ကရင်ပြည်နယ်၊ ဘားအံမြို့တွင် စားသုံးသူများဘေးအန္တရာယ်ကင်းရှင်းရေး၊ ထုတ်ကုန်အရည် အသွေး တိုးမြှင့်ရေး အလုပ်ရုံဆွေးနွေးပွဲကို စားသုံးသူရေးရာဦးစီးဌာန၊ ကရင်ပြည်နယ်ဦးစီးမှူးရုံးမှ (၁၆.၁၂.၂၀၂၂) ရက်နေ့ (၀၉:၀၀)အချိန်တွင် ဘားအံမြို့ရှိ HOTEL PERFECT ၌ ကျင်းပခဲ့ရာ ကရင်ပြည်နယ်အစိုးရအဖွဲ့ စီးပွားရေးရာဝန်ကြီး၊ ကရင်ပြည်နယ် စားသုံးသူရေးရာ ကော်မတီဥက္ကဋ္ဌ ဦးစောခင်မောင်မြင့် ၊ ဌာနဆိုင်ရာ ၁၇ ဦး၊ လုပ်ငန်းရှင် ၄၃ ဦး စုစုပေါင်း ၆၀ ဦးတက်ရောက်ခဲ့ကြသည်။
ရှေးဦးစွာ စီးပွားရေးရာဝန်ကြီး ဦးစောခင်မောင်မြင့်မှ အဖွင့်အမှာစကားပြောကြားရာတွင် “စားသုံးသူများအနေဖြင့် ကုန်စည်နှင့်ဝန်ဆောင်မှုများကို ရယူသုံးစွဲရာတွင် ဘေးကင်းလုံခြုံစိတ်ချရမှုရှိစေဖို့၊ စားသုံးသူများအခွင့်အရေး မဆုံးရှုံးစေရေးအတွက် ကမ္ဘာ့နိုင်ငံအသီးသီးတွင် ဥပဒေပြဌာန်းပြီး ဆောင်ရွက်လျက်ရှိပါကြောင်း၊ မြန်မာနိုင်ငံတွင်လည်း စားသုံးသူအကာအကွယ်ပေးရေးဥပဒေ၊ နည်းဥပဒေများကို ပြဌာန်းပြီးဖြစ်ကြောင်း၊ ထုတ်လုပ်သူလုပ်ငန်းရှင်များအနေဖြင့် မိမိတို့ ကုန်ပစ္စည်း နှင့် ဝန်ဆောင်မှုလုပ်ငန်းများကို တန်ဖိုးကြီးကြီးနှင့် အမြတ်အစွန်းများများရဖို့ ရည်ရွယ်ထုတ်လုပ် ရောင်းချခြင်းထက် အရည်အသွေးကောင်းကောင်းဖြင့် ဘေးအန္တရာယ်ကင်းရှင်းမှု ရှိစေရေးကို ဦးစားပေး ဆောင်ရွက်ကြစေလိုကြောင်း” ပြောကြားသည်။
ဆက်လက်၍ စက်မှုကြီးကြပ်ရေးနှင့်စစ်ဆေးရေးဦးစီးဌာန ပြည်နယ်ဦးစီးမှူး ဦးစိန်လွင်က စက်မှု လုပ်ငန်းများနှင့် စားသောက်ကုန်ထုတ်လုပ်ငန်းများ လုပ်ငန်းမှတ်ပုံတင်ရာတွင် လျှောက်ထားဆောင်ရွက် ရမည့် အချက်အလက်များကိုလည်းကောင်း၊ အသေးစားစက်မှုလက်မှုလုပ်ငန်းဦးစီးဌာန ဒုတိယညွှန်ကြား ရေးမှူး ဒေါ်မိုးမိုးကြည်က အသေးစားစက်မှုလုပ်ငန်းများ ဖွံဖြိုးတိုးတက်စေရေးအတွက် ဌာနမှ ဆောင်ရွက် ပေးလျက်ရှိသည့် လုပ်ငန်းအခြေအနေများနှင့် စားသောက်ကုန်ထုတ်လုပ်ငန်းများ၏ ကုန်ပစ္စည်း နမူနာများအား ဓာတ်ခွဲစမ်းသပ်ဆောင်ရွက်ပေးနေမှု အခြေအနေများကိုလည်းကောင်း၊ အစားအသောက်နှင့် ဆေးဝါးကွပ်ကဲရေးဦးစီးဌာနမှ ဦးစီးအရာရှိ ဒေါ်နှင်းနှင်းဝင့် က စားသောက်ကုန်ထုတ်လုပ်ငန်းများ FDA ထောက်ခံချက်ရယူရာတွင် ဆောင်ရွက်ရမည့်အချက်များနှင့် Online မှ FDA ထောက်ခံချက် ရယူပုံ နည်းလမ်းများ၊ အစားအသောက်ဘေးအန္တရာယ်ကင်းရှင်ရေး၊ အရည်အသွေးမြင့်မားစေရေးအတွက် လုပ်ငန်းရှင်များအနေဖြင့် လိုက်နာဆောင်ရွက်ရမည့် ကောင်းမွန်သောထုတ်လုပ်မှု ကျင့်စဉ်နှင့် သန့်ရှင်း သော ထုတ်လုပ်မှု ကျင့်စဉ်များအကြောင်းကိုလည်းကောင်း၊ မြန်မာကုန်သွယ်မှုမြှင့်တင်ရေးဦးစီးဌာနမှ ပြည်နယ်ဦးစီးမှူး ဦးခင်မောင်မောင်အုန်းက အရည်အသွေးမြင့်ပစ္စည်းများ ပြည်ပနိုင်ငံများသို့ တင်ပို့ နိုင်ရေး၊ တန်ဖိုးမြင့်ထုတ်ကုန်များတိုးမြှင့်ထုတ်လုပ်ရေးနှင့် ပြည်ပနိုင်ငံများသို့ တင်ပို့နိုင်ရေးအတွက် ဌာနမှ ဆောင်ရွက်နေမှု အခြေအနေများကိုလည်းကောင်း၊ စားသုံးသူရေးရာဦးစီးဌာန ပြည်နယ်ဦးစီးမှူး ဦးသန်းဦးက စားသုံးသူရေးရာဦးစီးဌာနမှ ဆောင်ရွက်လျက်ရှိသည့် လုပ်ငန်းအခြေအနေများနှင့် ဈေးကွက်မရောက်မီကုန်စည်များနှင့် ဈေးကွက်ရောက်ပြီးကုန်စည်များ ထုတ်ကုန်လုံခြုံစိတ်ချရှိစေရေး အတွက် စစ်ဆေးဆောင်ရွက်လျက်ရှိသည့် အခြေအနေများနှင့် စားသုံးသူများဘေးဥပဒ်အန္တရာယ် ကင်းရှင်းစေရေးအတွက် ထုတ်ကုန်အရည်အသွေးမြှင့်တင်နိုင်ရန်အတွက် ဆောင်ရန် ရှောင်ရန်အချက် များကိုလည်းကောင်း ဆွေးနွေးပြောကြားခဲ့ကြပြီး တက်ရောက်လာသူများမှ သိလိုသည်များကို ပြန်လည် မေးမြန်းဆွေးနွေးခဲ့ကြပြီး တာဝန်ရှိသူများက ပြန်လည်ဖြေကြားခဲ့ကာ ဆွေးနွေပွဲမှ ဖော်ထုတ်ရရှိချက်များကို ပြန်လည်သုံးသပ်၍ အခမ်းအနား ကို ၁၄:၃၀ နာရီအချိန်တွင် ရုပ်သိမ်းခဲ့ကြောင်း သိရပါသည်။
စားသုံးသူရေးရာဦးစီးဌာန၊ ကရင်ပြည်နယ်ဦစီးမှူးရုံးသည် ဦးစီးဌာန၊ ကော်မတီ၊ ကော်မရှင် အဆင့်ဆင့်တို့၏ လမ်းညွှန်ချက်များနှင့်အညီ စားသုံးသူကာကွယ်ရေးလုပ်ငန်းများနှင့် ပြည်တွင်းကုန်သွယ်မှု ဖွံဖြိုးရေးလုပ်ငန်းများကို လျာထားချက်များ ချမှတ်၍ အသိပညာပေးဟောပြောခြင်း၊ စစ်ဆေးခြင်း၊ အလုပ်ရုံဆွေးနွေးပွဲများ ကျင်းပခြင်းများ ဆောင်ရွက်လျက်ရှိပြီး ယခုကဲ့သို့ “စားသုံးသူများဘေးကင်းဖို့ ထုတ်ကုန်အရည်အသွေးတိုးမြှင့်စို့” အလုပ်ရုံဆွေးနွေးပွဲအား ကျင်းပခြင်းအားဖြင့် ကရင်ပြည်နယ်အတွင်း စားသုံးသူများအနေဖြင့် ကုန်စည်နှင့်ဝန်ဆောင်မှုများကို ရယူသုံးစွဲရာတွင် ဘေးန္တရာယ်ကင်းရှင်းစွာဖြင့် ရယူသုံးစွဲလာနိုင်မည်ဖြစ်ပြီး လုပ်ငန်းရှင်များအနေဖြင့်လည်း မိမိတို့၏ထုတ်ကုန်များကို အရည်အသွေး မြှင့်တင်နိုင်ရေးအတွက် ပိုမိုကြိုးပမ်းဆောင်ရွက်လာနိုင်မည်ဖြစ်ကာ တန်ဖိုးမြှင့်ထုတ်ကုန်များ ထုတ်လုပ် လာနိုင်မည်ဖြစ်ကြောင်း သိရသည်။
DOCA(ကရင်)