မိတ္ထီလာခရိုင်အတွင်း ဖေဖော်ဝါရီလ တတိယအပတ်၌ ဝါထွက်ရှိမှု မရှိသလောက်နည်းလာသဖြင့် ဂွမ်းစျေးများမြင့်တက်လာပါသည်။ ဝါသီးနှံကိုခရိုင်အတွင်း မိတ္ထီလာ၊ မလှိုင်၊ သာစည်၊ ဝမ်းတွင်း စသည့်မြို့နယ်အားလုံးတွင် စိုက်ပျိုးကာ မလှိုင်မြို့နယ်တွင် အများဆုံးစိုက်ပျိုးပါသည်။ ဝါသီးနှံကိုအောက်တိုဘာလမှ စတင်ကောက်သိမ်းရာ စတင်ကောက်သိမ်းချိန်မှ သီးနှံလှိုင်ချိန်အထိ ကောက်သိမ်းလုပ်သားခကို တစ်ပိဿာအပေါ် ယခုနှစ် ၂၀၂၂-၂၀၂၃ ခုနှစ်တွင် ၃၀၀ ကျပ်ပေးချေရပါသည်။ ဖေဖော်ဝါရီလအတွင်း ဝါသီးနှံကုန်ဆုံးလုနီးပြီး၊ ဝါလေ(အရည်အသွေး နိမ့်ဝါ)များကိုမူ အချို့သောကျေးရွာရှိ တောင်သူများကလုပ်သားနှင့်တောင်သူလုပ်ငန်းရှင်နှစ်ဦး အချိုးတူအကျိုးအမြတ်ရယူကောက်သိမ်းကြပါသည်။ လုပ်ငန်းကျွမ်းကျင်မှုရှိသော ဒေသခံလုပ်သားများအနေနှင့်သီးနှံထွက်ရှိမှုလှိုင်ချိန်တွင်လည်း တစ်ဦးလျှင်တစ်ရက် ပိဿာ (၃၀) ကျော် ကောက်သိမ်းနိုင်ခြင်းကြောင့် လုပ်ငန်းရှင်များအတွက် အားထားရသဖြင့်သီးနှံ ထွက်ရှိမှု ရှားပါးချိန်တွင်လည်း အကျိုးတူမျှတခံစားကြခြင်းဖြစ်ပါသည်။ ဝါစျေးမှာ သီးနှံထွက်ရှိရာသီကုန်ပြီဖြစ်၍ ဝါ (အညံ့စ) တစ်ပိဿာလျှင် (၂၇၀၀ကျပ် မှ ၃၃၀၀ ကျပ်)အထိ စျေးမြင့်လာကာ ဝါသည်များလက်ဝယ်တွင်လည်း ဝါလက်ကျန်မရှိသလောက်နည်းလာပြီး ဂွမ်းလက်ကျန်များပြားလာကာ ဝါစျေးမြင့်သဖြင့်ဂွမ်းစျေးမှာ တစ်ပိဿာ (၇၅၀၀) ကျပ်ရှိသောကြောင့် ယခင်တစ်ပတ်ထက် (၂၀၀) ကျပ် မြင့်တက်လာကြောင်း စျေးကွက်မှသိရှိရပါသည်။
DOCA(မန္တလေး)