တရုတ်နိုင်ငံသည် စံချိန်စံညွှန်းမြင့်မားသော တံခါးဖွင့်ဝါဒကို ပိုမိုတိုးချဲ့ဆောင်ရွက်လျက်ရှိရာ လက်ရှိတွင် နိုင်ငံပေါင်း ၆၃ နိုင်ငံအတွက် အခွန်ကင်းလွတ်ခွင့်မူဝါဒများကို ခွင့်ပြုပေးထားပြီး ဖြစ်ကြောင်း အကောက်ခွန်အရာရှိတစ်ဦးက ဇူလိုင်လ ၂၂ ရက်နေ့တွင် ပြောကြားခဲ့ကြောင်း သိရသည်။
အကောက်ခွန်အထွေထွေအုပ်ချုပ်မှုအာဏာပိုင်အဖွဲ့ (GAC) ၏ အကြီးအကဲ Sun Meijun က သတင်းစာရှင်းလင်းပွဲတစ်ခုတွင် ၂၀၂၆-၂၀၃၀ ကာလအတွင်း အကောက်ခွန်အာဏာပိုင်အဖွဲ့အနေဖြင့် မတူကွဲပြားသော ဈေးကွက်များကို ဆက်လက်တိုးချဲ့သွားမည်ဟု ပြောကြားခဲ့သည်။ ပြီးခဲ့သည့် မေလတွင် တရုတ်နိုင်ငံသည် မိမိနှင့် သံတမန်ဆက်ဆံရေးရှိသည့် အာဖရိက ၅၃ နိုင်ငံစလုံးမှ တင်သွင်းကုန်ပစ္စည်းများအပေါ် တိုးချဲ့ထားသော အခွန်ကင်းလွတ်ခွင့် ပေးအပ်ခြင်းကို စတင် အကောင်အထည်ဖော်ခဲ့ကြောင်း သိရသည်။
ယင်းမူဝါဒကို လွယ်ကူချောမွေ့စေရန်အတွက် GAC အနေဖြင့် ဘေးအန္တရာယ်အပေါ် အခြေခံသည့် အကောက်ခွန်စီမံခန့်ခွဲမှု၊ ပေါင်းစပ်ဈေးကွက်ဝင်ရောက်မှု လုပ်ထုံးလုပ်နည်းများနှင့် စိုက်ပျိုးရေး/အစားအသောက်ထုတ်ကုန်များအတွက် Green Channels များ တိုးချဲ့ခြင်း အပါအဝင် လုပ်ဆောင်ချက်များကို မိတ်ဆက်ဆောင်ရွက်ခဲ့ကြောင်း Sun Meijun ၏ ပြောကြားချက်အရ သိရသည်။ ၂၀၂၆ ခုနှစ် ပထမနှစ်ဝက်အတွင်း တရုတ်နှင့် အာဖရိက ကုန်သွယ်မှုသည် ယခင်နှစ်ကာလတူထက် ၁၉.၆ ရာခိုင်နှုန်း တိုးတက်လာခဲ့ကြောင်း သိရသည်။
အနာဂတ်ကို မျှော်ကြည့်လျှင် အကောက်ခွန်အာဏာပိုင်အဖွဲ့သည် တံခါးဖွင့်ရေး လုပ်ဆောင်ချက်များနှင့် စံချိန်စံညွှန်းမြင့်မားသော ကုန်သွယ်ရေးသဘောတူညီချက်များ အကောင်အထည်ဖော်မှုကို တိုးမြှင့်ဆောင်ရွက်သွားမည်ဖြစ်ပြီး၊ အကောက်ခွန်လုပ်ထုံးလုပ်နည်းများ၊ သီးခြား ကန့်သတ်စစ်ဆေးခြင်း (Quarantine) နှင့် မူရင်းဒေသဆိုင်ရာ စည်းမျဉ်းများ (Rules of Origin) တွင် ကိုက်ညီဆီလျော်မှု ပိုမိုကောင်းမွန်အောင် ပြုလုပ်သွားမည်ဖြစ်ကြောင်း Sun Meijun က ပြောကြားခဲ့ကြောင်း သိရှိရပါသည်။
Source : Xinhua
DOCA (ရန်ကုန်)