(၄၈)နှစ်မြောက် ရခိုင်ပြည်နယ်နေ့ကို ဂုဏ်ပြုသောအားဖြင့် ရခိုင်ပြည်နယ် MSME ထုတ်ကုန်ပြပွဲနှင့်ရောင်းချပွဲ အခမ်းအနားကို ဒီဇင်ဘာလ (၁၄) ရက် နေ့မှ (၁၈) ရက်နေ့ထိ ရခိုင်ပြည်နယ် ၊ စစ်တွေမြို့ ခိုင်သဇင်ပန်းခြံ မြို့တော်ခန်းမ၌ (၅)ရက်တိုင်တိုင် ကျင်းပပြုလုပ်ခဲ့ပါသည်။ အခမ်းအနားဖွင့်ပွဲသို့ ရခိုင်ပြည်နယ် အစိုးရအဖွဲ့ ပြည်နယ်ဝန်ကြီးချုပ် ဒေါက်တာအောင်ကျော်မင်းနှင့် ပြည်နယ်ဝန်ကြီးများ၊ ပြည်နယ်အဆင့်ဌာနဆိုင်ရာများ၊ ခရိုင်အဆင့်ဌာနဆိုင်ရာများ၊ မြို့နယ်အဆင့် ဌာနဆိုင်ရာများ၊ ရပ်မိရပ်ဖများ၊ ရခိုင်ပြည်နယ်ကုန်သည်များနှင့် စက်မှုလက်မှုလုပ်ငန်းရှင်များအသင်း၊ ရခိုင်ပြည်နယ် ဆန်စပါးကုန်သည်များအသင်း၊ ရခိုင်ပြည်နယ်ဆီစက်ပိုင်ရှင်များအသင်း၊ ဒေသထုတ်ကုန်ထုတ်လုပ်သည့် စီးပွားရေးလုပ်ငန်းရှင်များ၊ တာဝန်ရှိသူများ၊ ဝန်ထမ်းများနှင့် ပြည်သူ လူထုများ တက်ရောက်ကာ အခမ်းအနားကို ပြည်နယ်ဝန်ကြီးချုပ်နှင့် လုံခြုံရေးနှင့်နယ်စပ်ရေးရာ ဝန်ကြီး၊ စီးပွားရေးရာဝန်ကြီး၊ သယံဇာတရေးရာဝန်ကြီးနှင့် ပြည်နယ်စည်ပင်သာယာရေးအဖွဲ့ ပြည်နယ်ဦးစီးမှူးတို့မှ ဖဲကြိုးဖြတ် ဖွင့်လှစ်ခဲ့ပြီး ပြည်နယ်ဝန်ကြီးချုပ်နှင့် ပြည်နယ်ဝန်ကြီးများ၊ ဌာနဆိုင်ရာမှတာဝန်ရှိသူများနှင့် အသင်းအဖွဲ့မှတာဝန်ရှိသူများက MSME ထုတ်ကုန်ပြခန်း အရောင်းခန်း(၅၁)ခန်းအား လှည့်လည် ကြည့်ရှု အားပေးခဲ့ပါသည်။ ၎င်းထုတ်ကုန်ပြပွဲနှင့် ရောင်းချ ပွဲတွင် ရခိုင်ပြည်နယ် မြို့နယ်များမှ MSME ဒေသထုတ်ကုန်များဖြစ်သည့် ပေါ်ဆန်မွှေးဆန် (အရည်အသွေးအမျိုးမျိုး)၊ ဒေသထွက်ဆန်အမျိုးမျိုး၊ မြေပဲဆီနှင့် စားသုံးဆီအမျိုးမျိုး၊ ဆားချော/ ဆားကြမ်း၊ ငရုတ်မုန့်၊ ငရုတ်ဆီ၊ ငါးပိ၊ ငါးခြောက်၊ ရွှေပုဇွန်ခြောက်၊ ငါးမုန့်(ပါပရာ)၊ ဟင်းမွှေးမဆလာ၊ ဆပ်ပြာအဆီ၊ ဆပ်ပြာအရည်၊ ဂဏန်းပျော့၊ ကိတ်မုန့်/ပေါင်မုန့်မျိုးစုံ၊ သဘာဝဓါတ်မြေဩဇာ၊ စပါးခွံမီးသွေးထောင့်၊ ဆေးဖက်ဝင်ဓနိဖူးခြောက် (လက်ဖက်ခြောက်)၊ ဓနိမှထုတ်လုပ်သော ဓနိဝိုင်အရက် ၊ ရခိုင်ပန်းဖော်လုံချည်နှင့် ဘင်္ဂလားဒေရှ့် နိုင်ငံသို့တင်ပို့သည့် ပို့ကုန်ကုန်စည်များအား ပြသရောင်းချခဲ့ကြောင်း သိရှိရပါသည်။
စားသုံးသူရေးရာဦးစီးဌာန ၊ ရခိုင်ပြည်နယ်၊ စစ်တွေခရိုင်၊ ခရိုင်ဦးစီးမှူး ဦးမောင်လှဝင်းနှင့် ဝန်ထမ်းများက အဆိုပါ MSME ထုတ်ကုန်ပြပွဲရောင်းချပွဲ၌ ခင်းကျင်းပြသထားသော စားသောက်ကုန်စည်များနှင့်ပတ်သက်၍ စားသုံးသူကာကွယ်ရေးဥပဒေ(၂၀၁၉) ၊ အခန်း(၁၈)၊ ပုဒ်မ(၄၁)ပါ ပြဌာန်းချက် ကုန်အညွှန်းအမှတ်အသားဖော်ပြခြင်းနှင့်စပ်လျဉ်း၍ ကုန်စည်အမျိုးအစားအလိုက် သတ်မှတ်ချက်များနှင့်အညီ သိသာထင်ရှားပြည့်စုံစွာဖော်ပြစေရန် ကုန်စည်ရောင်းချပြသထားသည့် MSME ထုတ်ကုန် ထုတ်လုပ်ရောင်းချသည့် စီးပွားရေးလုပ်ငန်းရှင်များအား အသိပညာပေး ဆောင်ရွက်ခဲ့ပါကြောင်း သတင်းရရှိပါသည်။
DOCA(ရခိုင်)