အင်ဒိုနီးရှားစိုက်ပျိုးမွေးမြူရေးဝန်ကြီး Andi Amran Sulaiman က အနောက်ဂျာဗား ပြည်နယ် Subang ခရိုင်ရှိ အင်ဒိုနီးရှား ဆန်စပါးစိုက်ပျိုးရေး ခေတ်မီဖွံ့ဖြိုးတိုးတက်ရေးဗဟိုဌာန (BRMP Padi) မှထုတ်လုပ်သည့် အထွက်နှုန်းမြင့်စပါးမျိုးများသည် တစ်ဟက်တာလျှင် ဆန်စပါး တန်ချိန် ၁၀ တန်မှ ၁၃ တန်အထိ ထွက်ရှိနိုင်ကြောင်း ပြောကြားခဲ့ပါသည်။ ထိုစပါးမျိုးများကို အင်ဒိုနီးရှားတစ်နိုင်ငံလုံးတွင် အကြီးအကျယ်တိုးချဲ့အသုံးပြုသွားမည်ဖြစ်ကြောင်း Amran က စက်တင်ဘာလ ၂ ရက်နေ့တွင် BRMP Padi စက်ရုံ၌ စပါးမျိုးစေ့ထုတ်လုပ်မှုကို သွားရောက် စစ်ဆေးစဉ် ပြောကြားခဲ့ပါသည်။ Subang မြို့ရှိ စပါးမျိုးစေ့ထုတ်လုပ်ရေးဗဟိုဌာနသည် အရှေ့ တောင်အာရှတွင် အကြီးဆုံးစပါးမျိုးစေ့ထုတ်လုပ်ရေးဌာနဖြစ်ပြီး တစ်နှစ်လျှင် စပါးမျိုးစေ့တန်ချိန် ၂၅၀ အထိထုတ်လုပ်နိုင်ကြောင်း Amran က ပြောကြားခဲ့ပါသည်။ BRMP Padi မှ ထုတ်လုပ်သည့် စပါးမျိုးများသည် တစ်ဟက်တာလျှင် တန်ချိန် ၁၀ တန်မှ ၁၃ တန်အထိ အထွက်နှုန်းရရှိနိုင်သဖြင့် နိုင်ငံ၏စားနပ်ရိက္ခာဖူလုံရေးကိုထိန်းသိမ်းနိုင်ရန် ဆက်လက်ဖွံ့ဖြိုးတိုးတက်ရေး ဆောင်ရွက်သင့် ကြောင်း ၎င်းကဆိုပါသည်။ အဆိုပါဗဟိုဌာနတွင် မိုးရာသီနှင့် နွေရာသီအပါအဝင် ရာသီဥတု အခြေအနေအမျိုးမျိုးနှင့် သင့်လျော်သည့်စပါးမျိုးစေ့များအပြင် မိုးခေါင်ရေရှားမှုကို ခံနိုင်ရည် ရှိသည့် စပါးမျိုးများကိုလည်းထုတ်လုပ်လျက်ရှိကြောင်း သိရပါသည်။ အင်ဒိုနီးရှားစိုက်ပျိုးမွေးမြူ ရေးဝန်ကြီးဌာနသည် လာမည့်နှစ်တွင် စိုက်ပျိုးမြေ ဟက်တာအနည်းဆုံး ၁ သန်းအတွက် ထောက်ပံ့ကြေးဖြင့် စပါးမျိုးစေ့များဖြန့်ဝေပေးရန်စီစဉ်ထားကြောင်း ယခင်ကထုတ်ပြန်ခဲ့ပါသည်။ ယင်းအစီအစဉ်သည် စပါးအထွက်နှုန်းတိုးမြှင့်ရန်နှင့် တောင်သူများအနေဖြင့် ခေတ်မီစိုက်ပျိုးရေး စနစ်ဖြစ်သည့် PM-AAS သို့ ပြောင်းလဲကျင့်သုံးလာစေရန် ရည်ရွယ်ခြင်းဖြစ်ကြောင်း သိရပါသည်။လာမယ့်နှစ်တွင် အနည်းဆုံး ဟက်တာ ၁ သန်းအတွက် စပါးမျိုးစေ့များ ထောက်ပံ့ပေးနိုင်ရန် ဘတ်ဂျက်ခွဲဝေသတ်မှတ်သွားမည်ဖြစ်ကြောင်း Amran က ပြောကြားခဲ့ပါသည်။ စပါးမျိုးစေ့ ထောက်ပံ့ပေးခြင်းသည် တောင်သူများအား PM-AAS ခေတ်မီစိုက်ပျိုးရေးစနစ်ကို အသုံးပြုလာ စေရန်ရည်ရွယ်ခြင်းဖြစ်ပြီး ယင်းစနစ်ကိုအသုံးပြုခြင်းဖြင့် ယခင်က တစ်ဟက်တာလျှင် တန်ချိန် ၅ တန်မှ ၆ တန်သာထွက်ရှိရာမှ တန်ချိန် ၁၁ တန်မှ ၁၂ တန်အထိ အထွက်နှုန်း တိုးတက် လာနိုင်ကြောင်း ၎င်းကဆိုပါသည်။ စိုက်ပျိုးမြေ ဟက်တာ ၁ သန်းအတွက် စပါးမျိုးစေ့များ ထောက်ပံ့ပေးခြင်းနှင့် ခေတ်မီစိုက်ပျိုးရေးနည်းလမ်းများကို အကောင်အထည်ဖော်ခြင်းတို့မှ တစ်ဆင့် အင်ဒိုနီးရှားနိုင်ငံရှိတောင်သူများ၏ လူမှုစီးပွားဘဝနှင့် လူနေမှုအဆင့်အတန်း ပိုမို ကောင်းမွန်လာစေရန် အထောက်အကူပြုနိုင်မည်ဖြစ်ကြောင်း Amran က ပြောကြားခဲ့ပါသည်။
DOCA (ရန်ကုန်)