အင်ဒိုနီးရှားနိုင်ငံ ကုန်သွယ်ရေးဝန်ကြီးဌာနသည် တင်ပို့မည့်နိုင်ငံများက သတ်မှတ်ထားသော တင်ပို့မှုဆိုင်ရာလိုအပ်ချက်များကို ပြည့်မီစေရန်ရည်ရွယ်၍ အသေးစား၊ အငယ်စားနှင့် အလတ်စားစီးပွားရေးလုပ်ငန်းများ (MSMEs) အား ဆက်လက်ကူညီပံ့ပိုးလျက်ရှိကြောင်း သိရပါ သည်။ ဝန်ဆောင်မှုနှင့် ဖန်တီးမှုထုတ်ကုန်များ တင်ပို့ရေးဖွံ့ဖြိုးတိုးတက်ရေးဦးစီးဌာနမှ ညွှန်ကြားရေးမှူး Ari Satria က အစားအသောက်၊ အဖျော်ယမကာ၊ အလှကုန်နှင့် ဆေးဝါးကဲ့သို့သော အခြေခံထုတ်ကုန်များ၏ တင်ပို့မှုဆိုင်ရာစည်းမျဉ်းစည်းကမ်းများမှာ လူ့ကျန်းမာရေးနှင့် တိုက်ရိုက် သက်ဆိုင်သဖြင့် အစားအသောက်မဟုတ်သောထုတ်ကုန်များထက် ပိုမိုတင်းကျပ်ကြောင်းနှင့် တင်ပို့မည့်နိုင်ငံများတွင် လူ့ကျန်းမာရေးနှင့်သက်ဆိုင်သည့် စည်းမျဉ်းစည်းကမ်းများက ပရိဘောဂ (သို့မဟုတ်) လက်မှုပစ္စည်းများ တင်ပို့ခြင်းထက် ပိုမိုရှုပ်ထွေးတင်းကျပ်သည်မှာ သဘာဝကျကြောင်း ဇူလိုင် ၅ ရက်တွင် ဂျကာတာမြို့၌ ပြောကြားခဲ့ပါသည်။ ၎င်း၏အဆိုအရ စီးပွားရေးလုပ်ငန်းရှင်များအနေဖြင့် အစားအသောက်ဘေးကင်းလုံခြုံရေး အသိအမှတ်ပြုလက်မှတ်နှင့် ဟာလာလ်အသိ အမှတ်ပြုလက်မှတ်အပါအဝင် တင်ပို့မည့်နိုင်ငံအသီးသီးက သတ်မှတ်ထားသော စံချိန်စံညွှန်းများနှင့် လိုအပ်ချက်များကို နားလည်ထားရန်လိုအပ်ကြောင်း သိရပါသည်။ ထို့ပြင် ဝန်ကြီးဌာနသည် စီးပွားရေးလုပ်ငန်းရှင်များအား လေ့ကျင့်သင်ကြားပေးခြင်းအပြင် ကမ္ဘာ့ဈေးကွက်တွင် ပေါ်ပေါက်လာသော စည်းမျဉ်းအသစ်များ၊ အထူးသဖြင့် ရေရှည်တည်တံ့ဖွံ့ဖြိုးရေးနှင့် ပတ်ဝန်းကျင် ထိန်းသိမ်းရေးဆိုင်ရာ သတ်မှတ်ချက်များကိုလည်း အသိပညာပေးဆောင်ရွက်လျက်ရှိကြောင်း သိရပါသည်။ Satria က လက်ရှိတွင် ပို့ကုန်လုပ်ငန်းရှင်များအတွက် အရေးပါသောမူဝါဒများအဖြစ် စိုက်ခင်းထွက်ကုန်များကို ထိန်းကျောင်းသည့် ဥရောပသမဂ္ဂသစ်တောပြုန်းတီးမှုဆိုင်ရာ စည်းမျဉ်း (EUDR) နှင့် ကာဗွန်ထုတ်လွှတ်မှုဆိုင်ရာ Carbon Border Adjustment Mechanism (CBAM) တို့ကို ဥပမာပေးပြောကြားခဲ့ကြောင်း သိရပါသည်။ ၎င်းက ပြည်ပက စည်းမျဉ်းစည်းကမ်းများနှင့် ပတ်သက်ပြီး ပို့ကုန်လုပ်ငန်းရှင်များကို ပိုမိုအသိပညာပေးရန်လိုအပ်ကြောင်းနှင့် MSME များ သာမက လုပ်ငန်းကြီးများပါ နောက်ထပ်နားလည်မှုများ လိုအပ်နေတတ်ကြောင်း ပြောကြားခဲ့ ပါသည်။ ထို့အပြင် အင်ဒိုနီးရှားနိုင်ငံ၏ ပြည်ပကုန်သွယ်ရေးကိုယ်စားလှယ်များမှ တစ်ဆင့်လည်း အကူအညီများ ပံ့ပိုးပေးလျက်ရှိပြီး ဒေသထွက်ကုန်များကို နိုင်ငံခြားဈေးကွက်သို့ မိတ်မဆက်မီ လိုအပ်သည့် အသိအမှတ်ပြုလက်မှတ်များနှင့် အခြားလိုအပ်ချက်များကို အရေးပါသော အချက်အလက်များအဖြစ် ပံ့ပိုးပေးလျက်ရှိကြောင်း သိရပါသည်။ ထိုဆောင်ရွက်မှုများသည် အင်ဒိုနီးရှား ထုတ်ကုန်များ နိုင်ငံတကာဈေးကွက်သို့ ဝင်ရောက်ရာတွင် အုပ်ချုပ်ရေးဆိုင်ရာ အခက်အခဲများ (သို့မဟုတ်) ငြင်းပယ်ခံရမှုများမကြုံတွေ့စေရန်နှင့် ပြည်တွင်းပို့ကုန် လုပ်ငန်းရှင်များ၏ အဆင်သင့်ဖြစ်မှုကို မြှင့်တင်ရန်ရည်ရွယ်သည့် အစိုးရ၏ကျယ်ပြန့်သော ကြိုးပမ်းဆောင်ရွက်မှုများ၏ တစ်စိတ် တစ်ပိုင်းဖြစ်ကြောင်း သိရပါသည်။ Satria က ၎င်တို့၏ ကုန်သွယ်ရေးကိုယ်စားလှယ်များ၏ တာဝန်မှာ အရောင်းမြှင့်တင်ရေးသာမကဘဲ ဈေးကွက်ဆိုင်ရာ သတင်းအချက်အလက်များကိုလည်း စုဆောင်းပေးရခြင်းဖြစ်ကြောင်းနှင့် ၎င်းတို့အနေဖြင့် ဈေးကွက်အလားအလာ၊ စည်းမျဉ်းစည်းကမ်းများ၊ သွင်းကုန်အခွန်နှုန်းထားများ၊ ပြိုင်ဘက်အခြေအနေများနှင့် စားသုံးသူများ၏ အပြုအမူများကိုပါ နားလည်ထားရန် လိုအပ်ကြောင်း ပြောကြားခဲ့သည်ဟု သိရှိရပါသည်။
Antara News
DOCA (ရန်ကုန်)