂၀၂၅-၂၆ ဈေးကွက် ရာသီနှစ်၏ ပထမနှစ်ဝက်အတွင်း သကြားတန်ချိန် ၂၇.၁၂ သန်းထုတ်လုပ်ခဲ့ရာ ယခင်နှစ်ကာလတူ ထက် ၉ ရာခိုင်နှုန်း ပိုမိုခဲ့သည်ဟု NFCSF က ဖော်ပြထားသည်။
အိန္ဒိယနိုင်ငံတွင် သကြားထုတ်လုပ်မှု အများဆုံးဖြစ်သော မဟာရဋ္ဌပြည်နယ်နှင့် တတိယ အများဆုံးဖြစ်သည့် ကာနာတကာပြည်နယ်တို့ရှိ သကြားစက်များ အားလုံးနီးပါးသည် ခန့်မှန်းထား သည်ထက်စော၍ လုပ်ငန်းပိတ်သိမ်းကြဖွယ်ရှိကြောင်း၊ အစိုးရသည် ပြည်တွင်း၌ ပိုလျှံမှုကြီးမား မည်ဟု တွက်ဆလျက် ပြည်ပသို့ သကြားတင်ပို့ခွင့်ပြုခဲ့ကြောင်း၊ သို့သော် ယခုအခါ ထုတ်လုပ်မှု ပမာဏသည် ပြည်တွင်းစားသုံးရန် လိုအပ်ချက်ကိုပင် ပြည့်မီနိုင်လိမ့်မည် မဟုတ်သည်မှာ သေချာ နေပြီဖြစ်ကြောင်းဖြင့် နယူးဒေလီမြို့ အခြေစိုက် နိုင်ငံတကာနှင့်ကုန်သွယ်လုပ်ကိုင်လျက်ရှိသော ကုန်သည်တစ်ဦးကလည်း ပြောဆိုခဲ့သည်။
အစိုးရသည် ပြည်ပသို့ သကြားတင်ပို့ခွင့်ခွဲတမ်းကို တန်ချိန် ၁.၅ သန်းခွင့်ပြုထားရာမှ ပြီးခဲ့သည့် ဖေဖော်ဝါရီလ၌ တန်ချိန် ၅၀၀၀၀၀ ထပ်မံတိုးမြှင့်လျက် စုစုပေါင်း တန်ချိန် ၂ သန်း အထိ ခွင့်ပြုခဲ့ခြင်းဖြစ်သည်။
သကြားလုပ်ငန်းနယ်ပယ်တွင် ယခင်နှစ်၌ ထုတ်လုပ်မှုကျဆင်းခဲ့ပြီးနောက် ယခုနှစ်ရာသီ တွင် ကုန်လက်ကျန် တိုးတက်လျက် တင်ပို့ရန်ပိုလျှံမှုရှိမည်ဟု တွက်ဆခဲ့ကြကြောင်း၊ သို့သော် အထွက်နည်းပါးမှုသည် နောက်လာမည့် ရာသီကာလအတွက် စာရင်းဖွင့်လက်ကျန် ပမာဏကို လျော့နည်းစေမည်ဖြစ်ကြောင်း၊ ယခုဈေးကွက်ရာသီနှစ်၌ စာရင်းဖွင့်လက်ကျန် တန်ချိန် ၅ သန်း ရှိခဲ့သော်လည်း နောက်လာမည့်ရာသီတွင်မူ တန်ချိန် ၄ သန်းအောက် လျော့နည်းမည်ဖြစ်ကြောင်း၊ ဤအခြေအနေက သကြားဈေးနှုန်းများကို ခိုင်မာစေမည်ဖြစ်ကြောင်းဖြင့် အမည်ဖော်ပြလိုခြင်း မရှိ သော အစိုးရအရာရှိတစ်ဦးက ပြောကြားခဲ့သည်။
Source: Economic Times, 2 April 2026(လယ်ယာထွက်ကုန်များနှင့် အဓိကသွင်းကုန်များ၏ နိုင်ငံတကာဈေးကွက်စောင့်ကြည့်လေ့လာရေးအဖွဲ့)