အာဟာရဓာတ်ကြွယ်ဝတဲ့ အစားအစာထဲမှာ ပဲပုတ်သီးနှံဟာလည်း တခုအပါအဝင်ဖြစ်ပါတယ်။ ပဲပုတ်ကို ရှမ်းပြည်နယ်(တောင်ပိုင်း)၊ ဧရာဝတီတိုင်း၊ စစ်ကိုင်းတိုင်းနဲ့ မန္တလေး တိုင်းတို့မှာ အများဆုံးစိုက်ပျိုးပြီးချင်းပြည်နယ်နဲ့ တနင်္သာရီတိုင်းတို့မှအပ ကျန်တိုင်းဒေသကြီးနဲ့ပြည်နယ်များ မှာ အနည်းငယ်စိုက်ပျိုးပါတယ်။ ရှမ်းပြည်နယ်(တောင်ပိုင်း)မှာဆိုရင် ပဲပုတ်(မိုး)နဲ့ ပဲပုတ်(ဆောင်း)ဆိုပြီး တစ်နှစ်လျှင်(၂)ကြိမ် စိုက်ပျိုးပါတယ်။ ပဲပုတ်(မိုး)ကို ဇူလိုင်လ မှ ဩဂုတ်လ ထိ စိုက်ပျိုးပြီး စက်တင်ဘာလနဲ့ အောက်တိုဘာလတို့မှာ ရိတ်သိမ်းပါတယ်။ ပဲပုတ်(ဆောင်း)ကို စက်တင်ဘာလနဲ့ အောက်တိုဘာမှာ စိုက်ပျိုးပြီး ဒီဇင်ဘာလနဲ့ ဇန်နဝါရီလမှာ ရိတ်သိမ်းတယ်လို့ သိရှိရပါတယ်။
ပဲပုတ်သီးနှံဟာ အပူချိန်(၂၀° မှ ၄၀°) အကြားနဲ့ မိုးရေချိန်(၂၄ မှ ၆၀) လက်မအကြားမှာ အောင်မြင်ဖြစ်ထွန်းပါတယ်။ မြေအမျိုးမျိုးတွင် စိုက်ပျိုးနိုင်ပြီး မြေဆွေးပါဝင်မှုများသောမြေ၊ ဖွယ်သောမြေ၊ ရေမဝပ်သောမြေနဲ့ သဲဆန်သောမြေတို့မှာ အများဆုံးဖြစ်ထွန်းပါတယ်။
ရှမ်းပြည်နယ်(တောင်ပိုင်း)တွင် စိုက်ပျိုးတဲ့ ပဲပုတ်အမျိုးအစားတွေကတော့ သက်လျှင်မျိုး(SB-60)၊ သက်လတ်မျိုး(SB-45)၊ သက်ကြီးမျိုး ရေဆင်း(၁)၊ ရေဆင်း(၆) (၁၁)(၁၄)နဲ့ ဒေသမျိုးတို့ပဲဖြစ်ပါတယ်။ရှမ်းပြည်နယ်(တောင်ပိုင်း)မှာပဲပုတ်ကို မိုးနဲ၊ တောင်ကြီး၊ လဲချား၊ ရွာငံ၊ ဆီဆိုင် တို့တွင် အများဆုံးစိုက်ပျိုးကြပါတယ်။ ရှမ်းပြည်နယ်(တောင်ပိုင်း)ရဲ့ပဲပုတ်စိုက်ပျိုးမှုမှာ ၂၀၁၈-၁၉ ခုနှစ်တွင် (၇၀၄၀၉)ဧက၊ ၂၀၁၉-၂၀ ခုနှစ်တွင် (၆၅၀၆၇)ဧက စိုက်ပျိုးခဲ့ပါတယ်။တစ်ဧကလျှင် ပျမ်းမျှ(၁၉)တင်းနှုန်းခန့်ထွက်ရှိ ပြီး တစ်တင်းရောင်းဈေးမှာ (၂၂၀၀ဝိ/-)ကျပ်ခန့်ရရှိကြောင်း စုံစမ်းသိရှိရပါတယ်။
ရှမ်းပြည်နယ်(တောင်ပိုင်း)တွင် ထွက်ရှိတဲ့ ပဲပုတ်များကို ရိုးရာအစားအသောက်များ၊ ပဲနို့ ရည်၊ အသားတု၊ ပဲပုတ်ခြောက်၊ တို့ဟူးဆီ၊ မုန့်မျိုးစုံတို့မှာ အသုံးပြုကြပြီး ဒေသတွင်းပိုလျှံတဲ့ ပဲပုတ်များကို ရန်ကုန်၊ မန္တလေးသို့ တင်ပို့ပြီး အခြားမြို့များရှိ ပဲပြားစက်ရုံများသို့လည်း တင်ပို့ လျက်ရှိကြောင်း စုံစမ်းသိရှိရပါတယ်။
ယခုနှစ်တွင် ကပ်ရောဂါကူးစက်ပျံ့ပွားမှုမရှိစေရေး အစီအမံများချမှတ်ဆောင်ရွက် လျှက်ရှိရာ ရှမ်းပြည်နယ်ရဲ့ စီးပွားရေးအပေါ်သက်ရောက်မှုများစွာရှိနေကြောင်း လေ့လာ တွေ့ရှိရပါတယ်။ ရှမ်းပြည်နယ်၏ ဟင်းသီးဟင်းရွက်၊ သစ်သီးဝလံ စိုက်ပျိုးထုတ်လုပ် တင်ပို့သည့်လုပ်ငန်းကိုပါ သက်ရောက်မှုရှိလာသောကြောင့် တောင်သူများနဲ့ ရောင်းဝယ်သူများ အတွက် အခက်အခဲအချို့ကြုံတွေ့ရကြောင်း စုံစမ်းလေ့လာသိရှိရပါတယ်။
ရှမ်းပြည်နယ်(တောင်ကြီး)