အင်ဒိုနီးရှားနိုင်ငံ၌ စားအုန်းဆီလုပ်ငန်းကဏ္ဍဖွံ့ဖြိုးတိုးတက်ရေးအတွက် လုပ်ကွက်ငယ်တောင်သူများ ဆီအုန်းစိုက်ပျိုးနိုင်ရေးအစီအစဉ် (Program for Smallholders’ plantation-PSR) ကို အကောင်အထည်ဖော်ဆောင်ရွက်မည်ဖြစ်ပါသည်။
၁၂-၄-၂၀၂၃ နေ့တွင် ကျင်းပသည့် ၂၀၂၃-၂၀၂၈ ကာလအတွက် အင်ဒိုနီးရှားစားအုန်းဆီအသင်း ပြင်ဆင်ဖွဲ့စည်းမှုအခမ်းအနား၌ အင်ဒိုနီးရှားနိုင်ငံဒုတိယသမ္မတ Mr. Ma’ruf Amin က လုပ်ကွက်ငယ်တောင်သူများ ဆီအုန်းစိုက်ပျိုးနိုင်ရေး အစီအစဉ်သည် စားအုန်းဆီလုပ်ငန်းတစ်ရပ်လုံး ဖွံ့ဖြိုးတိုးတက်ရေး ဆောင်ရွက်ရာတွင် အဓိကမဏ္ဍိုင်တစ်ခု ဖြစ်ကြောင်း၊ စားအုန်းဆီ ထုတ်လုပ်မှုတိုးတက်ခြင်းဖြင့် နိုင်ငံသားများ၏လူမှုဘဝ ဖွံ့ဖြိုးတိုးတက်စေမည်ဖြစ်ကြောင်း၊ အင်ဒိုနီးရှားနိုင်ငံအတွင်း ဆီအုန်းစိုက်ပျိုးမှုဧရိယာ စုစုပေါင်း ဟက်တာ ၁၆.၃၈ သန်းခန့်ရှိရာ ကာဗွန်ဒိုင်အောက်ဆိုက် စုပ်ယူမှုသည်လည်း တစ်နှစ်လျှင် ၂.၂ ဘီလီယံတန် ရှိလာပြီး ဇီဝဒီဇယ် ထုတ်လုပ်မှုကို အခြေခံသည့် စားအုန်းဆီက လောင်စာဆီအပေါ်မှီခိုရမှုအား လျော့ကျစေကြောင်း၊ အင်ဒိုနီးရှားနိုင်ငံသည် ၂၀၀၆ ခုနှစ်မှစ၍ ကမ္ဘာ့စားအုန်းဆီ ထုတ်လုပ်မှုနှင့် တင်ပို့မှုအများဆုံးနိုင်ငံဖြစ်လာပြီးနောက် ကမ္ဘာ့ဈေးကွက်တွင် ကြုံတွေ့ရသော စိန်ခေါ်မှုများနှင့် ယနေ့အထိ ရင်ဆိုင်နေရသဖြင့် အစိုးရ၊ စီးပွားရေးလုပ်ငန်းရှင်၊ လုပ်ကွက်ငယ်တောင်သူများ စသည့် ဆက်စပ်ပါဝင်သူများအားလုံး ဟန်ချက်ညီညီ ပူးပေါင်းလုပ်ကိုင်ရန်လိုအပ်ကြောင်း၊ PSR အစီအစဉ်ကို ယခုအချိန် စတင်နိုင်ခြင်းမရှိပါက အနာဂါတ်ကာလ၌ စားအုန်းဆီလုပ်ငန်းအပေါ် အင်ဒိုနီးရှားနိုင်ငံ၏ လွှမ်းမိုးနိုင်မှုစွမ်းအား ကျဆင်းနိုင်မည်ကြောင်း ပြောကြားခဲ့ပါသည်။
အင်ဒိုနီးရှား စိုက်ပျိုးရေးဝန်ကြီး Mr. Syahrul Yasin Limpo ကလည်း အင်ဒိုနီးရှားနိုင်ငံသည် ကမ္ဘာ့စားအုန်းဆီထုတ်လုပ်မှုတွင် ၅၉% ၊ ကမ္ဘာ့စားအုန်းဆီတင်ပို့မှု၌ ၅၄% နှင့် ကမ္ဘာ့ စားအုန်းဆီသုံးစွဲမှု စုစုပေါင်းတွင် ၁၁% ပါဝင်သည့်အတွက် ပြည်တွင်းစားအုန်းဆီ လိုအပ်ချက်နှင့် ကမ္ဘာ့လိုအပ်ချက်ကို ဖြည့်ဆည်းပေးရာတွင် အရေးပါသည့်ကဏ္ဍမှပါဝင်ကြောင်း၊ စားအုန်းဆီအသင်းအနေဖြင့် ထုတ်လုပ်မှုနှင့် ထုတ်လုပ်နိုင်စွမ်းအား တိုးမြှင့်နိုင်ရေးကို အလေးထား ထိန်းသိမ်း ဆောင်ရွက်ရမည်ဖြစ်ကြောင်း၊ မဟာဗျူဟာမြောက်အစီအစဉ်များကို သိရှိနားလည်ရမည်ဖြစ်ကြောင်းနှင့် အထူးသဖြင့် ပြန်လည်စိုက်ပျိုးသည့် အစီအစဉ်တစ်ခုဖြစ်သော လုပ်ကွက်ငယ်တောင်သူများ ဆီအုန်းစိုက်ပျိုးနိုင်ရေး PSR အစီအစဉ် အကောင်အထည်ဖော်ရေးကို သိရှိထားရန် လိုအပ်ကြောင်း၊ ၂၀၂၃ ခုနှစ်အတွင်း စီရင်စု ၂၁ ခုတွင် ဆီအုန်းပြန်လည်စိုက်ပျိုးမှု ဟက်တာပေါင်း ၁၈၀၀၀၀ ခန့် စိုက်ပျိုးနိုင်ရေး ဦးတည်ဆောင်ရွက်လျက်ရှိကြောင်းဖြင့် ထပ်ဆင့်ရှင်းလင်း ပြောဆို ပါသည်။
အင်ဒိုနီးရှား စားအုန်းဆီအသင်းကို ဥက္ကဋ္ဌ၊ ဒုတိယဥက္ကဋ္ဌ (၃) ဦး၊ အတွင်းရေးမှူးများ၊ ငွေစာရင်းတာဝန်ခံများနှင့် ကဏ္ဍအလိုက်တာဝန်ခံများဖြင့် ဖွဲ့စည်းထားပြီး အသင်းဥက္ကဋ္ဌ Mr. Eddy Martono အပါအဝင် ဘုတ်အဖွဲ့ဝင် ၇၉ ဦးရှိကြောင်း သိရှိရပါသည်။
Source: Indonesia Palm Oil Association, 12 April, 2023 (လယ်ယာထွက်ကုန်များနှင့် အဓိကသွင်းကုန်များ၏ ဈေးကွက်စောင့်ကြည့်လေ့လာရေးအဖွဲ့)