မွန်ပြည်နယ်၊ ကျိုက်ထိုခရိုင်၊ စားသုံးသူရေးရာဦးစီးဌာနမှ ခရိုင်တာဝန်ခံနှင့် မြို့နယ် တာဝန်ခံတို့သည် ခရိုင်စီမံခန့်ခွဲရေးနှင့် အုပ်ချုပ်ရေးကော်မတီဥက္ကဌ၏ ကြီးကြပ်မှုဖြင့် ရေနံ နှင့် ရေနံထွက်ပစ္စည်းများဆိုင်ရာ လုပ်ငန်းများကြီးကြပ်ရေးကော်မတီ အဖွဲ့ဝင်များနှင့် ပူးပေါင်း၍ ၂၈.၇.၂၀၂၆ ရက်နေ့ မွန်းလွဲ (၁:၀၀) နာရီအချိန်တွင် ကျိုက်ထိုမြို့နယ်အတွင်းရှိ စက်သုံးဆီအရောင်းဆိုင်များသို့ သွားရောက်ကာ ကွင်းဆင်းစစ်ဆေးကြည့်ရှုခဲ့ကြောင်း သိရသည်။
ထိုသို့ ကွင်းဆင်းစစ်ဆေးရာတွင် စက်သုံးဆီအရောင်းဆိုင်များအနေဖြင့် တိုင်ကီ လှောင်ဆီလက်ကျန်အခြေအနေများ၊ သတ်မှတ်ရည်ညွှန်းဈေးနှုန်းအတိုင်း ရောင်းချခြင်း ရှိ/မရှိ၊ ဈေးနှုန်းဆိုင်းဘုတ်များ တင်ဒါပြသထားခြင်း ရှိ/မရှိ၊ ဆီပြတ်လပ်မှုမရှိဘဲ ပုံမှန် ဖြန့်ဖြူးရောင်းချပေးနေခြင်း ရှိ/မရှိနှင့် စုံ/မစနစ်ဖြင့် ရောင်းချခြင်း ရှိ/မရှိအား စိစစ် စစ်ဆေး ခဲ့ကြသည်။
ထို့အပြင် စက်သုံးဆီအရောင်းဆိုင်ပိုင်ရှင်များနှင့် တာဝန်ရှိသူများအား စက်သုံးဆီများ အား ဈေးနှုန်းမြှင့်တင်ရောင်းချခြင်း၊ ဆီသိုလှောင်ရောင်းချခြင်းများ မပြုလုပ်ကြရန်နှင့် မိဘ ပြည်သူများ အဆင်ပြေချောမွေ့စွာ ဝယ်ယူသုံးစွဲနိုင်ရေးအတွက် သတ်မှတ်စည်းကမ်းချက် များနှင့်အညီ စနစ်တကျ ဖြန့်ဖြူးရောင်းချပေးရန် ပူးပေါင်းအဖွဲ့က မှာကြားခဲ့ကြောင်း သတင်းရရှိပါသည်။
DOCA (မွန်)