(၇၅)နှစ်မြောက်၊ စိန်ရတုလွတ်လပ်ရေးနေ့ အခမ်းအနားသို့ သွားရောက်မည့် ကယားပြည်နယ် ကိုယ်စားပြုအဖွဲ့ဝင်များအား ချီးမြှင့်ငွေပေးအပ်ခြင်း အခမ်းအနားကို ၂၀၂၂ ခုနှစ်၊ ဒီဇင်ဘာလ(၂၀)ရက်နေ့၊ နံနက် (၁၀) နာရီအချိန်တွင် ကယားပြည်နယ် အစိုးရအဖွဲ့ရုံး၌ ကျင်းပပြုလုပ်ခဲ့သည်။
ရှေးဦးစွာပြည်နယ်ဝန်ကြီးချုပ် ဦးဇော်မျိုးတင် က(၇၅)နှစ်မြောက်၊ စိန်ရတုလွတ်လပ်ရေး နေ့အတွက် ပြည်နယ်အနေဖြင့် ဂုဏ်ပြုအလှပြယာဉ်၊ ပြည်နယ်ကိုယ်စားပြုပြခန်း၊ ရိုးရာအစားအသောက်ပြခန်းနှင့် အမှတ်တရ ပစ္စည်းအရောင်းဆိုင် ၊ ပြည်နယ်ကိုယ်စားပြုအကအဖွဲ့စသည့် ကဏ္ဍများဖြင့် ပါဝင်ဆင်နွှဲ နိုင်ရန်နှင့် ပြည်နယ်ကိုယ်စားပြု တာဝန်ပေးအပ်ထားသူများအတွက် လိုအပ်သည့်ပြင်ဆင်မှုများ၊ အုပ်ချုပ်မှုကိစ္စရပ်များကို ပြည်နယ်အစိုးရအဖွဲ့မှ စနစ်တကျစီစဉ် ဆောင်ရွက်ပေးထားပြီးဖြစ်ကြောင်း၊ အုပ်ချုပ်ကြီးကြပ်သူများ၊ ဌာနဆိုင်ရာတာဝန်ရှိသူများနှင့် အကအဖွဲ့ဝင်များက သတ်မှတ်စည်းကမ်းများ ကိုအထူးလိုက်နာပြီး မိမိတို့၏ ကျန်းမာရေးကို ဂရုပြုကြရမည်ဖြစ်ကြောင်း၊ ပြည်နယ်အနေဖြင့်ဂုဏ်ယူရမည့် လုပ်ငန်းတစ်ခုဖြစ်၍ သက်ဆိုင်ရာ ကဏ္ဍများအလိုက် မိမိတို့၏တာဝန်များကို အောင်မြင်အောင်ဆောင်ရွက်သွားကြရမည်ဖြစ်ကြောင်း ပြောကြားခဲ့သည်။
ထို့နောက် ပြည်နယ်ဝန်ကြီးချုပ်က ကယားပြည်နယ်ဂုဏ်ပြုယာဉ်အဖွဲ့၊ ပြခန်း၊ ရိုးရာအစားအသောက်နှင့် ဒေသထွက်ကုန်ပစ္စည်းများအရောင်းပြခန်းနှင့် ဂုဏ်ပြုဖျော်ဖြေ တင်ဆက်မည့်အကအဖွဲ့များအား ချီးမြှင့်ငွေများပေးအပ်ရာ တာဝန်ရှိသူများက လက်ခံရယူခဲ့ကြသည်။
ယင်းနောက် ပြည်နယ်ဝန်ကြီးချုပ်နှင့် တာဝန်ရှိသူများက (၇၅)နှစ်မြောက်၊ စိန်ရတု လွတ်လပ်ရေးနေ့အခမ်းအနားသို့ သွားရောက်မည့် ကယားပြည်နယ် ကိုယ်စားပြု အကအဖွဲ့ဝင် များ၏ဝတ်စုံပြည့် လေ့ကျင့်ကပြဖျော်ဖြေတင်ဆက်မှုများကိုကြည့်ရှုအားပေးခဲ့ကြပြီး အုပ်ချုပ်သူများနှင့် အကအဖွဲ့ဝင်များအားရင်းရင်းနှီးနှီး တွေ့ဆုံနှုတ်ဆက်အားပေးစကား ပြောကြားခဲ့ကြောင်းသိရသည်။
DOCA(ကယား)