မတ်လ ၁၅ ရက်နေ့၊ နံနက် (၀၉ :၃၀) နာရီအချိန်တွင် စီးပွားရေးနှင့်ကူးသန်းရောင်းဝယ်ရေးဝန်ကြီးဌာန ( ပဥ္စမထပ်) အစည်းအဝေးခန်းမ ရန်ကုန်မြို့၌ ၊ ကမ္ဘာ့စားသုံးသူအခွင့်အရေးများနေ့ အခမ်းအနားဆောင်ပုဒ် "စားသုံးသူကဏ္ဍမြှင့်တင်ဖို့သန့်ရှင်းစွမ်းအင်ကူးပြောင်းစို့" အခမ်းအနားအား စည်ကားသိုက်မြိုက်စွာ ကျင်းပပြုလုပ်ခဲ့ပါသည်။
အခမ်းအနားသို့ ရန်ကုန်တိုင်းဒေသကြီး စီးပွားရေးရာဝန်ကြီး၊ စားသုံးသူရေးရာကော်မတီဥက္ကဌ တက်ရောက်အဖွင့်အမှာစကား ပြောကြားခဲ့ပါသည်။ တိုင်းဒေသကြီးအတွင်း ပြည်သူများ စားသုံးသူအခွင့်အရေး အပြည့်အဝရရှိစေရေး၊ ဘေးအန္တရာယ် ကင်းရှင်းသည့် ကုန်စည်နှင့် ဝန်ဆောင်မှုများ ဈေးကွက်အတွင်း လွတ်လပ်စွာ စီးဆင်းနိုင်စေရေး စသည့်လုပ်ငန်းများကို စားသုံးသူကာကွယ်ရေးအတွက် တိုင်းဒေသကြီး စားသုံးသူရေးရာကော်မတီနှင့် တိုင်းဒေသကြီးဦးစီးမှူးရုံးတို့ပူးပေါင်း၍ ဆောင်ရွက်လျက်ရှိကြောင်း ပြောကြားခဲ့ပါသည်။
ထို့နောက် စားသုံးသူရေးရာဦးစီးဌာန၊ ရန်ကုန်တိုင်းဒေသကြီးဦးစီးမှူးက ကမ္ဘာ့စားသုံးသူအခွင့်အရေးများနေ့ကျင်းပရခြင်း ရည်ရွယ်ချက်များအားရှင်းလင်း ဆွေးနွေးခဲ့ပြီး တက်ရောက်လာသည့် ပတ်ဝန်းကျင်ထိန်းသိမ်းရေးဦးစီးဌာနမှ ညွှန်ကြားရေးမှူးက Clean Energy Transation အကြောင်း၊ မြန်မာနိုင်ငံ အင်ဂျင်နီယာအသင်းချုပ်မှ လုပ်ငန်းကော်မတီဝင်မှ မော်တော်ယာဉ်များအကြောင်းနှင့် မြန်မာ့ပြန်ပြည့်မြဲစွမ်းအင်အသင်းဥက္ကဌမှ စွမ်းအင်ကဏ္ဍနှင့် စားသုံးသူအခွင့်အရေးများအကြောင်း ခေါင်းစဉ်ဖြင့် အသီးသီးဆွေးနွေးခဲ့ကြပါသည်။ ဆက်လက်၍ ဉာဏ်စမ်းပဟေဠိပြိုင်ပွဲကို ကျင်းပခဲ့ပြီး သက်ဆိုင်ရာဌာနမှ တာဝန်ရှိသူများ၊ ဖိတ်ကြားထားသော ဧည့်သည်တော်များ တက်ရောက်ခဲ့ကြကြောင်း သတင်းရရှိပါသည်။
DOCA(ရန်ကုန်)