ပင်လယ်စာတင်သွင်းမှု ပိတ်ပင်ခြင်းနှင့် ပတ်သက်၍ နှစ်နိုင်ငံကြား အငြင်းပွားမှုများ ဆက်လက်ဖြစ်ပွားနေစဉ်၊ သန့်ရှင်းရေးနှင့် ပိုးမွှားကင်းစင်ရေးဆိုင်ရာ စိုးရိမ်ပူပန်မှုများအပေါ် ထိုင်းနိုင်ငံ၏ တုံ့ပြန်ချက်ကို မလေးရှားနိုင်ငံက စောင့်ဆိုင်းနေဆဲဖြစ်ကြောင်း သိရပါသည်။ မလေးရှား ငါးလုပ်ငန်းဦးစီးဌာန ညွှန်ကြားရေးမှူးချုပ် Adnan Hussain က ဇွန်လ ၈ ရက်နေ့တွင် ပိတ်ပင်ကန့်သတ်မှုကို ပြန်လည်ရုပ်သိမ်းရန် ဆုံးဖြတ်ခြင်းမပြုမီ ကြိုတင်သတ်မှတ်ထားသော စည်းကမ်းချက်တစ်ခုဖြစ်သည့် ထိုင်းနိုင်ငံမှ တင်သွင်းသော ပုစွန်များ၏ ဘေးအန္တရာယ်ကင်းရှင်းရေးဆိုင်ရာ စိုးရိမ်ပူပန်မှုများနှင့် ပတ်သက်၍ ထိုင်းနိုင်ငံထံမှ မည်သည့်အဖြေမျှ မရရှိသေးကြောင်း ပြောကြားခဲ့ကြောင်း သိရသည်။
၎င်း၏ ပြောကြားချက်သည် ထိုင်းနိုင်ငံ စိုက်ပျိုးရေးနှင့် သမဝါယမဝန်ကြီး Suriya Juangroongruangkit ပြောကြားခဲ့သည့်အချက်များနှင့် ကွဲလွဲနေကြောင်း သိရပါသည်။ ဇွန်လ ၅ ရက်နေ့တွင် ထိုင်းငါးလုပ်ငန်းဦးစီးဌာနအနေဖြင့် ပြည့်စုံသော ရှင်းလင်းချက်ကို ပေးပို့ထားပြီးဖြစ်ကြောင်းနှင့် မလေးရှားဘက်မှလည်း အပြုသဘောဆောင်သည့် တုံ့ပြန်မှုကို ရရှိထားပြီးဖြစ်ကြောင်း မစ္စတာ Suriya က ပြောကြားခဲ့ပါသည်။
ထိုင်းနိုင်ငံဘက်က ဓာတုကြွင်းကျန်ပစ္စည်း ညစ်ညမ်းမှုကို တွေ့ရှိရသည်ဟုဆိုကာ ကက်ကတစ်ငါး (seabass) များအပေါ် တင်းကျပ်စွာ စစ်ဆေးမှုများ ပြုလုပ်ခဲ့ခြင်းကို မလေးရှားက တုံ့ပြန်သည့်အနေဖြင့် ဇွန်လ ၁ ရက်နေ့မှစတင်ကာ ထိုင်းနိုင်ငံမှ ပုစွန်မျိုးစိတ် ၅ မျိုး တင်သွင်းမှုကို ပိတ်ပင်ခဲ့ခြင်းဖြစ်ကြောင်း သိရပါသည်။
မလေးရှားနိုင်ငံမှ ကက်ကတစ်ငါး တင်ပို့သူများကလည်း ဆုန်ခလာ (Songkhla) ပြည်နယ်ရှိ စဒေါင် (Sadao) နယ်စပ်စစ်ဆေးရေးဂိတ်တွင် စစ်ဆေးမှုများ ပြုလုပ်ရာ၌ ကုန်ပစ္စည်း ရှင်းလင်းရေးအတွက် တစ်ရက်မှ နှစ်ရက်အထိ ကြာမြင့်နိုင်သဖြင့် ကုန်ပစ္စည်း၏ လတ်ဆတ်မှုကို ထိခိုက်စေသည်ဟု တိုင်ကြားထားကြကြောင်း သိရပါသည်။
ထိုင်းနိုင်ငံအစိုးရ၏ အချက်အလက်များအရ ထိုင်းနိုင်ငံသည် မလေးရှားနိုင်ငံသို့ လစဉ် ပုစွန်တန်ချိန် ၄၀၀ ခန့် (တန်ဖိုးအားဖြင့် ဘတ် ၄၄ သန်းခန့်) တင်ပို့လျက်ရှိကြောင်း သိရပါသည်။ အကယ်၍ ယခုအငြင်းပွားမှုသည် ရေရှည်ဆွဲနေမည်ဆိုပါက ထိခိုက်နစ်နာမှုမှာ ဘတ် ၂ ဘီလီယံကျော်အထိ ရှိလာနိုင်ကြောင်း ပုစွန်လုပ်ငန်းရှင်များအသင်းက ခန့်မှန်းထားပါသည်။
ထိုင်းနိုင်ငံအစိုးရပြောရေးဆိုခွင့်ရှိသူ Rachada Dhanadirek က ဇွန်လ ၇ ရက်နေ့တွင် နှစ်နိုင်ငံစလုံး အနေဖြင့် ယခုပုစွန်အငြင်းပွားမှုကို အမြန်ဆုံးဖြေရှင်းရန် ကြိုးပမ်းသွားမည် ဖြစ်ကြောင်း ပြောကြားခဲ့ပါသည်။ သို့သော်လည်း ပုစွန်မွေးမြူရေးတောင်သူများကို ကာကွယ်ရန် အတွက် ယခုကိစ္စကို ကမ္ဘာ့ကုန်သွယ်ရေးအဖွဲ့ (WTO) နှင့် အရှေ့တောင်အာရှနိုင်ငံများအသင်း (ASEAN) တို့တွင် ဆွေးနွေးညှိနှိုင်းမှုများ ပြုလုပ်ရန် ထိုင်းနိုင်ငံဘက်က စဉ်းစားနေကြောင်းလည်း ၎င်းက ဆက်လက်ပြောကြားခဲ့ကြောင်း သိရပါသည်။
ထို့အပြင် ဒုတိယအစိုးရပြောရေးဆိုခွင့်ရှိသူ Rachada Dhanadirek က ထိုင်းပုစွန်များအတွက် အစားထိုးဈေးကွက်များ ရှာဖွေနိုင်ရန် အစိုးရက ကြိုးပမ်းအားထုတ်မှုများကို အရှိန်မြှင့်လုပ်ဆောင်နေကြောင်း၊ ယင်းမှာ မွေးမြူရေးခြံထွက်ဈေးနှုန်းများကျဆင်းမှုကို တားဆီးရန်နှင့် တောင်သူများအပေါ် သက်ရောက်မည့် ဒဏ်ကိုလျှော့ချရန် အာဏာပိုင်များက ကြိုးပမ်းနေခြင်းဖြစ်သည်ဟု ပြောကြားခဲ့ကြောင်း သိရှိရပါသည်။
Source: Bangkok Post
DOCA (ရန်ကုန်)