အင်ဒိုနီးရှားနိုင်ငံ၏ ရေကြောင်းရေးရာနှင့် ငါးလုပ်ငန်းဝန်ကြီးဌာနနှင့် တရုတ်နိုင်ငံ၏ အကောက်ခွန်အာဏာပိုင်အဖွဲ့(GACC) တို့သည် အင်ဒိုနီးရှားနိုင်ငံရှိ ငါးထုတ်လုပ်မှုနှင့် ပြုပြင်ထုတ်လုပ်ရေးလုပ်ငန်းအချို့ကို ပူးတွဲစစ်ဆေးလျက်ရှိကြောင်း သိရပါသည်။ အဆိုပါပူးတွဲစစ်ဆေး မှုသည် အင်ဒိုနီးရှားရေထွက်ကုန်များ၏ တရုတ်ဈေးကွက်ဝင်ရောက်ခွင့်ကို ဆက်လက်ထိန်းသိမ်း နိုင်ရန်နှင့် ဈေးကွက်တိုးချဲ့နိုင်ရန် ရည်ရွယ်ဆောင်ရွက်ခြင်းဖြစ်ကြောင်း သိရပါသည်။ ဇူလိုင်လ ၂၀ ရက်နေ့ကကျင်းပသော ပူးတွဲစစ်ဆေးမှုဖွင့်ပွဲအစည်းအဝေးအပြီးတွင် ရေကြောင်းနှင့် ငါး လုပ်ငန်းအရည်အသွေးထိန်းချုပ်ရေးနှင့် ကြီးကြပ်ရေးအေဂျင်စီ၏ ယာယီအကြီးအကဲ Ishartini က ထိုပူးတွဲစစ်ဆေးမှုသည် နှစ်နိုင်ငံအကြား ပူးပေါင်းဆောင်ရွက်ရေးသဘောတူညီချက်အရ ပုံမှန် ဆောင်ရွက်လျက်ရှိသည့် လုပ်ငန်းစဉ်တစ်ရပ်ဖြစ်ကြောင်း ပြောကြားခဲ့ပါသည်။ Ishartini က ထိုလုပ်ငန်းစဉ်သည် ပုံမှန်ဆောင်ရွက်နေသည့် လုပ်ငန်းတစ်ရပ်ဖြစ်ပြီး တရုတ်ဈေးကွက်အတွင်း ၎င်းတို့၏ ရေထွက်ကုန်များ ဈေးကွက်ဝင်ရောက်ခွင့်ကို ထိန်းသိမ်းနိုင်ရန်နှင့် ပိုမိုတိုးချဲ့နိုင်ရန် လိုအပ်သည့် အခြေခံလိုအပ်ချက်တစ်ရပ်လည်းဖြစ်ကြောင်းနှင့် ၎င်း၏ဌာနနှင့် GACC တို့သည် Mutual Recognition Arrangement (MRA) ကို သဘောတူချုပ်ဆိုထားပြီး နှစ်ဖက်အာဏာပိုင် အဖွဲ့အစည်းများတွင် မှတ်ပုံတင်ထားသော ရေထွက်ကုန်လုပ်ငန်းများသာ ရေထွက်ကုန်များ တင်ပို့၊ တင်သွင်းခွင့်ရရှိကြောင်း ပြောကြားခဲ့ပါသည်။ MRA အရ နှစ်နိုင်ငံသည် အရည်အသွေး အာမခံစနစ်များ၊ အပြည်ပြည်ဆိုင်ရာစံချိန်စံညွှန်းများနှင့် နှစ်နိုင်ငံ၏ပြည်တွင်းစည်းမျဉ်းစည်းကမ်းများနှင့် ကိုက်ညီမှုရှိစေရန် ပူးတွဲစစ်ဆေးမှုများဆောင်ရွက်ရန် သဘောတူထားကြောင်း သိရပါသည်။ ၎င်းစနစ်သည် ထုတ်ကုန်အရည်အသွေးအပေါ်ယုံကြည်မှုကိုထိန်းသိမ်းနိုင်ရန်နှင့် ဈေးကွက်ဝင်ရောက်ခွင့်ဆက်လက်ရရှိစေရန် ရည်ရွယ်ထားခြင်းဖြစ်ကြောင်း သိရပါသည်။ ယခုအကြိမ် စစ်ဆေးမှုတွင် ရေကြောင်းရေးရာနှင့် ငါးလုပ်ငန်းဝန်ကြီးဌာနနှင့် GACC မှ တာဝန်ရှိသူများသည် ၂၀၂၆ ခုနှစ် ဇူလိုင် ၁၉ ရက်အထိ GACC တွင် မှတ်ပုံတင်ထားသော အင်ဒိုနီးရှား ငါးထုတ်လုပ်မှုနှင့် ပြုပြင်ထုတ်လုပ်ရေးလုပ်ငန်း ၆၄၈ ခုအနက် သုံးခုကို စစ်ဆေးခဲ့ကြောင်း သိရပါသည်။ ဝန်ကြီးဌာန၏ ၂၀၂၅ ခုနှစ် စာရင်းများအရ အဆိုပါလုပ်ငန်းသုံးခုသည် တရုတ်နိုင်ငံသို့ ရေထွက်ကုန် တန်ချိန် ၅,၀၀၀ ကျော် တင်ပို့ခဲ့ပြီး စုစုပေါင်းတန်ဖိုးမှာ အမေရိကန်ဒေါ်လာ ၁၈ သန်းရှိကြောင်း သိရပါသည်။ ပူးတွဲစစ်ဆေးမှုတွင် ထုတ်လုပ်မှုလုပ်ငန်းစဉ်အတွင်း သန့်ရှင်းရေး၊ တစ်ကိုယ်ရေ သန့်ရှင်းမှု၊ အစားအစာဘေးကင်းလုံခြုံရေး စံချိန်စံ ညွှန်းများနှင့် ကုန်ပစ္စည်းနောက်ကြောင်း လိုက်စနစ် (Traceability System) ကို အဓိကအကဲ ဖြတ်စစ်ဆေးခဲ့ကြောင်း သိရပါသည်။ Ishartini က စစ်ဆေးမှုတွင် အေးခဲရေထွက်ကုန်များဖြစ်သည့် Ribbonfish, Leatherjacket Fish, Cephalopods, Swimming Crabs, Spanish Mackerel, Conger Eels နှင့် Sea Snails တို့ကို အဓိကအကျုံးဝင်စစ်ဆေးခဲ့ကြောင်း ပြောကြားခဲ့ပါသည်။ ဝန်ကြီးဌာန၏စာရင်းများအရ အင်ဒိုနီးရှားနိုင်ငံ၏ တရုတ်နိုင်ငံသို့ ရေထွက်ကုန်တင်ပို့မှုမှာ တန်ချိန် ၄၇၉,၀၀၀ အထိ ရောက်ရှိခဲ့ပြီး စုစုပေါင်းတန်ဖိုးမှာ အမေရိကန်ဒေါ်လာ ၁ ဒသမ ၂ ဘီလီယံခန့်ရှိကြောင်း သိရပါသည်။ အဓိကတင်ပို့သည့် ရေထွက်ကုန်များတွင် Squid, Seaweed နှင့် Ribbonfish တို့ ပါဝင်ကြောင်း သိရပါသည်။ ထို့ပြင် နိုင်ငံတကာဈေးကွက်တွင် အင်ဒိုနီးရှား ရေထွက်ကုန်များ၏ လက်ခံယုံကြည် မှုကို ဆက်လက်ထိန်းသိမ်းနိုင်ရန် ရေကြောင်းရေးရာနှင့် ငါးလုပ်ငန်းဝန်ကြီးဌာနသည် ကောင်းမွန်သည့်ကုန်ထုတ်လုပ်မှုအလေ့အထ (GMP) အသိအမှတ်ပြုလက်မှတ်နှင့် Hazard Analysis and Critical Control Points (HACCP) စံချိန်စံညွှန်းများနှင့် ကိုက်ညီမှုရှိ၊ မရှိကို ပုံမှန်စိစစ်အတည်ပြုလျက်ရှိကြောင်း Ishartini က ပြောကြားခဲ့ပါသည်။ ထို့အပြင် သန့်ရှင်းရေး၊ တစ်ကိုယ်ရေ သန့်ရှင်းမှုနှင့် အစားအစာဘေးကင်းလုံခြုံရေး စံချိန်စံညွှန်းများကို ပုံမှန်စောင့်ကြည့်ကြပ်မတ်လျက်ရှိပြီး အဏုဇီဝပိုးမွှားများ၊ ဓာတုအကြွင်းအကျန်များနှင့် ဓာတုပစ္စည်းပါဝင်မှုများကို စမ်းသပ်စစ်ဆေးရန် ဓာတ်ခွဲခန်းနမူနာများကိုလည်း ပုံမှန်ရယူစစ်ဆေးလျက်ရှိကြောင်း သိရပါသည်။ ပြည်တွင်းဈေးကွက်အတွင်း ရေထွက်ကုန်များကို စောင့်ကြည့်ကြပ်မတ်နိုင်ရန် ရေကြောင်းရေးရာနှင့် ငါးလုပ်ငန်းဝန်ကြီးဌာနသည် အစားအစာနှင့် ဆေးဝါးစောင့်ကြည့်စစ်ဆေးရေးအေဂျင်စီ (BPOM) နှင့် ပူးပေါင်းဆောင်ရွက်လျက်ရှိကြောင်း သိရှိရပါသည်။
Antara News
DOCA (ရန်ကုန်)