ကမ္ဘောဒီးယားဆန်စပါးအသင်းချုပ် (CRF)က စက်တင်ဘာလ ၇ ရက်နေ့တွင် ထုတ်ပြန် ခဲ့သည့် အစီရင်ခံစာအရ ၂၀၂၆ ခုနှစ် ပထမ၈လအတွင်း ကမ္ဘောဒီးယား၏ ကြိတ်ခွဲပြီးဆန် တင်ပို့ မှုသည် ယခင်နှစ်ကာလတူက တန်ချိန် ၄၇၂,၈၀၃ ရှိရာမှ ယခုနှစ်တွင် တန်ချိန် ၇၉၂,၂၁၂ သို့ ရောက်ရှိကာ ၆၇.၅ ရာခိုင်နှုန်း မြင့်တက်ခဲ့သည်။
အဆိုပါတင်ပို့မှုများမှ အမေရိကန်ဒေါ်လာ ၄၆၄ သန်း ဝင်ငွေရရှိခဲ့ပြီး ၂၀၂၅ ခုနှစ် ပထမ ၈ လအတွင်း မှတ်တမ်းတင်ခဲ့သော ဒေါ်လာ ၃၄၈ သန်းနှင့် နှိုင်းယှဉ်ပါက ၃၃ ရာခိုင်နှုန်းတိုးလာခြင်း ဖြစ်သည်။ CRFက အဆိုပါကာလအတွင်း ကုမ္ပဏီ ၆၁ ခုသည် ကြိတ်ခွဲပြီးဆန်ကို နိုင်ငံနှင့် ဒေသ ပေါင်း ၆၆ ခုသို့ တင်ပို့ခဲ့ကြောင်း ပြောကြားခဲ့သည်။
ဥရောပသမဂ္ဂသည် ဆန်တန်ချိန် ၂၃၂,၃၁၉ တင်သွင်းခဲ့ပြီး အဆိုပါပမာဏသည် ကမ္ဘော ဒီးယား၏ ကြိတ်ခွဲပြီးဆန် စုစုပေါင်းတင်ပို့မှု၏ ၂၉.၃ ရာခိုင်နှုန်း ပါဝင်ကြောင်း၊ တရုတ်နှင့် ၎င်း၏ ကိုယ်ပိုင်အုပ်ချုပ်ခွင့်ရဒေသများသည် ဆန်တန်ချိန် ၁၇၇,၇၈၃ (၂၂.၄ရာခိုင်နှုန်း) ဝယ်ယူခဲ့ကြောင်း၊ တစ်ချိန်တည်းတွင် အာဆီယံအဖွဲ့ဝင်နိုင်ငံ ၅ နိုင်ငံသို့ ဆန်တန်ချိန် ၃၁၅,၀၈၈ တင်ပို့ခဲ့ပြီး ကျန်ရှိ သည့် ဆန်တန်ချိန် ၆၇,၀၂၂ မှာ အာဖရိက၊ အရှေ့အလယ်ပိုင်းနှင့် အခြားဈေးကွက်များရှိ နေရာ ၂၅ ခုသို့ တင်ပို့ခဲ့ကြောင်း သိရှိရသည်။
CRFက ကမ္ဘောဒီးယားနိုင်ငံ၏ ပို့ကုန်ပမာဏ သိသိသာသာ တိုးလာခြင်းသည် ကမ္ဘောဒီးယား ဆန်၏ ယှဉ်ပြိုင်နိုင်သော အရည်အသွေးကို ထင်ဟပ်စေပြီး ထောက်ပံ့ရေးကွင်းဆက်များ ချောမွေ့ စေရန်အတွက် တောင်သူများ၊ ပို့ကုန်လုပ်ငန်းရှင်များနှင့် အစိုးရအာဏာပိုင်များအကြား ပိုမို ကောင်းမွန်သော ပူးပေါင်းဆောင်ရွက်မှုကိုလည်း ရောင်ပြန်ဟပ်ကြောင်း ပြောကြားခဲ့သည်။
CRF ဥက္ကဋ္ဌ Lay Chhun Hour က ပြည်တွင်းဆန်စပါးသိုလှောင်မှု လုံလောက်စွာ ရှိနေခြင်း နှင့် ဈေးကွက်များတွင် ဝယ်လိုအားကောင်းလာခြင်းတို့ကြောင့် ပို့ကုန်များတိုးလာခြင်းဖြစ်ကြောင်း၊ ကမ္ဘောဒီးယားအစိုးရသည် တစ်နှစ်လျှင် ကြိတ်ခွဲပြီးဆန်တန်ချိန် ၁ သန်း တင်ပို့ ရန် ရည်မှန်းချက် ချမှတ်ထားကြောင်း၊ သက်ဆိုင်ရာအဖွဲ့အစည်းများနှင့် ကမ္ဘောဒီးယားဆန်စပါးအသင်းချုပ်တို့ အကြား ပိုမိုခိုင်မာသော ပူးပေါင်းဆောင်ရွက်မှုများမှတစ်ဆင့် အဆိုပါ ရည်မှန်းချက်ကို ပြည့်မီနိုင် သည် သို့မဟုတ် ကျော်လွန်နိုင်ကြောင်း၊ ယခုနှစ်ပို့ကုန်များအတွက် နှစ်အစပိုင်းကတည်းက ကောင်းမွန်သော စွမ်းဆောင်ရည်ဖြင့် ရည်မှန်းချက်ကို ပြည့်မီနိုင်မည်ဟု မျှော်လင့်ကြောင်း ပြော ကြားခဲ့သည်။
ရနံ့မွှေးဆန်သည် စုစုပေါင်းပို့ကုန်၏ ၅၈ ရာခိုင်နှုန်းနီးပါး ပါဝင်ပြီး ၎င်းနောက်တွင် ဆန်လုံး ရှည်က ၂၄.၄ ရာခိုင်နှုန်း၊ ဆန်ကွဲက ၁၄.၃ ရာခိုင်နှုန်းနီးပါး အသီးသီးပါဝင်ကြောင်း၊ ကမ္ဘောဒီးယား သည် အဆိုပါကာလအတွင်း ဗီယက်နမ်သို့ ဆန်စပါးတန်ချိန် ၃.၃၅ သန်း တင်ပို့ခြင်းဖြင့် အမေရိကန် ဒေါ်လာ ၇၅၃ သန်း ရရှိခဲ့ကြောင်း သိရှိရသည်။
ဆန်စပါးကဏ္ဍအတွက် ဘဏ္ဍာငွေ အမေရိကန်ဒေါ်လာ သန်း ၆၀၀ ခန့် လိုအပ်ကြောင်း၊ အစိုးရမှ ကျောထောက်နောက်ခံပြုသော စိုက်ပျိုးရေးနှင့် ကျေးလက်ဖွံ့ဖြိုးရေးဘဏ်က ဒေါ်လာ သန်း ၂၀၀ ကတိပြုထားပြီး ပုဂ္ဂလိကဘဏ်များကမူ ထောက်ပံ့ရေးကွင်းဆက်များ တည်ငြိမ်စေရန် နှင့် နိုင်ငံ၏ တစ်နှစ်လျှင် ကြိတ်ခွဲပြီးဆန်တန်ချိန် ၁ သန်း တင်ပို့ရန် ရည်မှန်းချက်ကို ပံ့ပိုးရန်အတွက် နောက်ထပ်ရန်ပုံငွေများ ထည့်ဝင်ရန် မျှော်လင့်ထားကြောင်း သိရှိရသည်။
Source: Khmer Times, September 8, 2026(လယ်ယာထွက်ကုန်များနှင့် အဓိကသွင်းကုန်များ၏ နိုင်ငံတကာဈေးကွက်စောင့်ကြည့်လေ့လာရေးအဖွဲ့)