ဥရောပသမဂ္ဂနှင့် ကုန်သွယ်ရေးဆွေးနွေးမှုများ အရှိန်မြှင့်တင်ရန်ထိုင်းဝန်ကြီးချုပ်ညွှန်ကြား

         ထိုင်းဝန်ကြီးချုပ် Anutin Charnvirakul က ဥရောပတစ်ဝန်းရှိ ထိုင်းသံအမတ်များနှင့် ကောင်စစ်ဝန်ချုပ်များအား ဥရောပသမဂ္ဂနှင့် ထိုင်းနိုင်ငံအကြား လွတ်လပ်သောကုန်သွယ်ရေး သဘောတူညီချက် (FTA) ဆွေးနွေးညှိနှိုင်းမှုများကို အရှိန်မြှင့်တင်ဆောင်ရွက်ရန် ညွှန်ကြားခဲ့ ကြောင်း သိရပါသည်။ ထို့ပြင် သံတမန်များအား “Diplomacy 2.0” ဟု ခေါ်သည့် ပိုမိုတက်ကြွပြီး လက်တွေ့ကျသော နိုင်ငံခြားရေးမူဝါဒကို အကောင်အထည်ဖော်ကာ ကုန်သွယ်ရေး၊ ရင်းနှီးမြှုပ်နှံမှုနှင့် ထိုင်းနိုင်ငံ၏ နိုင်ငံတကာအဆင့်အတန်းမြှင့်တင်ရေးကို အားပေးဆောင်ရွက်ရန်လည်း တာဝန်ပေးအပ်ခဲ့ကြောင်း သိရပါသည်။ တရားဝင်ခရီးစဉ်အဖြစ် ပြင်သစ်နိုင်ငံသို့ ရောက်ရှိနေသော ဝန်ကြီးချုပ် Anutin က မေလ ၃၁ ရက်နေ့တွင် ပဲရစ်မြို့၌ ဥရောပဒေသတွင် တာဝန်ထမ်းဆောင်နေသည့် ထိုင်းသံအမတ်များနှင့် ကောင်စစ်ဝန်ချုပ်များ အစည်းအဝေး၌ မိန့်ခွန်း ပြောကြားရာတွင် လက်ရှိကမ္ဘာ့ပထဝီနိုင်ငံရေးအပြောင်းအလဲများကြား ထိုင်းနိုင်ငံကိုကမ္ဘာ့ ဆွဲဆောင်မှုအကောင်းဆုံး ရင်းနှီးမြှုပ်နှံမှုနေရာများထဲမှတစ်ခုအဖြစ် ရပ်တည်နိုင်ရန်လိုအပ်ကြောင်း ပြောကြားခဲ့ပါသည်။ ထိုင်းနှင့် အီးယူတို့သည် FTA ဆွေးနွေးပွဲ ကိုးကြိမ်မြောက်အဆင့်ကို ဇွန်လအတွင်း ဘရပ်ဆဲလ်မြို့၌ ကျင်းပရန်စီစဉ်ထားကြောင်း သိရပါသည်။ ထိုင်းအစိုးရက ဆွေးနွေးမှုများကို အမြန်ဆုံးအပြီးသတ်နိုင်ရန်ရည်မှန်းထားပြီး အီးယူနှင့် FTA လက်မှတ်ရေးထိုး ပြီးဖြစ်သော ဗီယက်နမ်နှင့် မလေးရှားကဲ့သို့ နိုင်ငံများနှင့် ယှဉ်ပြိုင်နိုင်စွမ်း မလျော့ကျစေရန် ကြိုးပမ်းနေကြောင်း သိရပါသည်။ ဝန်ကြီးချုပ် Anutin က ဥရောပကို ကုန်သွယ်ဖက်တစ်ဦးအဖြစ်သာ မမြင်သင့်တော့ဘဲ လျင်မြန်စွာပြောင်းလဲနေသော ကမ္ဘာ့ပတ်ဝန်းကျင်၏ အစိတ်အပိုင်းတစ်ရပ်အဖြစ် ရှုမြင်သင့်ကြောင်း၊ ထိုင်းနိုင်ငံသည် ASEAN ၏ အလယ်ဗဟိုတွင် တည်ရှိသည့် မဟာဗျူဟာအရ အရေးပါသော နေရာအားသာချက်ကို အသုံးချနိုင်ကြောင်း ပြောကြားခဲ့ပါသည်။ “အင်အားကြီးနိုင်ငံများအကြား တင်းမာမှုများ ရှိနေသော်လည်း အာဆီယံဒေသသည် တည်ငြိမ်ပြီး ခိုင်မာနေဆဲဖြစ်ကာ ဒေသဖွံ့ဖြိုးတိုးတက်မှုကို ထောက်ပံ့ပေးနိုင်သည့် လူဦးရေအင်အားလည်း ရှိနေသည်” ဟု ၎င်းက ပြောကြားခဲ့ပါသည်။ ဝန်ကြီးချုပ် Anutin က “Diplomacy 2.0” သည် ကမ္ဘာလုံးဆိုင်ရာပဋိပက္ခများကြား မျှတမှုကိုထိန်းသိမ်းထားနိုင်ရန်နှင့် လက်တွေ့ကျသောရလဒ်များ ဖော်ဆောင်နိုင်ရန်ရည်ရွယ်သည့် တက်ကြွသောသံတမန်ရေးမူဝါဒဖြစ်ပြီး လုံခြုံရေး၊ စီးပွားရေးပူးပေါင်းဆောင်ရွက်မှု၊ လူမှုရေးနှင့် ပတ်ဝန်းကျင်ဆိုင်ရာကိစ္စရပ်များ၊ လူသားချင်းစာနာ ထောက်ထားမှုဆိုင်ရာ လုပ်ငန်းများဟူသော မဏ္ဍိုင်လေးရပ်ကို အခြေခံထားကြောင်းနှင့် လက်ရှိ ထိုင်းနိုင်ငံ၏ နိုင်ငံရေးတည်ငြိမ်မှုသည် နိုင်ငံခြားရင်းနှီးမြှုပ်နှံသူများအတွက် ယုံကြည်စိတ်ချရသော အခြေအနေတစ်ရပ်ဖြစ်ကြောင်း အလေးပေးပြောကြားခဲ့သည်ဟု သိရှိရပါသည်။

Bangkok Post                                                                           

DOCA (ရန်ကုန်)