အိန္ဒိယနိုင်ငံ၌ ပဲစဉ်းငုံနှင့် မတ်ပဲ သိုလှောင်ထားရှိမှုများအား အစိုးရက စောင့်ကြည့်စစ်ဆေးလျက်ရှိ

ပြည်တွင်း၌ မတ်ပဲနှင့် ပဲစဉ်းငုံများ၏ သိုလှောင်ထားရှိမှု လက်ကျန်အခြေအနေများ သိရှိရန်အတွက် အိန္ဒိယစားသုံးသူရေးရာဦးစီးဌာနမှ  အကြီးတန်းအရာရှိ ၁၂ ဦးသည် ကာနာတကာ၊ မဒ္ဒရာ ပရာဒေ့ရှ်၊ မဟာရသျှတရနှင့် တမီနာဒူပြည်နယ်များရှိ ချန်နိုင်း၊ မွန်ဘိုင်း ဆိပ်ကမ်းမြို့များ အပါအဝင် နယ်မြေဒေသ ၁၀ ခုသို့ ၁၅-၄-၂၀၂၃ နေ့မှ စတင်သွားရောက်လျက် ပဲမျိုးစုံ သိုလှောင်ရောင်းဝယ်သူများနှင့် ဈေးကွက်များသို့ ကွင်းဆင်းလေ့လာခဲ့ကြပါသည်။

အိန္ဒိယစားသုံးသူရေးရာဦးစီးဌာန၏ ၁၇-၄-၂၀၂၃ နေ့ သတင်းထုတ်ပြန်ချက်တွင် အဆိုပါ ကွင်းဆင်းလေ့လာမှုများမှ အစိုးရ၏ ကုန်စည်အချက်အလက်စင်္ကြန် (e-portal) တွင် ကုန်သည်လုပ်ငန်းရှင်များ၏ မှတ်ပုံတင်မှုနှင့် သိုလှောင်ထားသည့် ကုန်လက်ကျန် ထုတ်ဖော်ကြေညာမှုတို့မှာ များပြားလာသည်ကို တွေ့ရှိရကြောင်း၊ သို့ရာတွင် ဈေးကွက်အတွင်း ပါဝင်လုပ်ကိုင်သူများစွာသည် မှတ်ပုံတင်ရန် ကျန်ရှိနေသကဲ့သို့ မှတ်ပုံတင်ပြီးသူများစွာသည်လည်း ၎င်းတို့လက်ဝယ် သိုလှောင် ထားရှိသော ပဲပမာဏကို ပုံမှန်ပြင်ဆင်မှု လုပ်ဆောင်ခြင်းမရှိသည်ကို တွေ့ရကြောင်း၊ လေလံစနစ်ဖြင့် ရောင်းချရန် ကုန်စည်ဒိုင်များသို့ အပ်နှံထားသည့် တောင်သူများ၏ ကုန်စည်များနှင့် ဆိပ်ကမ်းများ၌ အကောက်ခွန်ရှင်းလင်းဆဲ ကုန်စည်များကဲ့သို့ လမ်းခုလတ်၌ ကျန်ရှိနေသည့် ပဲများသည် လက်ရှိစောင့်ကြည့်ကြပ်မတ်မှု ယန္တရားအောက်တွင်မရှိပဲ ကင်းလွတ်နေကြောင်း၊ အချို့သော စက်ပိုင်/ကုန်သည်များသည် ကုန်လက်ကျန် ထုတ်ဖော်ကြေညာရခြင်းမှ ရှောင်တိမ်းရန်အတွက် ၎င်းတို့၏ ပဲလက်ကျန်များကို တောင်သူများ၏အမည်ဖြင့် သိုလှောင်ရုံများတွင် ဖြန့်ခွဲထားရှိသည်ကို တွေ့ရှိရကြောင်း၊ အကြီးတန်းအရာရှိများသည် ကုန်သည်များ၊ စက်ပိုင်များ၊ ပဲတင်သွင်းသူများနှင့် တွေ့ဆုံလျက် ကုန်လက်ကျန်စာရင်း ထုတ်ဖော်တင်ပြခြင်း၏ အရေးပါမှုနှင့် အစိုးရ၏ အချက်အလက်စင်္ကြန်သို့ ပုံမှန်စာရင်းတင်ပြရန် ပညာပေးဆွေးနွေးခဲ့ကြောင်း၊ ပဲလက်ကျန်များကို တရားဝင်ထုတ်ပြန်ကြေညာမှု မရှိပါက ၎င်းပဲလက်ကျန်များအား ပြည်နယ်အစိုးရများ၏ သိမ်းယူခြင်းကဲ့သို့သော တင်းကျပ်သည့် ဥပဒေစည်းမျဉ်းများဖြင့် အရေးယူခံရမည်ဖြစ်သည်ကို အသိပေးခဲ့ကြောင်း၊ ချန်နိုင်းဆိပ်ကမ်းမှတစ်ဆင့် ပဲစင်းငုံများ တင်သွင်းလျက်ရှိသော တဲလန်ဂါနာ၊ ရာဂျပ်စတန်၊ အန္တရာပရာဒေ့ရှ်နှင့် ကာနာတကာ ပြည်နယ်များရှိ လုပ်ငန်းရှင်များအနေဖြင့် တင်သွင်းလာသည့်ပဲများအား  အမှန်တကယ် မျက်မြင်သိုလှောင်ထားရှိရာ ပြည်နယ်၌ မှတ်ပုံတင်ရမည်ဖြစ်သည်ကို ရှင်းလင်းပြောကြားခဲ့ကြောင်းဖြင့် ဖော်ပြထားပါသည်။

အိန္ဒိယစားသုံးသူရေးရာဦးစီးဌာနသည် ၎င်း၏ e-portal ကုန်စည်အချက်အလက်စင်္ကြန်  (https://fcainfoweb.nic.in/psp/) ကို လုပ်ငန်းရှင်များ အဆင်ပြေလွယ်ကူစွာ အသုံးပြုနိုင်ရန်အတွက် ပြင်ဆင်မွန်းမံမှုများကို လုပ်ဆောင်ခဲ့ပြီး နောက်ဆက်တွဲ ကွင်းဆင်းလေ့လာမှုများ ပြုလုပ် ရန်   စီစဉ်ဆောင်ရွက်လျက်ရှိကြောင်း သိရှိရသည်။

Source: Press Information Bureau of India, 17 Apr 2023 (လယ်ယာထွက်ကုန်များနှင့် အဓိကသွင်းကုန်များ၏ ဈေးကွက်စောင့်ကြည့်လေ့လာရေးအဖွဲ့)