စားသုံးသူရေးရာဦးစီးဌာန၏ မျှော်မှန်းချက်ဖြစ်သော ပြည်တွင်းကုန်သွယ်မှုဖွံ့ဖြိုးရေးနှင့် စားသုံးသူကာကွယ်ရေးလုပ်ငန်းများဖြင့် နိုင်ငံ့စီးပွားရေး ဖွံ့ဖြိုးတိုးတက်စေရန် ရည်ရွယ်၍ စားသုံးသူရေးရာဦးစီးဌာန၊ စစ်ကိုင်းခရိုင်ဦးစီးမှူး ဒေါ်သန်းသန်းတင်နှင့် ဝန်ထမ်းများသည် ဒီဇင်ဘာလ ၉ ရက် နေ့တွင် စစ်ကိုင်းမြို့ နီလာစက်မှုဇုန်ရှိ ရှမ်းအိုးစည်အသင့်စားရှမ်းခေါက်ဆွဲသုပ်နှင့် ရွှေမန်းသား အသင့်စားဆီချက်ခေါက်ဆွဲစက်ရုံသို့သွားရောက်၍ လုပ်ငန်းရှင် ဦးကောင်းခန့်စိုးနှင့် တွေ့ဆုံခဲ့ပါသည်။
ထိုသို့ တွေ့ဆုံရာတွင် အသင့်စားခေါက်ဆွဲလုပ်ငန်းကို ၂၀၂၁ ခုနှစ်၊ စက်တင်ဘာလပိုင်းက ပါကင်ပိတ်စက် (၂) လုံး၊ အနှစ်ချစက် (၂) လုံးနှင့် အမှုန့်ချစက် (၁) လုံး အပါအဝင် မတည်ရင်းနှီးငွေ ကျပ်သိန်း (၅၀၀ )ခန့်ဖြင့် စတင်ခဲ့ကြောင်း၊ အလုပ်သမား (၇)ဦးအား အလုပ်အကိုင် အခွင့်အလမ်းများ ပေးထားနိုင်ပါကြောင်း၊ အလုပ်ချိန်မှာ နံနက်(၀၈:၀၀)နာရီမှ ညနေ (၅:၀၀) နာရီထိဖြစ်ကြောင်း၊ လုပ်သားခအနေဖြင့်(၃)လ အစမ်းခန့်အား တစ်ဦးလျှင် (၁)လ ကျပ်(၁)သိန်း၊ (၃)လကျော်ပါက (၁၄၀၀၀၀ ကျပ် မှ ၁၆၀၀၀၀ ကျပ်) ပေးချေကြောင်း၊ ကုန်ကြမ်းမုန့်ဖတ်ခြောက်အား စက်ရုံမှ ကိုယ်တိုင်ထုတ်လုပ်ပြီး ပဲငါးပိအား သီပေါမြို့မှလည်းကောင်း၊ ကြက်သွန်ဖြူကြော်နှင့် မြေပဲလှော် များအား မန္တလေးမြို့မှ လည်းကောင်း အသီးသီးဝယ်ယူကြောင်း၊ တစ်ရက်ထုတ်လုပ်နိုင်မှု ပမာဏမှာ ရှမ်းအိုးစည်အသင့်စား ရှမ်းခေါက်ဆွဲသုပ်နှင့် ရွှေမန်းသား အသင့်စားဆီချက်ခေါက်ဆွဲ (၂)မျိုးပေါင်း အထုပ်(၁၀၀)ပါ ဂျပ်ဖာ (၁၅ ဖာမှ ၂၀ ဖာ) ထုတ်လုပ်နိုင်ကြောင်း၊ ကုန်ချောအား မြန်မာပြည်အနှံ့ ကိုယ်စားလှယ်များဖြင့် တင်ပို့ရောင်းချ ကြောင်း၊ အထုပ်(၁၀၀)ပါ ဂျပ်ဖာ(၁)ဖာလျှင် ဖောက်သည်ဈေး (၅၇၅၀၀)ကျပ်ဖြင့် ရောင်းချကြောင်း၊ အကျိုးအမြတ် အနေဖြင့် (၁၀%) ခန့် ရရှိကြောင်း၊ အသင့်စားခေါက်ဆွဲများဖြစ်၍ အလွယ်တကူ စားသုံးနိုင်ပြီး ပြည်တွင်းဈေးကွက် ဝေစုမှ ပြည်ပဈေးကွက်ဝေစုရရှိလိုကြောင်း အသင့်စားခေါက်ဆွဲစက် လုပ်ငန်းရှင် ထံမှသိရှိရပြီး စားသုံးသူရေးရာဦးစီးဌာန၊ စစ်ကိုင်းခရိုင်ဦးစီးမှူး ဒေါ်သန်းသန်းတင်က စားသုံးသူကာကွယ်ရေးဥပဒေအခန်း (၁၈)ပါ ကုန်အညွှန်းအမှတ်အသားဖော်ပြခြင်းနှင့် စပ်လျဉ်း၍ ကုန်စည်အမျိုးအစားအလိုက် သတ်မှတ်ချက်များနှင့်အညီ သိသာထင်ရှားစွာ ဖော်ပြရမည့်အချက်များကို ရှင်းလင်းဆွေးနွေးခြင်းနှင့် မြန်မာဘာသာဖြင့်ဖြစ်စေ၊ မြန်မာဘာသာနှင့် အခြားဘာသာတစ်ခု သို့မဟုတ် တစ်ခုထက်ပို၍ တွဲလျက်ဖြစ်စေ ရေးသားဖော်ပြရမည့်အချက်များကိုအသိပညာပေး ဟောပြောခဲ့ကြောင်း သတင်း ရရှိပါသည်။
DOCA(စစ်ကိုင်း)