ဖိလစ်ပိုင်နိုင်ငံသည် ယူနိုက်တက်အာရပ်စော်ဘွားများနိုင်ငံ (UAE) သို့ လတ်ဆတ်သော နာနတ်သီးများ တင်ပို့ခြင်းဖြင့် အရှေ့အလယ်ပိုင်းဒေသရှိ ၎င်း၏ စိုက်ပျိုးရေးဆိုင်ရာ ကုန်သွယ်မှုကဏ္ဍကို ချဲ့ထွင်ခဲ့ကြောင်း သိရပါသည်။ ဇွန်လ ၂၈ ရက်နေ့တွင် ပရီမီယံအဆင့်ရှိ MD2 နာနတ်သီး တန်ချိန် ၁၈ ဘီလီယံခန့်သည် ယူအေအီးနိုင်ငံရှိ Khor Fakkan ဆိပ်ကမ်းသို့ ရောက်ရှိလာခဲ့ကြောင်း စိုက်ပျိုးရေးဝန်ကြီးဌာန (DA) က ဇွန်လ ၃၀ ရက်နေ့တွင် ထုတ်ပြန်သည့် ကြေညာချက်တစ်ခု၌ ပြောကြားခဲ့ကြောင်း သိရသည်။
နာနတ်သီးတင်ပို့မှုများကို သေတ္တာပေါင်း ၁,၅၀၀ ဖြင့် ထုပ်ပိုးထားပြီး၊ အဆိုပါ နာနတ်သီးများကို တောင်ပိုင်း Cotabato ပြည်နယ်၊ Tampakan ရှိ စိုက်ပျိုးရေးခြံများမှ ရယူခဲ့ခြင်းဖြစ်ကြောင်း သိရပါသည်။ ဖိလစ်ပိုင်အစိုးရ တာဝန်ရှိသူများသည် ဒူဘိုင်းမြို့၏ Al Aweer သစ်သီးနှင့် ဟင်းသီးဟင်းရွက်စျေးကွက်တွင် ကျင်းပသည့် အခမ်းအနားတစ်ခုဖြင့် အဆိုပါ ဖွံ့ဖြိုးတိုးတက်မှုကို ဂုဏ်ပြုမှတ်တမ်းတင်ခဲ့ကြောင်း သိရပါသည်။
Davao အခြေစိုက် ပို့ကုန်လုပ်ငန်းရှင် Mensch Fil-Am Trading သည် Avante Agri-Products Philippines Inc နှင့် ပူးပေါင်း၍ အဆိုပါ ကုန်တင်ပို့မှုကို ဆောင်ရွက်ခဲ့ခြင်းဖြစ်ပြီး၊ Octagon General Trading LLC က ဖြန့်ဖြူးရေးလုပ်ငန်းကို ကူညီပံ့ပိုးပေးခဲ့သည်။ အဆိုပါကုမ္ပဏီသည် ငှက်ပျောသီး၊ သရက်သီး၊ ဒူးရင်းသီးနှင့် ကျွဲကောသီး အပါအဝင် ဖိလစ်ပိုင်သစ်သီးဝလံများကို ဖြန့်ဖြူးရန်အတွက် ဆော်ဒီအာရေဗျနှင့် အခြားသောပင်လယ်ကွေ့ စျေးကွက်များရှိ မိတ်ဖက်များနှင့် လက်တွဲလုပ်ဆောင်နေကြောင်း စိုက်ပျိုးရေးဝန်ကြီးဌာန (DA) မှထုတ်ပြန်သော ထုတ်ပြန်ချက်များအရ သိရပါသည်။
ယူအေအီးစျေးကွက်သို့ နောက်ဆုံးခြေလှမ်းလှမ်းနိုင်ခဲ့သည့် ယခုလုပ်ငန်းသည် ပို့ကုန် စျေးကွက်များကို ကွဲပြားစုံလင်အောင် ပြုလုပ်ရန်၊ ကုန်သွယ်မှုဆက်ဆံရေးကို အားကောင်းစေရန်နှင့် အရှေ့အလယ်ပိုင်းဒေသတစ်လွှားတွင် ဖိလစ်ပိုင်စိုက်ပျိုးရေးပို့ကုန်များကို မြှင့်တင်ရန် အတွက် စိုက်ပျိုးရေးဝန်ကြီးဌာန (DA) ၏ စဉ်ဆက်မပြတ် ကြိုးပမ်းအားထုတ်မှုများ၏ အစိတ်အပိုင်းတစ်ခုဖြစ်ကြောင်း သိရှိရပါသည်။
Source: Inquirernet
DOCA (ရန်ကုန်)