ပခုက္ကူမြို့နယ်တွင် မန်ကျည်းသီးမှည့်အသစ်များအရောင်းအဝယ်ဖြစ်လျက်ရှိရာ မန်ကျည်းသီးတောင့် တစ်ပိဿာလျှင် ကျပ်(၁၃၀၀-၁၄၀၀)၊ အစေ့ပါ တစ်ပိဿာလျှင် ကျပ်(၃၀၀၀ - ၄၀၀၀)၊ အစေ့မပါ တစ်ပိဿာလျှင်ကျပ်(၅၀၀၀ - ၆၀၀၀ )ရှိကြောင်း၊ မန်ကျည်းသီးတောင့် ဝင်ရောက်မှုအနေဖြင့် ပိဿာ (၅၀၀၀-၆၀၀၀)ခန့်ဖြင့် နေ့စဉ်ဝင်ရောက်လျက်ရှိကြောင်း၊ အစေ့လွတ် မန်ကျည်းသားများကို မန်ကျည်း ဖျော်ရည်လုပ်ငန်းရှင်များနှင့် မန်ကျည်းတော်ဖီလုပ်ငန်းရှင်များက အများအပြား ဝယ်ယူသည့်အပြင် တစ်နေ့လျှင် ပိဿာချိန်(၇၅၀၀ - ၈၀၀၀)ခန့် ရန်ကုန်သို့ တင်ပို့လျက်ရှိကြောင်း သိရှိရပါသည်။
မန်ကျည်းလုပ်ငန်းရှင်၏ ပြောပြချက်အရ အစေ့လွတ်မန်ကျည်းသားများ တင်ပို့နိုင်ရန် အတွက် မန်ကျည်းသီးများ ဝယ်ယူရာတွင် ပွဲစားများမှ မန်ကျည်းထွက်သော နေရာများသို့ဆင်း၍ ပင်လုံးပြတ် ဝယ်ယူခြင်းရှိသလို မန်ကျည်းသီးအတောင့်လိုက်လည်းဝယ်ယူခြင်းရှိကြောင်း၊ ရရှိလာသော မန်ကျည်းတောင့်များကို အစေ့လွတ်အသားများရရန်အတွက် အကြောသင်ခြင်း၊ ထုခြင်း၊ အစေ့ အသားခွဲခြင်းများ ပြုလုပ်ရကြောင်း၊ အကြောသင်ခမှာ တစ်ပိဿာကျပ်(၁၅၀) ပေးရပြီး ဒုတိယ အဆင့်အနေဖြင့် အကြောသင်ပြီးသား မန်ကျည်းသီးများကိုထုရကြောင်း၊ မန်ကျည်းသီးထုခမှာ တစ်ပိဿာ ကျပ်(၁၅၀)ပေးရကြောင်း၊ တတိယအဆင့်အနေဖြင့် မန်ကျည်းသားနှင့် အစေ့ခွဲထုတ်ရာတွင် တစ်ပိဿာကျပ်(၂၀၀) ပေးရကြောင်း၊ အလုပ်သမားများအနေဖြင့်လည်း တစ်နေ့လျှင် ပိဿာ(၂၀ - ၃၀ )ကြား ပြီးစီး၍ တစ်နေ့ဝင်ငွေ ကျပ်(၄၀၀၀ - ၅၀၀၀) ရရှိကြောင်းသိရှိရပါသည်။
မန်ကျည်းသီးပေါ်ချိန်တွင် မန်ကျည်းသီးထုခြင်း၊ အကြောသင်ခြင်း၊ အစေ့အသားခွဲခြင်းတို့ကို မိသားစုအလိုက်သော်လည်းကောင်း၊ အိမ်သို့ယူ၍ အရင်းမစိုက်ရဘဲ လုပ်ကိုင်လျက်ရှိရာ မိသားစုဝင်ငွေရရှိနေကြောင်း သိရှိရပါသည်။
DOCA(မကွေး)