မန္တလေးတိုင်းဒေသကြီး၊ညောင်ဦးခရိုင်၊ညောင်ဦးမြို့တွင် ၁၀.၁.၂၀၂၃ ရက်နေ့နံနက် ၁၀:၀၀ နာရီအချိန်၌ ခရိုင်စားသုံးသူရေးရာဦးစီးဌာနမှဦးဆောင်၍ သက်ဆိုင်ရာဌာနများပါဝင်သော ပူးပေါင်းအဖွဲ့ဖြင့် ညောင်ဦးမြို့ပေါ်ရှိ ဆေးဝါးရောင်းချသောဆေးဆိုင်များနှင့် ဓာတ်မြေဩဇာအရောင်းဆိုင်များအား ဈေးကွက်စောင့်ကြည့်စစ်ဆေးမှုများ ပြုလုပ်ခဲ့ပါသည်။
စားသုံးသူရေးရာဦးစီးဌာန၊ညောင်ဦးခရိုင်ဦးစီးမှူး ဦးသန်းစိုးနှင့် ပူးပေါင်းအဖွဲ့သည် ဆေးဆိုင်များမှ တာဝန်ရှိသူများအား Diclon-M Tablet(Diclfenac Sodium 500mg, Paracetamol 500g) ဆေးဝါးမှာ New Magnate Co; ltd မှ ဆေးဝါးမှတ်ပုံတင်၍ တရားဝင်ရောင်းချဖြန့်ဖြူးလျက်ရှိသော ဆေးဝါးတစ်မျိုးဖြစ်ပါကြောင်းနှင့်အဆိုပါ Diclon-M ပုံစံတူဆေးဝါးများကို မှတ်ပုံတင်ထားခြင်းမရှိပဲ တရားမဝင်တင်သွင်းပြီး ဈေးကွက်အတွင်းရောင်းချမှုများရှိနေသဖြင့် ကွင်းဆင်းစစ်ဆေးမှုများ ပြုလုပ်လျက်ရှိပါကြောင်း၊ မှတ်ပုံတင်ထားခြင်းမရှိသော တရားမဝင်ဆေးဝါးများ၊ သက်တမ်းလွန် ဆေးဝါးများ ရောင်းချမှုများမပြုရန် အသိပေးရှင်းလင်းခဲ့ပြီး၊ အဆိုပါဆေးများ ရောင်းချမှုရှိမရှိ ဆေးဆိုင်များအား လှည့်လည်၍ ဈေးကွက်စောင့်ကြည့်စစ်ဆေးခဲ့ပါသည်။
ဆက်လက်၍ ပူးပေါင်းအဖွဲ့သည် ဓာတ်မြေဩဇာအရောင်းဆိုင်များသို့သွားရောက်ပြီး ဈေးကွက်အတွင်းတွင် ဈေးနှုန်းသက်သာသော အရည်အသွေးနိမ့်မြေဩဇာများကို ထိုင်းနိုင်ငံပြည်တွင်းသုံး မြင်းပျံတံဆိပ်အိတ်ခွံများဖြင့် ပြန်လည်ထုပ်ပိုးပြီး အိုင်ပီစီ မြင်းပျံဓာတ်မြေဩဇာအတုများ ပြုလုပ်ရောင်းချနေမှု ရှိမရှိ၊ စိုက်ပျိုးရေးတောင်သူများနစ်နာဆုံးရှုံးမှုမရှိစေရန်၊ သက်ဆိုင်ရာဌာန များ၏ထောက်ခံချက်များ၊ ကုန်အညွှန်းအမှတ်အသားများအား မြန်မာဘာသာဖြင့် ထည့်သွင်းဖော်ပြထားသော ကုန်ပစ္စည်းများကိုသာ ရောင်းချစေရေး ကွင်းဆင်းစစ်ဆေးမှုများပြုလုပ်ခဲ့ပြီး၊ လုပ်ငန်းရှင်များအား စာသုံးသူကာကွယ်ရေးဥပဒေပါ စီးပွားရေးလုပ်ငန်းရှင်၏ တာဝန်များ၊ တားမြစ်ချက်များ၊ ပြစ်မှုနှင့်ပြစ်ဒဏ်များအား ရှင်းလင်းပြောကြားခဲ့ကြောင်း သိရှိရပါသည်။
DOCA(မန္တလေး)
စောသန်းအောင်