တရုတ်နိုင်ငံပြီးလျှင် ကမ္ဘာ့ဒုတိယ ဆန်အများဆုံးဝယ်ယူသည့် ဖိလစ်ပိုင်နိုင်ငံသည် ၂၀၂၇ ခုနှစ်တွင် ကောက်ပဲသီးနှံထုတ်လုပ်မှုအား အပြည့်အဝဖူလုံရန် ရည်မှန်းထားကြောင်း စိုက်ပျိုးရေးဝန်ကြီးဌာနက အင်္ဂါနေ့ (ဧပြီ ၁၈)တွင် ပြောကြားခဲ့သည်။
မှားယွင်းသည့် မူဝါဒများနှင့် ဆိုးရွားသောရာသီဥတုဒဏ်တို့ကြောင့် ပြည်တွင်းကုန်ထုတ် စွမ်းအား လျော့နည်းခဲ့သဖြင့် ယခင်အစိုးရများလက်ထက်တွင် ရည်မှန်းချက်အောင်မြင်ရန် ပျက် ကွက်ခဲ့ပြီးနောက် ဖိလစ်ပိုင်အစိုးရက အဆိုပါကတိကဝတ် ပြုခဲ့ခြင်းဖြစ်သည်။ လက်ရှိကာလတွင် ဖိလစ်ပိုင်နိုင်ငံအနေဖြင့် ပြည်တွင်းဆန်ဖူလုံမှု မြှင့်တင်ရန်နှင့် ဈေးနှုန်းတည်ငြိမ်စေရန်အတွက် နှစ်စဉ် ဆန်တန်ချိန် ၃ သန်းကျော်ကို ဗီယက်နမ်နိုင်ငံထံမှ အဓိက ဝယ်ယူတင်သွင်းလျက်ရှိသည်။
သမ္မတဖာဒီနန်မာကို့စ်ဂျူနီယာ၏ အစိုးရအဖွဲ့သည် ရာသီဥတုပြောင်းလဲမှုနှင့် လိုက်လျောညီထွေဖြစ်စေရေးအပါအဝင် ဒီဂျစ်တယ်နည်းပညာကို အသုံးပြု၍ ထုတ်လုပ်မှုမြှင့်တင်ရန်အတွက် ပြန်လည်မွမ်းမံထားသော ငါးနှစ်စီမံကိန်းတွင် မဟာဗျူဟာများ ထည့်သွင်းရေးဆွဲခဲ့ကြသည်။ သမ္မတ၏ ခြောက်နှစ်သက်တမ်းမကုန်ဆုံးမီ တစ်နှစ်အလို သို့မဟုတ် ၂၀၂၇ ခုနှစ်တွင် ဆန်အပြည့်အဝ ဖူလုံရန် ကြိုးပမ်းနေကြောင်း စိုက်ပျိုးရေးဌာန၏ ထုတ်ပြန်ချက်တွင် ဖော်ပြထားသည်။
အဆိုပါအစီအစဉ်အရ ပြည်တွင်း၌ နှစ်စဉ်ဆန်စိုက်ပျိုးထုတ်လုပ်မှုမှာ တန်ချိန် ၂၄.၉၉ သန်း မှ ၂၆.၈၆ သန်းအတွင်း တည်ငြိမ်လျက်ရှိပြီး အစိုးရအနေဖြင့် နှစ်စဉ် ဆန်ဈေးနှုန်းများ ၁% အောက်သာ မြင့်တက်မှုရှိစေရန်၊ တောင်သူများ၏ ဝင်ငွေ ၅၄% တိုးလာရန်နှင့် လုံလောက်သော အရန်ရိက္ခာ သိုလှောင်ထားရှိရန် ရည်မှန်းထားခြင်းဖြစ်သည်။
လက်ရှိတွင် ပြည်တွင်းဆန်ဖူလုံမှုမှာ လုံလောက်မှုရှိပါကြောင်း၊ ပြင်းထန်ခြောက်သွေ့သောရာသီဥတုဖြစ်ပေါ်နိုင်သည့် အယ်နီညိုရာသီဥတုဖြစ်စဉ်နှင့်ပတ်သက်၍ စိုးရိမ်မှုများကိုလျော့ပါးစေရန် ကြိုးပမ်းနေကြောင်း ဖိလစ်ပိုင်စိုက်ပျိုးရေးဝန်ကြီးဌာနက ပြောကြားခဲ့သည်။
အစားအစာကုန်ကျစရိတ်များကြောင့် ငွေကြေးဖောင်းပွမှု မြင့်မားလာခြင်းကို ရင်ဆိုင်နေရသည့် ဖိလစ်ပိုင်အစိုးရအနေဖြင့် ဆန်ရရှိမှုကို အဟန့်အတားမဖြစ်စေနိုင်ရေး ကြိုးပမ်းဆောင်ရွက်လျက်ရှိကြောင်း၊ နိုင်ငံတော်၏ ဆန်စပါးသိုလှောင်ရေးအေဂျင်စီဖြစ်သည့် အမျိုးသားစားနပ်ရိက္ခာ အာဏာပိုင်အနေဖြင့် အရန်ဆန်သိုလှောင်မှုပမာဏတွင် လိုအပ်ချက်ဖြစ်ပေါ်နေမှုကို ကာမိစေရန်အတွက် ဆန်တန်ချိန် ၃၃၀၀၀၀ တင်သွင်းရန် အဆိုပြုထားကြောင်း၊ သို့ရာတွင် သမ္မတမာကို့စ်အနေဖြင့် အဆိုပါအဆိုပြုချက်ကို အတည်ပြုခြင်း မရှိသေးကြောင်းဖြင့် ရိုက်တာသတင်းကို ကိုးကားလျက် မလေးရှား The Star သတင်းဌာနက ဖော်ပြပါသည်။
Source: The Star, 18 Apr 2023 (လယ်ယာထွက်ကုန်များနှင့် အဓိကသွင်းကုန်များ၏ ဈေးကွက်စောင့်ကြည့်လေ့လာရေးအဖွဲ့)