စားသုံးသူရေးရာဦးစီးဌာန ၊ ပဲခူးတိုင်းဒေသကြီးဦးစီးမှူးရုံးမှ စားသုံးသူရေးရာဌာနခွဲတာဝန်ခံ ၊ ထုတ်ကုန်လုံခြုံစိတ်ချရမှု ဌာနခွဲတာဝန်ခံတို့ပါဝင်သော ပူးပေါင်းအဖွဲ့သည် အစားအသောက်နှင့် ဆေးဝါးကွပ်ကဲရေးဦးစီးဌာန ၊ ပဲခူးတိုင်းဒေသကြီးဦးစီးမှူး နှင့်အတူ ၊ ၂၀၂၂ ခုနှစ် ၊ ဒီဇင်ဘာလ ၊ ၂၆ ရက်နေ့ ၊ နေ့လယ်ပိုင်းတွင် ပဲခူးတက္ကသိုလ်အတွင်း ရောင်းချသော အစားအသောက် ဈေးဆိုင်တန်းများတွင် ရောင်းချနေမှုအခြေအနေများတွင် ကျန်းမာရေးနှင့်ညီ /မညီ ၊ အစားအသောက် ရောင်းချ ရာတွင် သန့်ရှင်းမှု ရှိ/မရှိ နှင့် အစားအသောက်တွင် အသုံးပြုရသော ကုန်ပစ္စည်းများတွင် ကုန်အညွှန်းအမှတ်အသား ပါဝင်ခြင်း ရှိ/မရှိ ပူးပေါင်း၍ ဈေးကွက် စောင့်ကြည့်စစ်ဆေးခဲ့ပါသည်။
အစားအသောက်ရောင်းချသော ဆိုင်ပိုင်ရှင်များအနေဖြင့် အစားအသောက်တွင် အသုံးပြုရသော ကုန်ကြမ်းပစ္စည်းများ ဝယ်ယူအသုံးပြုရာတွင် စားသုံးသူများ ဘေးအန္တရာယ်ကင်းရှင်းရေး နှင့် လုံခြုံ စိတ်ချရမှု ရှိစေရေးတို့အတွက် စားသုံးသူကာကွယ်ရေး ဥပဒေ အခန်း (၁၈) ပါ ကုန်အညွှန်းအမှတ် အသား ပြည့်စုံစွာ ဖော်ပြထားသော ကုန်စည်များကိုသာ ဝယ်ယူ၍ အသုံးပြုကြရန် ၊ ကုန်စည်အမျိုး အစားအလိုက် သတ်မှတ်ချက်များနှင့်အညီ ပါဝင်ရမည့် ကုန်အညွှန်းအမှတ်အသား အသေးစိတ် ညွှန်ကြားချက်များကို ဆိုင်ပိုင်ရှင်များအား ဖြန့်ဝေခဲ့ပြီး အစားအသောက်နှင့် ဆေးဝါးကွပ်ကဲရေးဦးစီးဌာနမှ အစားအသောက်နမူနာများ ရယူ၍ စစ်ဆေးခဲ့ကြောင်း သိရှိရပါသည်။
DOCA(ပဲခူး)