၂၀၂၂-၂၀၂၃ ဘဏ္ဍာနှစ်၌ အိန္ဒိယ၏ ပဲမျိုးစုံ တင်သွင်းမှု ကျဆင်းခဲ့ခြင်း

Powered by Drupal

     အိန္ဒိယနိုင်ငံ၏ ပဲမျိုးစုံတင်သွင်းမှုတန်ဖိုးမှာ ၄ နှစ်ဆက်တိုက် မြင့်တက်ခဲ့ပြီးနောက် ၂၀၂၂-၂၀၂၃ ဘဏ္ဍာနှစ်တွင် ကျဆင်းခဲ့ပါသည်။ အိန္ဒိယနိုင်ငံ၊ ကူးသန်းရောင်းဝယ်ရေးနှင့် စက်မှုဝန်ကြီးဌာန၏ ၂၀၂၂-၂၀၂၃ ဘဏ္ဍာနှစ်အတွက် ပြည်ပကုန်သွယ်မှု ကနဦးခန့်မှန်းစာရင်းများအရ ပဲမျိုးစုံတင်သွင်းမှုမှာ တန်ဖိုးအားဖြင့် ရူပီးငွေ ၁၅၇၈၀.၇၃ ကုဋေရှိပြီး ယခင်နှစ်တင်သွင်းမှုတန်ဖိုး ရူပီး ၁၆၆၂၇.၅၈ ကုဋေနှင့် နှိုင်းယှဉ်ပါက ၅.၀၉% ကျဆင်းခဲ့ကြောင်း၊ အမေရိကန်ဒေါ်လာငွေတန်ဖိုးအရမူ ယခုနှစ် ပဲမျိုးစုံတင်သွင်းမှုသည် ဒေါ်လာ ၁.၉၄ ဘီလီယံရှိပြီး ယခင်နှစ် တင်သွင်းမှုတန်ဖိုး ဒေါ်လာ ၂.၂၂ ဘီလီယံအောက် ၁၂.၇၉% လျော့နည်းခဲ့ခြင်းဖြစ်ကြောင်း သိရှိရသည်။

      အိန္ဒိယ၏ ၂၀၂၂-၂၀၂၃ ခုနှစ် ပဲမျိုးစုံတင်သွင်းမှုတွင် ပဲစင်းငုံသည်  ယခင်နှစ်တင်သွင်းမှု တန်ချိန် ၈.၄၀ သိန်းထက် ပိုမိုလျက် တန်ချိန် ၈.၇၅ သိန်းခန့်ရှိကြောင်း၊ အလားတူ ပဲနီလေးကိုလည်း ယခင်နှစ်တင်သွင်းမှု တန်ချိန် ၆.၆၇ သိန်းထက် ပိုမိုလျက် တန်ချိန် ၇.၇၃ သိန်းကျော် တင်သွင်းခဲ့ကြောင်း၊ သို့ရာတွင် ယခင်နှစ်၌ မတ်ပဲတန်ချိန် ၆.၁၁ သိန်းတင်သွင်းခဲ့ရာမှ ယခုနှစ်တွင် တန်ချိန် ၅.၁၂ သိန်းခန့်၊ ကုလားပဲတင်သွင်းမှု တန်ချိန် ၁.၄၀ သိန်းရှိရာမှ ယခုနှစ်၌ ၅၉၂၅၅ တန်၊ မြေထောက်ပဲမှာ တန်ချိန် ၁.၃၇ သိန်း တင်သွင်းခဲ့ရာမှ ယခုနှစ် ၉၀၇၀၄ တန်နှင့် ပဲလွမ်းတင်သွင်းမှု ၇၁၈၉၀ တန်ရှိရာမှ ယခုနှစ် ၃၂၉၈၉ တန် အသီးသီး လျော့နည်းတင်သွင်းခဲ့ကြောင်း၊ လွန်ခဲ့သည့် ၂ လတာအတွင်း သွင်းကုန်မညီမျှမှုနှင့် အစိုးရ၏ ကြားဝင်ဆောင်ရွက်ချက်များကြောင့် ပဲစင်းငုံနှင့် မတ်ပဲ တင်သွင်းမှုမှာ နှောင့်နှေးမှုများရှိနေခဲ့ကြောင်းဖြင့် IGrain India ပဲမျိုးစုံရောင်းဝယ်ရေး ကုမ္ပဏီမှ ဒါရိုက်တာ Mr. Rahul Chauhan က ပြောဆိုပါသည်။

    အိန္ဒိယနိုင်ငံ၏ ပဲမျိုးစုံ စိုက်ပျိုးထုတ်လုပ်မှုမှာ ၂၀၁၈-၂၀၁၉ ခုနှစ်တွင် တန်ချိန် ၂၂ သန်း ရှိရာမှ နှစ်စဉ်တိုးတက်ခဲ့ပြီး ၂၀၂၂-၂၀၂၃ ခုနှစ်တွင် တန်ချိန် ၂၇.၈၁ သန်း ထွက်ရှိမည်ဟု ခန့်မှန်းထားသည်။ ၎င်းကာလအတွင်း အဓိကအားဖြင့် ကုလားပဲစိုက်ပျိုးထုတ်လုပ်မှုမှာ တန်ချိန် ၉.၉ သန်း မှ တန်ချိန် ၁၃.၆ သန်းသို့ တိုးတက်လာခြင်းဖြစ်ကြောင်း၊ အလားတူ ပဲစင်းငုံ စိုက်ပျိုးထုတ်လုပ်မှုသည် တန်ချိန် ၃.၃ သန်းမှ ၃.၆ သန်းသို့ တိုးတက်ခဲ့ကြောင်း၊ မတ်ပဲထုတ်လုပ်နိုင်မှုမှာမူ တန်ချိန် ၃ သန်းမှ ၂.၆၈ သန်းသို့ ကျဆင်းခဲ့ကြောင်း၊ ပြည်ပမှ ပဲမျိုးစုံဝယ်ယူတင်သွင်းမှု တန်ဖိုးသည် ၂၀၁၈-၂၀၁၉ ခုနှစ်၌ ရူပီးငွေ ၈၀၃၅ ကုဋေရှိရာမှ ၄ နှစ်တာအတွင်း တဖြည်းဖြည်း တိုးတက်လျက် ၂၀၂၁-၂၀၂၂ ခုနှစ်တွင် ရူပီးငွေ ၁၆၆၂၈ ကုဋေသို့ ရောက်ရှိလာခြင်းဖြစ်ကြောင်း အိန္ဒိယ Hindu Business Line သတင်းဌာနက ဖော်ပြထားသည်။

Source: The Hindu Business Line, 20 Apr 2023 (လယ်ယာထွက်ကုန်များနှင့်အဓိကသွင်းကုန်များ၏ နိုင်ငံတကာဈေးကွက် စောင့်ကြည့်လေ့လာရေးအဖွဲ့)