ပဲခူးတိုင်းဒေသကြီးအစိုးရအဖွဲ့၏ လမ်းညွှန်မှုဖြင့် စားသုံးသူပြည်သူများ စားဝတ်နေရေးအဆင်ပြေစေရန်ရည်ရွယ်၍ တောင်ငူခရိုင်၊ အုတ်တွင်းမြို့နယ် စီမံအုပ်ချုပ်ရေးအဖွဲ့သည် စားသုံးသူရေးရာဦးစီးဌာန၊ အုတ်တွင်းမြို့နယ်ဆန်စက်လုပ်ငန်းရှင်များနှင့်ပူးပေါင်း၍ ဇန်နဝါရီလ ၂၄ ရက်နေ့က ဆန်၊ စားအုန်းဆီ၊ သားငါးနှင့် ဟင်းသီးဟင်းရွက်များကို အုတ်တွင်းမြို့ပေါ်ရှိ ရပ်ကွက်များသို့ မော်တော်ယာဉ်ဖြင့် လှည့်လည်ရောင်းချခဲ့ပါသည်။
ထိုသို့ လှည့်လည်ရောင်းချရာတွင် ဆန်တစ်ပြည်လျှင် ၁၈၀၀ ကျပ်နှုန်းဖြင့်လည်းကောင်း၊ စားအုန်းဆီ ၅၀ ကျပ်သားတစ်ဘူးလျှင် ၃၂၀၀ ကျပ်နှုန်းဖြင့်လည်းကောင်း ရောင်းချပေးခဲ့ရာ မြို့နယ် စီမံအုပ်ချုပ်ရေးအဖွဲ့ ဥက္ကဋ္ဌ ဦးညီညီနှင့် အဖွဲ့ဝင်များ၏ကြီးကြပ်မှုဖြင့် ဒုတိယ မြို့နယ်အုပ်ချုပ်ရေးမှူး ဦးအောင်ကိုကိုနှင့် အထွေထွေအုပ်ချုပ်ရေးဦးစီးဌာနမှ ဝန်ထမ်းများ၊ စားသုံးသူရေးရာဦးစီးဌာန မြို့နယ်တာဝန်ခံ ဒေါ်အေးအေးခိုင်နှင့်ဝန်ထမ်းများက ပူးပေါင်းဆောင်ရွက်ပေးကြပါသည်။
အုတ်တွင်းမြို့နယ် စီမံအုပ်ချုပ်ရေးအဖွဲ့သည် သက်ဆိုင်ရာဌာနဆိုင်ရာများနှင့်ပူးပေါင်း၍ ဆန်၊ စားအုန်းဆီ၊ ကြက်ဥ၊ သားငါးနှင့် ဟင်းသီးဟင်းရွက်များကို စားသုံးသူပြည်သူများ ဈေးနှုန်း သက်သာစွာဝယ်ယူနိုင်ရေးအတွက် အခါအားလျော်စွာရောင်းချပေးနိုင်ရေး ဆောင်ရွက်လျက်ရှိကြောင်းသိရှိရပါသည်။
DOCA(ပဲခူး)