မန္တလေးတိုင်းဒေသကြီး၊ မြင်းခြံခရိုင်၊ မြင်းခြံမြို့ရှိ စားသုံးသူရေးရာဦးစီးဌာန၊ ခရိုင်ဦးစီးမှူးရုံး တွင် (၂၅.၄.၂၀၂၆)ရက်နေ့၊ နေ့လယ် ၁၆:၀၀ နာရီအချိန်တွင် ခရိုင်ဦးစီးမှူး ဦးသန်းစိုးသည် မြို့နယ် အတွင်းရှိ ကုန်စည်ထုတ်လုပ်ဖြန့်ဖြူးရောင်းချသော စီးပွားရေးလုပ်ငန်းရှင်များနှင့်တွေ့ဆုံ၍ ကုန်ဈေး နှုန်းတည်ငြိမ်စေရေး၊ စက်မှုလုပ်ငန်းသုံးစားအုန်းဆီများ အမှန်တကယ်အသုံးပြုမှုရှိစေရေးနှင့် ကုန်အညွှန်းအမှတ်အသားများ အကြောင်းအား အသိပညာပေးဟောပြော ဆွေးနွေးခဲ့ပါသည်။
နိုင်ငံတော်မှ လုပ်ငန်းခွင်များသို့ သက်သာသောဈေးနှုန်းဖြင့် ရောင်းချပေးလျက်ရှိသော စက်မှုလုပ်ငန်းသုံးစားအုန်းဆီများကို မိမိတို့၏လုပ်ငန်းခွင်များ၌သာ မှန်မှန်ကန်ကန်သုံးစွဲကြရန်နှင့် လုပ်ငန်းခွင်တွင်အမှန်ကုန်ကျသည့် ပမာဏများသာ လျှောက်ထားကြရန်နှင့်လျှောက်ထားလာသော လုပ်ငန်းနှင့်အရေအတွက်များ မှန်ကန်ကိုက်ညီမှုရှိ/မရှိကိုလည်း မိမိတို့ဌာနမှ ကွင်းဆင်းစိစစ်မှုများကို ဆောင်ရွက်လျက်ရှိပါကြောင်း၊ ဈေးကစားရန်ရည်ရွယ်ချက်ဖြင့် စားအုန်းဆီများသိုလှောင်ထားရှိခြင်း များကိုလည်း မပြလုပ်ကြရန်လိုအပ်ပါကြောင်း၊ ဆက်လက်၍ကုန်အညွှန်းအမှတ်အသားဖော်ပြခြင်းနှင့် စပ်လျဉ်းသည့် အကြောင်းအရာများနှင့် ပတ်သက်၍ လုပ်ငန်းရှင်များအနေဖြင့် လုံခြုံစိတ်ချရမှုရှိသော ကုန်စည်နှင့်ဝန်ဆောင်မှုများကို ဥပဒေများနှင့်အညီ ထုတ်လုပ်ကြရန်၊ မိမိတို့ထုတ်လုပ်ရောင်းဝယ်သော ကုန်စည်များတွင်သာ လုပ်ငန်းရှင်ဖြစ်ပြီး မိမိတို့သည်ပင် အခြားကုန်စည်များကို ဝယ်ယူသုံးစွဲ စားသောက်နေရသည့်အတွက် စားသုံးသူများလည်းဖြစ်၍ ကုန်စည်များကိုရွေးချယ်ဝယ်ယူသုံးစွဲ နိုင်စေရေးနှင့် မိမိထုတ်လုပ်သောကုန်စည်ကိုလည်း စားသုံးသူများအတွက် ကိုယ်ချင်းစာစိတ်ဖြင့် ဥပဒေများနှင့်အညီဆောင်ရွက်ကြရန် စသည်ဖြင့် ရှင်းလင်းဟောပြောဆွေးနွေးခဲ့ပါသည်။ ဟောပြော ပွဲသို့ တက်ရောက်လာသော လုပ်ငန်းရှင်များမှ ဟောပြောဆွေးနွေးမှုများနှင့်ပတ်သက်၍ သိရှိ လိုသည်များအား ဖြည့်စွက်မေးမြန်းဆွေးနွေးရာ ခရိုင်တာဝန်ခံမှ ပြန်လည်ရှင်းလင်းဆွေးနွေးခဲ့ကြောင်း နှင့် လုပ်ငန်းရှင်စုစုပေါင်း(၄၄)ဦးတက်ရောက်ခဲ့ ကြောင်းသိရသည်။
DOCA(မန္တလေး)