ကမ္ဘာ့စားနပ်ရိက္ခာနှင့် စိုက်ပျိုးရေးအဖွဲ့ (FAO) နှင့် စီးပွားရေး ပူးပေါင်းဆောင်ရွက်မှုနှင့် ဖွံ့ဖြိုးတိုးတက်ရေးအဖွဲ့ (OECD) တို့၏ ထုတ်ပြန်သောအစီရင်ခံစာသစ်အရ ကမ္ဘာ့ပျမ်းမျှ လယ်ယာလုပ်သားတစ်ဦး၏ စုစုပေါင်းဝင်ငွေသည် ကုန်ထုတ်စွမ်းအားတိုးတက်မှုနှင့် စိုက်ပျိုးရေး ထွက်ကုန်ဈေးနှုန်းများ တည်ငြိမ်မှုကြောင့် ၂၀၃၅ ခုနှစ်တွင် ၉ ရာခိုင်နှုန်းအထိ တိုးတက်လာမည်ဟု ခန့်မှန်းထားကြောင်း သိရသည်။
သို့သော်လည်း ထိုမျှော်မှန်းချက်သည် အကျပ်အတည်းများနှင့် ပဋိပက္ခများကြောင့် ဖြစ်ပေါ်လာသည့် ဈေးကွက်မတည်ငြိမ်မှုများ၏ အန္တရာယ်ကို ခံနေရဆဲဖြစ်ပြီး မကြာသေးမီနှစ်များအတွင်း ဖြစ်ပွားခဲ့သည့် အခြေအနေများဆက်လက်ဖြစ်ပေါ်နေပါက ၂၀၃၅ ခုနှစ်တွင် လယ်ယာဝင်ငွေများသည် လက်ရှိအဆင့်ထက် လျော့နည်းသွားနိုင်သည့် ဖြစ်နိုင်ခြေ ၂၅ ရာခိုင်နှုန်း ရှိနေကြောင်း ခန့်မှန်းထားကြသည်။ ထို့ပြင် ၂၀၂၆ ခုနှစ် ပထမနှစ်ဝက်တွင် ကြုံတွေ့ခဲ့ရသည့် စွမ်းအင်ဈေးနှုန်း ၃၃ ရာခိုင်နှုန်း မြင့်တက်မှုမျိုး ဆက်လက်ဖြစ်ပေါ်ပါက ၂၀၂၇ ခုနှစ်တွင် ကမ္ဘာ့ကောက်ပဲသီးနှံ ထုတ်လုပ်မှု ၀.၉ ရာခိုင် နှုန်းလျော့ကျသွားမည်ဖြစ်ပြီး ဝင်ငွေနည်းပါးသော နိုင်ငံများတွင်မူ ၁.၇ ရာခိုင်နှုန်းအထိ ပိုမိုပြင်းထန်စွာ ကျဆင်းနိုင်ကြောင်း သိရှိရသည်။
ထို့အပြင် OECD အတွင်းရေးမှူးချုပ် Mathias Cormann က “ကျွန်ုပ်တို့၏ စားနပ်ရိက္ခာစနစ်များ ဖိအားပေးခံနေရပြီး တောင်သူလယ်သမားများသည် စွမ်းအင်နှင့် မြေဩဇာစရိတ်များ မြင့်တက်မှု၏ရှေ့တန်းတွင် ရှိနေကြသည်” ဟု ပြောကြားခဲ့ပြီး FAO ညွှန်ကြားရေးမှူးချုပ် QU Dongyu ကမူ “ခံနိုင်ရည်ရှိခြင်းသည် နောက်ဆုံးကြုံတွေ့ရသည့် အကျပ်အတည်းမှ လွတ်မြောက်ခြင်းမဟုတ်ပဲ နောက်လာမည့် အကျပ်အတည်းအတွက် ကြိုတင်ပြင်ဆင်ခြင်းဖြစ်သည်” ဟု အလေးပေးပြောကြားခဲ့ပြီး ကမ္ဘာ့စားနပ်ရိက္ခာဖူလုံရေးကို ခိုင်မာစေရန်အတွက် ဘက်စုံပူးပေါင်း ဆောင်ရွက်မှုနှင့် စည်းမျဉ်းများကိုအခြေခံသော နိုင်ငံတကာကုန်သွယ်မှုစနစ်များသည် မရှိမဖြစ် လိုအပ်နေဆဲဖြစ်ကြောင်း အစီရင်ခံစာတွင် ဖော်ပြထားကြောင်း သိရှိရပါသည်။
Source : Global Agriculture
DOCA (ရန်ကုန်)