အိန္ဒိယနိုင်ငံ၏ ပဲမျိုးစုံတင်သွင်းမှုသည် ၂၀၂၆ ခုနှစ်၏ ပထမ ၆ လအတွင်း အနည်းငယ် ကျဆင်းခဲ့ပြီး တန်ချိန် ၃၁.၈၀ သိန်း ရှိခဲ့သည်။ ယခင်နှစ် ကာလတူတွင် တန်ချိန် ၃၂.၂၇ သိန်း တင်သွင်းခဲ့သဖြင့် ယခုနှစ်တွင် ၁.၄၆ ရာခိုင်နှုန်း ကျဆင်းခဲ့ခြင်းဖြစ်ကြောင်း၊ ယင်းကျဆင်းမှုမှာ ကုလားပဲနှင့် မတ်ပဲ တင်သွင်းမှုများ လျော့ကျခဲ့ခြင်းကြောင့်ဖြစ်ပြီး ပဲစင်းငုံ၊ ပဲနီနှင့် ပဲဝါတင်သွင်း မှုများမှာ အဆိုပါကာလအတွင်း တိုးမြင့်လာခဲ့ကြောင်း အိန္ဒိယနိုင်ငံ ပဲမျိုးစုံနှင့် ကောက်ပဲသီးနှံများ အသင်း (IPGA) က ထုတ်ပြန်ခဲ့သော ဈေးကွက် အခြေအနေသုံးသပ်ချက်တွင် ဖော်ပြထားသည်။
ဇန်နဝါရီလမှ ဇွန်လအတွင်း ပဲစင်းငုံတင်သွင်းမှုသည် ၄၃.၃၄ ရာခိုင်နှုန်း တိုးမြင့်ခဲ့ပြီး တန်ချိန် ၅.၀၅ သိန်းကျော် တင်သွင်းခဲ့ရာ တင်သွင်းမှုအများစုမှာ အာဖရိကနိုင်ငံများဖြစ်သည့် မိုဇမ်ဘစ်၊ တန်ဇန်းနီးယားနှင့် ဆူဒန်စသည့် နိုင်ငံများမှ ဖြစ်သည်။ အဆိုပါကာလအတွင်း အိန္ဒိယ နိုင်ငံသို့ ပဲစင်းငုံတင်ပို့မှုတွင် မိုဇမ်ဘစ်သည် အများဆုံးဖြစ်ပြီး တန်ချိန် ၁.၈၃ သိန်းကျော်ဖြင့် ထိပ်ဆုံးမှ ရပ်တည်ခဲ့သည်။ ၎င်းနောက် မြန်မာနိုင်ငံက တန် ၁.၂၃ သိန်းကျော်၊ တန်ဇန်းနီးယားက တန် ၁.၀၁ သိန်းကျော် နှင့် ဆူဒန်က တန်ချိန် ၄၉,၀၄၉ ခန့် တင်ပို့ခဲ့သည်။
မတ်ပဲတင်သွင်းမှုသည် ယခုနှစ် ပထမနှစ်ဝက်အတွင်း ၁၉ ရာခိုင်နှုန်း ကျဆင်းခဲ့သည်။ ပုံမှန်အဓိကတင်ပို့သူဖြစ်သည့် မြန်မာနိုင်ငံသည် အများဆုံးပမာဏဖြစ်သော တန် ၂.၇၈ သိန်း ဖြင့် အဓိကတင်ပို့သူအဖြစ် ရပ်တည်ခဲ့သည်။ ၎င်းနောက်တွင် ဘရာဇီးက တန်ချိန် ၃၉,၃၀၉ နှင့် ထိုင်း နိုင်ငံက တန်ချိန် ၁၁,၄၄၈ ကျော် တင်ပို့ခဲ့သည်။
ပဲနီတင်သွင်းမှုမှာ ၂၀၂၆ ခုနှစ် ဇန်နဝါရီလမှ ဇွန်လအတွင်း ၅၁.၅၈ ရာခိုင်နှုန်း တိုးမြင့်ခဲ့ပြီး တန် ၉.၆၃ သိန်း ရှိခဲ့သည်။ ယခင်နှစ် အလားတူကာလတွင် တန်ချိန် ၆.၃၅ သိန်းသာ တင်သွင်း ခဲ့သည်။ ပဲနီတင်သွင်းမှုတွင် ကနေဒါက တန်ချိန် ၅.၁၀ သိန်းကျော်ဖြင့် အများဆုံးတင်ပို့သူ ဖြစ်သည်။ ၎င်းနောက်တွင် ဩစတြေးလျက တန်ချိန် ၄.၁၇ သိန်းကျော် နှင့် ရုရှားက တန်ချိန် ၂၂,၉၃၈ တင်ပို့ ခဲ့သည်။
ကုလားပဲတင်သွင်းမှုမှာ အဆိုပါကာလအတွင်း ၄၅ ရာခိုင်နှုန်းကျော် သိသိသာသာ ကျဆင်း ခဲ့သည်။ ယင်းမှာ ဩစတြေးလျနိုင်ငံမှ တင်ပို့မှုများ နှေးကွေးသွားခြင်းကြောင့်ဖြစ်သည်။ သို့သော် ဩစတြေးလျသည် အိန္ဒိယနိုင်ငံသို့ ကုလားပဲတင်ပို့မှုတွင် အကြီးဆုံးတင်ပို့သူအဖြစ် ဆက်လက်ရှိနေ ပြီး တန်ချိန် ၆.၀၃ သိန်းကျော် တင်ပို့ခဲ့သည်။ တန်ဇန်းနီးယားသည် ဒုတိယအကြီးဆုံး တင်သွင်း သည့်နိုင်ငံဖြစ်ပြီး တန်ချိန် ၂၈,၇၄၃ ခန့် တင်ပို့ခဲ့သည်။ ၎င်းနောက်တွင် ဗြိတိန်၊ မြန်မာ နိုင်ငံနှင့် အခြားနိုင်ငံများ ပါဝင်သည်ဟု အချက်အလက်များအရ သိရသည်။ ယခုကာလအတွင်း ကုလားပဲ တင်သွင်းမှုကျဆင်းရခြင်းမှာ ပြည်တွင်းဈေးနှုန်းများ ကျဆင်းနေခြင်းနှင့် နိုင်ငံတကာ ဈေးနှုန်းများ မြင့်တက်နေခြင်းတို့ကြောင့် ဖြစ်ကြောင်း Igrain India မှ ပြောကြားခဲ့သည်။ ထူးခြားချက်အနေဖြင့် ပဲဝါတင်သွင်းမှုမှာ အဆိုပါကာလအတွင်း ၁၇ ရာခိုင်နှုန်း တိုးမြင့်ခဲ့သည်။ ကနေဒါနိုင်ငံက တန်ချိန် ၅.၇ သိန်းကျော်ဖြင့် အဓိကတင်ပို့သူအဖြစ် ရပ်တည်ခဲ့သည်။ ရုရှားနိုင်ငံသည် အဆိုပါကာလအတွင်း အခြားသော ပဲဝါအဓိကတင်ပို့သည့် နိုင်ငံတစ်နိုင်ငံ ဖြစ်သည်။
Source : The Hindu Businesslines, 17 August 2026(လယ်ယာထွက်ကုန်များနှင့် အဓိကသွင်းကုန်များ၏ နိုင်ငံတကာဈေးကွက်စောင့်ကြည့်လေ့လာရေးအဖွဲ့)