စားသုံးသူရေးရာဦးစီးဌာန၊ ဖျာပုံခရိုင်၊ဘိုကလေးမြို့နယ်၊ မြို့နယ်တာဝန်ခံနှင့်ဝန်ထမ်းတို့သည် ၂၀၂၂ခုနှစ်၊ဇန်နဝါရီလ(၁၅)ရက်နေ့၊နံနက်(၀၉:၀၀)နာရီအချိန်တွင် ဘိုကလေးမြို့၊ညီနောင်ဝ ကျေးရွာရှိ တိုးတက်လင်းဆန်စက်သို့ သွားရောက်၍ ဆန်စက်လုပ်ငန်းများဖွံ့ဖြိုးတိုးတက်စေရေးနှင့် စပါးဝယ်ယူမှုအခြေအနေ၊ ဆန်ကြိတ်ခွဲတင်ပို့မှုအခြေအနေ၊ ဈေးနှုန်း/ဈေးကွက်အခြေအနေများနှင့် စပါးခွံမီးသွေးတောင့်ထုတ်လုပ်ဖြန့်ဖြူးနေမှုနှင့် ဈေးနှုန်းဈေးကွက်အခြေအနေများအား ကွင်းဆင်း စစ်ဆေးခဲ့ကြပါသည်။
ထိုသို့ကွင်းဆင်းရာတွင်စပါးကြိတ်ခွဲရာမှထွက်ရှိလာသော စပါးခွံများအား စပါးခွံမီသွေးတောင့် လောင်စာအဖြစ် တစ်ပိုင်တစ်နိုင်လုပ်ကိုင်ဆောင်ရွက်လျက်ရှိပြီး ထင်းအစားထိုးလောင်စာတောင့်အဖြစ် ဈေးကွက်အတွင်း ထိုးဖောက်ဝင်ရောက်လျက် ရှိပါသည်။ တစ်နေ့ထုတ်လုပ်မှု ပိဿာချိန်(၂၀) အိတ်ရေ (၂၀၀)အိတ်ထွက်ရှိပြီးတစ်အိတ်လျှင် လက်လီလက်ကား(၅၀၀၀)ကျပ်နှုန်း ဖြင့်ရောင်း ချပါသည်။ အလုပ်သမား(၁၀)ဦးရှိပြီး နေ့ချိန်/ညချိန်ခွဲပြီး လုပ်ကိုင်လျက်ရှိပါသည်။ အလုပ်သမားခေါင်းဆောင်ကို တစ်လလျှင် (၂၅၀၀၀ဝိ/)ကျပ်ပေးရပြီး၊ ကျန်လူများကို(၂၂၀၀၀ဝိ/)ကျပ်ပေးပါသည်။ ဈေးကွက်အနေဖြင့် ဒေသတွင်းနှင့် ပင်လယ်ပိုင်းသို့ဖြန့်ဖြူးရောင်းချလျက်ရှိကြောင်း သိရပါသည်။
မြို့နယ်တာဝန်ခံက ပုဂ္ဂလိကလုပ်ငန်းများဖွံ့ဖြိုးတိုးတက်ရေးနှင့် ပုံမှန်ထုတ်လုပ်နိုင်ရေး၊ ဈေးကွက်များကျယ်ကျယ်ပြန့်ပြန့် ထိုးဖောက်ရောင်းချနိုင်ရေး၊ အလုပ်သမားများအလုပ်အကိုင် မပြတ်လပ်စေရေး၊ စားသုံးသူပြည်သူများသင့်တင့်မျှတသောဈေးနှုန်းဖြင့်ဝယ်ယူသုံးစွဲနိုင်ရေး၊ စွန့်ပစ် ပစ္စည်းများယခုကဲ့သို့တန်ဘိုးမြှင့်ထုတ်ကုန်များ ထုတ်လုပ်နိုင်ရေး၊ လုပ်ငန်းများတိုးချဲ့ရေးနှင့် စားသုံးသူကာကွယ်ရေးဥပဒေပါကုန်အညွှန်းအမှတ်အသားဖော်ပြချက်များအားရှင်းလင်းဆွေးနွေးခဲ့ကြောင်း သတင်းရရှိပါသည်။
DOCA(ဧရာဝတီ)