အင်ဒိုနီးရှားနိုင်ငံ Lampung ဒေသ တိရစ္ဆာန်၊ ငါးနှင့် အပင် Quarantine Agency သည် Palm Kernel Expeller (PKE) တန်ချိန် ၁၄,၀၀၀ ကို နယူးဇီလန်နိုင်ငံသို့ ဇူလိုင် ၃ ရက်တွင် တင်ပို့နိုင်ခဲ့ကြောင်း သိရပါသည်။အဆိုပါ PKE တင်ပို့မှုတန်ဖိုးမှာ အင်ဒိုနီးရှားရူပီး ၂၀ ဘီလီယံ ခန့်ရှိပြီး တင်ပို့မည့်နိုင်ငံကသတ်မှတ်ထားသည့် စံချိန်စံညွှန်းများအပါအဝင် ပို့ကုန်လိုအပ်ချက်များအားလုံးကို ပြည့်မီပြီးမှ တင်ပို့ခဲ့ခြင်းဖြစ်ကြောင်း Lampung ဒေသ Quarantine Agency အကြီးအကဲ Donni Muksydayan က ပြောကြားခဲ့ပါသည်။ ၎င်းက ယခုတင်ပို့မှုသည် Lampung ဒေသမှထွက်ရှိသော ကုန်စည်များ၏ နိုင်ငံတကာဈေးကွက်ယှဉ်ပြိုင်နိုင်စွမ်းကို ထင်ရှားစွာ ပြသ နိုင်ခဲ့သကဲ့သို့ ဒေသခံလုပ်ငန်းများ၏ ကမ္ဘာလုံးဆိုင်ရာထောက်ပံ့ရေးကွင်းဆက်တွင် ပါဝင်မှုကိုလည်း ပိုမိုခိုင်မာစေပြီး အင်ဒိုနီးရှားစိုက်ပျိုးရေးထုတ်ကုန်များအပေါ် နိုင်ငံတကာ၏ ယုံကြည်မှုကိုလည်း တိုးမြှင့်ပေးနိုင်ကြောင်း ပြောကြားခဲ့ပါသည်။ PKE သည် စားအုန်းဆီထုတ်လုပ်ရေး လုပ်ငန်းမှထွက်ရှိသည့် တန်ဖိုးမြင့်ဘေးထွက်ထုတ်ကုန်တစ်မျိုးဖြစ်ပြီး အမျှင်ဓာတ်ကြွယ်ဝသည့်အတွက် တိရစ္ဆာန်အစာထုတ်လုပ်ရာတွင် အစားထိုးကုန်ကြမ်းအဖြစ် ကျယ်ကျယ်ပြန့်ပြန့် အသုံးပြုလျက်ရှိကြောင်း သိရပါသည်။ နယူးဇီလန်နိုင်ငံသည် ထိုကုန်ပစ္စည်းအတွက် အလားအလာကောင်းသည့် ဈေးကွက်တစ်ခုဖြစ်ကြောင်း သိရပါသည်။ Lampung ဒေသ၏ PKE တင်ပို့မှုမှာ မကြာသေးမီနှစ်များအတွင်း ဆက်တိုက်တိုးတက်လျက်ရှိကြောင်း သိရပါသည်။ ၂၀၂၄ ခုနှစ်တွင် တင်ပို့မှု ၁၇၂ ကြိမ်ဖြင့် စုစုပေါင်း တန်ချိန် ၅၆၉,၀၀၀ ခန့် တင်ပို့နိုင်ခဲ့ပြီး တန်ဖိုးအားဖြင့် ရူပီး ၂ ဒသမ ၅၈ ထရီလီယံခန့် ရရှိခဲ့ကြောင်း သိရပါသည်။ ၂၀၂၅ ခုနှစ်တွင် တင်ပို့မှု ၁၈၄ ကြိမ်ဖြင့် တန်ချိန် ၁ ဒသမ ၃၄ သန်းခန့်နှင့် တန်ဖိုး ရူပီး ၃ ဒသမ ၁၂ ထရီလီယံအထိ တိုးတက်ခဲ့ကြောင်း သိရပါသည်။ ၂၀၂၆ ခုနှစ် ဇန်နဝါရီလမှ ဇွန်လအထိ ခြောက်လတာကာလအတွင်း တင်ပို့မှု ၆၆ ကြိမ်ဖြင့် PKE တန်ချိန် ၅၁၃,၀၀၀ ခန့် တင်ပို့နိုင်ခဲ့ပြီး ပို့ကုန်တန်ဖိုး ရူပီး ၁ ဒသမ ၁၇ ထရီလီယံ ခန့် ရရှိခဲ့ကြောင်း သိရပါသည်။ ကမ္ဘာလုံးဆိုင်ရာ မွေးမြူရေးလုပ်ငန်းများ တိုးချဲ့လာခြင်းနှင့်အမျှ PKE အပေါ် နိုင်ငံတကာဝယ်လိုအား ဆက်လက်မြင့်တက်နေပြီး ၎င်းအခြေအနေသည် အင်ဒိုနီးရှားနိုင်ငံ အထူးသဖြင့် Lampung ဒေသအတွက် ပို့ကုန်ဈေးကွက် ပိုမိုချဲ့ထွင်နိုင်မည့် အခွင့်အလမ်းကောင်းတစ်ရပ်ဖြစ်ကြောင်း သိရပါသည်။ Muksydayan က ယခု တန်ချိန် ၁၄,၀၀၀ တင်ပို့မှုကို အသစ်ထူထောင်ထားသော ပို့ကုန်လုပ်ငန်းရှင်များက ဆောင်ရွက်ခဲ့ခြင်းဖြစ်ပြီး Lampung ဒေသ၏ စိုက်ခင်းထွက်ကုန်များအတွက် ပြည်ပဈေးကွက် အခွင့်အလမ်းများ ပိုမိုတိုးပွားလာနေသည်ကိုလည်း ထင်ဟပ်စေကြောင်း ပြောကြားခဲ့ပါသည်။ တင်ပို့မှုလုပ်ငန်းစဉ် တစ်လျှောက် ဒေသဆိုင်ရာ Quarantine Agency က စစ်ဆေးခြင်း၊ ကြီးကြပ်ခြင်းနှင့် အပင် ကျန်းမာရေးဆိုင်ရာ လက်မှတ်ထုတ်ပေးခြင်းများကို ပြည့်စုံစွာဆောင်ရွက်ခဲ့ပြီး နယူးဇီလန်နိုင်ငံ၏ သွင်းကုန်သတ်မှတ်ချက်များနှင့် ကိုက်ညီကြောင်း အတည်ပြုနိုင်ရန် Phytosanitary Certificate ကိုလည်း ထုတ်ပေးခဲ့ကြောင်း သိရပါသည်။ ၎င်းက အသစ်ဝင်ရောက်လာသည့် ပို့ကုန်လုပ်ငန်းရှင်များ၏ အောင်မြင်မှုသည် Quarantine စနစ်နှင့် အသိအမှတ်ပြုလက်မှတ်ထုတ်ပေးမှု လုပ်ငန်းစဉ်များက စီးပွားရေးလုပ်ငန်းများ နိုင်ငံတကာဈေးကွက်သို့ ရေရှည်တိုးချဲ့ဝင်ရောက်နိုင်ရန် ထိရောက်စွာ အထောက်အကူပြုနေကြောင်းကိုလည်း ဖော်ပြနေသည်ဟု ပြောကြားခဲ့ကြောင်း သိရှိရပါသည်။
Antara News
DOCA (ရန်ကုန်)