ချင်းပြည်နယ်အတွင်းရှိ ပြည်သူများအတွက် စားသုံးသူကာကွယ်ရေးလုပ်ငန်းများကို အရှိန်အဟုန်မပျက် ဆက်လက်ဆောင်ရွက်နိုင်ရန် ရည်ရွယ်၍ ပြည်နယ်စားသုံးသူရေးရာကော်မတီ အစည်းအဝေး (၂/ ၂၀၂၃)ကို ၂၀၂၃ခုနှစ်၊ ဖေဖော်ဝါရီလ ၂၄ ရက်နေ့၊ နံနက်(၁၀:၀၀)နာရီအချိန်တွင် ချင်းပြည်နယ် အစိုးရအဖွဲ့ရုံး၊ ဝန်ကြီးချုပ်ခန်းမ၌ ကျင်းပပြုလုပ်ခဲ့ပါသည်။
အစည်းအဝေးတွင် ချင်းပြည်နယ်ဝန်ကြီးချုပ် ဒေါက်တာဝုန်ဆွမ်းထန်က အဖွင့်အမှာစကား ပြောကြားရာတွင် စားသုံးသူကာကွယ်ရေးလုပ်ငန်းများ စဉ်ဆက်မပြတ် အကောင်ထည်ဖော် ဆောင်ရွက်နိုင်ရန်အတွက် အများပြည်သူကို လက်ကမ်းစာစောင်များကို ဖြန့်ဝေရာတွင် ဒေသဘာသာစကား သို့မဟုတ် မြန်မာဘာသာဖြင့် ရေးသားပြုစု၍ အသိပညာပေးခြင်း၊ ဈေးကွက်အတွင်း တရားမဝင် ကုန်ပစ္စည်း ဝယ်ယူတင်သွင်းမှုရှိ/မရှိတို့ကို ရှောင်တခင် ကွင်းဆင်းစစ်ဆေးခြင်း၊ ကျောင်းဖွင့်သည့် ကာလဖြစ်၍ ကျောင်းကျန်းမာရေးအဖွဲ့နှင့်ပူးပေါင်းပြီး သန့်ရှင်းလတ်ဆတ်သော စားသောက်ကုန်များ ရောင်းချပေးနိုင်ရန် ဝိုင်းဝန်းကြပ်မတ်ဆောင်ရွက်ခြင်း၊ ကော်မတီအနေဖြင့် စားသုံးသူအသိပညာ ပေးရေးလုပ်ငန်းများ ဆောင်ရွက်ရာတွင် ကလေးသူငယ်များ အပါအဝင် အားလုံးပါဝင်နိုင်သည့်အသိပညာပေးခြင်း စသည်တို့ကို ဆက်လက်ကြိုးပမ်းဆောင်ရွက်သွားကြရန် ရှင်းလင်းမှာကြားခဲ့ပါသည်။ ထို့နောက် ကော်မတီအဖွဲ့ဝင်များက ၂၀၂၂ခုနှစ်အတွင်း စားသုံးသူရေးရာကော်မတီ၏ လုပ်ငန်းများ အကောင်ထည်ဖော် ဆောင်ရွက်ပြီးစီးမှုနှင့် ၂၀၂၃ခုနှစ်တွင် ကော်မတီအနေဖြင့် ရှေ့ဆက်လက်ဆောင်ရွက်ရမည့် အစီအမံများကို ဝိုင်းဝန်းဆွေးနွေးတင်ပြခဲ့မှုအပေါ် ချင်းပြည်နယ်ဝန်ကြီးချုပ်က စားသုံးသူကာကွယ်ရေးနှင့်ပတ်သက်ပြီး ပြည်သူများ အသိပညာနည်းသေးသည့်အတွက် စေတနာထား၍ ထပ်ခါထပ်ခါ နားလည်သဘောပေါက်အောင် ရှင်းပြရန် လိုအပ်မည်ဖြစ်ပြီး အသိပညာပေးလုပ်ငန်းများ ဆောင်ရွက်ရာတွင် ယခင်နှစ်ထက် ပိုမိုကောင်းမွန်သော လုပ်ဆောင်ချက်များကို ကော်မတီအဖွဲ့ဝင်များအနေဖြင့် ဆက်လက်ပြီး ဝိုင်းဝန်းပူးပေါင်း ဆောင်ရွက်သွားစေလိုကြောင်း နိဂုံးချုပ် မှာကြားခဲ့ပါသည်။
DOCA(ချင်း)