သတင်းနှင့် လှုပ်ရှားမှုများ

     ရန်ကုန်တိုင်းဒေသကြီး၊ တရားမဝင်ကုန်သွယ်မှုတိုက်ဖျက်ရေးအထူးအဖွဲ့၏ လမ်းညွှန်ချက်အရ မှော်ဘီခရိုင်၊ တရားမဝင်ကုန်သွယ်မှုတိုက်ဖျက်ရေးအထူးအဖွဲ့ခေါင်းဆောင် ဒုရဲမှူးကြီးငွေတင်ဦးဆောင်၍ အမှတ်(၄)လမ်းဆုံ စစ်ဆေးရေးဂိတ်၊ ဗိုလ်မှူးဇော်ဇော်အောင်၊ စားသုံးသူရေးရာဦးစီးဌာနမှ ဦးစီးမှူး ဦးဇော်မျိုးထွန်း၊ လူဝင်မှုကြီးကြပ်ရေးဦးစီးဌာနမှ  ဒု-လဝကမှူး ဦးသန့်ဇင်၊ သစ်တောဦးစီးဌာနမှ တောအုပ် ဦးမင်းသန့်၊ အထွေထွေအုပ်ချုပ်ရေးဦးစီးဌာနမှ ဦးမောင်လှိုင်၊ ယာဉ်ထိန်းရဲတပ်ဖွဲ့၊ ဒုရဲမှူးဝင်းအောင်အဖွဲ့ဝင်များပူးပေါင်း၍ ၁၆-၅-၂၀၂၄ ရက်နေ့၊ နံနက် (၀၇:၀၀) နာရီအချိန်မှ (၈:၃၅)နာရီအချိန်အထိ မှော်ဘီမြို့နယ်ရှိ အမှတ်(၄) လမ်းဆုံစစ်ဆေးရေးဂိတ်တွင်  ကုန်တင်မော်တော်ယာဉ် (၄၀) စီးအား တရားမဝင်သစ်များတင်ဆောင်လာခြင်းရှိ/ မရှိ ရှောင်တခင်ရှာဖွေစစ်ဆေးမှုများပြုလုပ်ခဲ့ပါသည်။

        အဆိုပါ အမှတ်(၄)လမ်းဆုံဂိတ်တွင် တိုက်ကြီး၊ မြောင်းတကာ၊ ပြည်၊ မိုးညို၊ လက်ပံတန်း၊ မင်းလှ၊ သာယာဝတီ၊ ကြို့ပင်ကောက်တို့မှ ဝင်ရောက်လာသော ကုန်တင်ယာဉ်များတွင် ပဲစင်းငုံ၊ မတ်ပဲ၊ ကုန်စိမ်း၊ သကြား၊ ခရီးသည်တင်ကားများ အများဆုံးတင်ဆောင်နေကြောင်းစစ်ဆေးတွေ့ရှိခဲ့သဖြင့် တရားဝင်ကုန်စည်များသာဖြစ်ကြောင်းသိရှိရပါသည်။

DOCA(ရန်ကုန်)

     ဧရာဝတီတိုင်းဒေသကြီး၊ စားသုံးသူရေးရာဦးစီးဌာန၊ မြောင်းမြခရိုင် ၊အိမ်မဲမြို့နယ် တာဝန်ခံဒေါ်ဇင်မာသန်းသည် အိမ်မဲမြို့နယ် မြို့မဈေးတာဝန်ခံရုံး၌ (၁၇.၅.၂၀၂၄)ရက်နေ့ ၊ နေ့လယ် (၁၅:၀၀) နာရီက ကုန်မျိုးစုံလုပ်ငန်းရှင်များအား စားသုံးသူကာကွယ်ရေး အသိပညာပေး ဟောပြောပွဲဆောင်ရွက်ခဲ့ပါသည်။

       ထိုသို့ ဟောပြောဆွေးနွေးရာတွင် စားသုံးသူရေးရာဦးစီးဌာန၊ အိမ်မဲမြို့နယ် တာဝန်ခံက စီးပွားရေးနှင့်ကူးသန်း ရောင်းဝယ်ရေးဝန်ကြီးဌာနမှ ထုတ်ပြန်ထားသော စားသုံးသူကာကွယ်ရေး ဥပဒေ ၂၀၁၉ ပါ ပြဌာန်းချက်များ၊ စားသုံးသူ၏အခွင့်အရေးနှင့်တာဝန်များ၊ စီးပွားရေးလုပ်ငန်းရှင်၏တာဝန်များ၊ တားမြစ်ချက်များ၊ ပြစ်မှုပြစ်ဒါဏ်များ၊ စားသုံးသူကာကွယ်ရေးဥပဒေ အခန်း(၁၈)ပါ ကုန်အညွှန်းအမှတ်အသား ဖော်ပြခြင်းနှင့်စပ်လျဉ်း၍ မည်သည့် စီးပွားရေးလုပ်ငန်းရှင်မဆို ပုဒ်မ-၄၁ ပုဒ်မခွဲ(ခ)နှင့်(ဆ)တို့ပါ ကုန်စည်၏ အမျိုးအမည်၊ အရွယ်အစား၊ အရေအတွက်နှင့် သက်တမ်းကုန်ဆုံးသည့်ရက်စွဲ၊ ထုတ်လုပ်မှုအမှတ်စဉ်၊ ကျန်းမာရေးဆိုင်ရာ ဘေးထွက်ဆိုးကျိုး(သို့) ဓါတ်မတည့်ကြောင်း ဖော်ပြချက်နှင့် ကြိုတင်သတိပေးချက်များအကြောင်း၊ အခန်း(၁၄) ပုဒ်မ(၂၇)ပါ ဝန်ဆောင်မှုလုပ်ငန်းများ၏ အာမခံချက်နှင့်စပ်လျဉ်း၍ စားသုံးသူကတောင်းဆိုနိုင်သည့် အခွင့်အရေးများအကြောင်း ဆွေးနွေးဟောပြော ဆောင်ရွက်ခဲ့ပါသည်။  ဟောပြောပွဲသို့ ကုန်မျိုးစုံလုပ်ငန်းရှင်(၁၀)ဦး တက်ရောက်ခဲ့ကြောင်း သိရှိရပါသည်။

DOCA(ဧရာဝတီ)

       စားသုံးသူရေးရာဦးစီးဌာနအနေဖြင့် စားသုံးသူကာကွယ်ရေးလုပ်ငန်းများအပြင် ပြည်တွင်းကုန်သွယ်မှုဖွံ့ဖြိုးတိုးတက်ရေးလုပ်ငန်းများကိုပါ အဓိကထား တာဝန်ယူဆောင်ရွက်လျက်ရှိရာ ပြည်တွင်းကုန်သွယ်မှုဖွံ့ဖြိုးတိုးတက်ရေးလုပ်ငန်းဖြစ်သည့် အခြေခံစားကုန်များ ပြတ်လပ်မှုမရှိစေရေး၊ ဈေးနှုန်းအဆမတန်မြှင့်တင်ရောင်းချမှုမရှိစေရေး၊ ဈေးနှုန်းတည်ငြိမ်မှုရှိစေရေးအတွက် ကြပ်မတ်ဆောင်ရွက်လျက်ရှိပါသည်။ စားသုံးသူရေးရာဦးစီးဌာန၊ ပဲခူးတိုင်းဒေသကြီး(အနောက်) ပြည်ခရိုင်မှ ပြည်မြို့နယ်တာဝန်ခံ ဦးထွန်းနိုင်လင်းနှင့် ဝန်ထမ်းများသည် မိတ်ဖတ်ဌာနဆိုင်ရာများဖြစ်သည့် ခရိုင်ပြန်ကြားရေးနှင့် ပြည်သူဆက်ဆံရေးဦးစီးဌာန၊ မြို့နယ်စည်ပင်သာယာရေးအဖွဲ့နှင့် ဒေသခံရပ်ကွက်အုပ်ချုပ်ရေးအဖွဲ့တို့မှ တာဝန်ရှိသူများပါဝင်သောအဖွဲ့နှင့် ပူးပေါင်း၍ (၁၇-၅-၂၀၂၄) ရက်နေ့ နံနက် (၈:၃၀) အချိန်နာရီတွင် ပြည်မြို့ဆံတော်ရပ်ကွက်အတွင်းရှိ ဆန်ဆိုင်များ၊ ဆန်ဂိုဒေါင်များသို့ဝင်ရောက်၍ ပြည်ဈေးကွက်အတွင်း ဆန်အပါအဝင် အခြေခံစားကုန်များပြတ်လပ်မှုမရှိစေရေး၊ ဈေးကစားရန်အလို့ငှာ သိုလှောင်ထားခြင်းမရှိစေရေး၊ ဈေးနှုန်းအဆမတန် ကြီးမြင့်မှုမရှိစေရေးနှင့် ကုန်ဈေးနှုန်းတည်ငြိမ်ရေး၊ မြေပြင်ကွင်းဆင်းစစ်ဆေးခြင်းလုပ်ငန်းများ ဆောင်ရွက်ခဲ့ကြောင်းသိရှိရပါသည်။

DOCA(ပဲခူး)

      ဧရာဝတီတိုင်းဒေသကြီး၊ စားသုံးသူရေးရာဦးစီးဌာန၊ တိုင်းဒေသကြီးဦးစီးမှူးရုံး ၊ အစည်းအဝေးခန်းမတွင် (၂၀.၅.၂၀၂၄) ရက်နေ့ ၊ နံနက် (၁၁:၀၀) နာရီအချိန်တွင် ဧရာဝတီတိုင်းဒေသကြီးအတွင်းရှိ ခရိုင်ဆီထုတ်တာဝန်ခံများ၊ မြို့နယ်ဆီအရောင်းကိုယ်စားလှယ်များအပါအဝင် စုစုပေါင်း (၈၅)ဦးနှင့်အတူ စားအုန်းဆီဖြန့်ခွဲမှုဆိုင်ရာ လုပ်ငန်းညှိနှိုင်းအစည်းအဝေးအား ကျင်းပပြုလုပ်ခဲ့ပါသည်။

       ဆက်လက်၍ စားအုန်းဆီဖြန့်ခွဲမှုဆိုင်ရာ လုပ်ငန်းညှိနှိုင်းအစည်းအဝေးအား အစီအစဉ် (၆)ရပ်ဖြင့် ကျင်းပပြုလုပ်ခဲ့ရာ ရှေးဦးစွာ တိုင်းဒေသကြီးဦးစီးမှူး ဦးဇေယျာဆွေ မှ ၂၀၂၄ ခုနှစ်၊ ဇွန်လမှ စတင်မည့် စားသုံးဆီဖြန့်ခွဲမှုဆိုင်ရာ ကိစ္စရပ်များနှင့် ပတ်သက်၍ ရှင်းလင်းပြောကြားပြီးနောက်  သက်ဆိုင်ရာ ခရိုင်ဆီထုတ်တာဝန်ခံများကလည်း မိမိခရိုင်နှင့်သက်ဆိုင်သည့် စားအုန်းဆီ ခွဲတမ်းရရှိမှုများအပေါ် အသီးသီး ဆွေးနွေးပြောကြားခဲ့သည့်အပြင် တက်ရောက်လာကြသည့် သက်ဆိုင်ရာ မြို့နယ်ဆီအရောင်းကိုယ်စားလှယ်များမှ လက်ရှိလုပ်ငန်းဆောင်ရွက်နေမှုအခြေအနေများ တင်ပြမှုအပေါ်  တိုင်းဒေသကြီးဦးစီးမှူးမှ ပြန်လည်ဆွေးနွေးပြောကြားခဲ့ပြီး အစည်းအဝေးကို နေ့လယ် (၁၃:၀၀) အချိန်တွင် ရုတ်သိမ်းခဲ့ကြောင်း သတင်းရရှိပါသည်။

DOCA(ဧရာဝတီ)

     စားသုံးသူရေးရာဦးစီးဌာန၊ မိုးညှင်းခရိုင်ဦးစီးမှူးရုံးမှ ဦးကျော်မိုးလွင် စစ်ဆေးရေးမှူး သည် ၂၁.၅.၂၀၂၄ ရက်နေ့တွင် မိုးညှင်းမြို့၊ ရွာသစ်ကုန်းရပ်ကွက်ရှိ ချိုကမ္ဘာ(ကုန်စုံဆိုင်)သို့ ကုန်အညွှန်းအမှတ်အသား ဖော်ပြခြင်းနှင့် ပတ်သက်၍ စားသုံးသူကာကွယ်ရေးဥပဒေပါ ပြဌာန်းချက်များနှင့် ကိုက်ညီခြင်း ရှိ/မရှိ ဈေးကွက်စောင့်ကြည့်စစ်ဆေးခဲ့ပါသည်။

     ဈေးကွက်စောင့်ကြည့်စစ်ဆေးခဲ့ရာ HAPPY (3 in 1 Instant COFFEE MIX) အမှတ်တံဆိပ်ပါ အသင့်ဖျော်ကော်ဖီထုပ်အမျိုးမျိုးတို့တွင် ကုန်စည်အမျိုးအစားအလိုက် သတ်မှတ်ချက်များနှင့်အညီ မြန်မာ ဘာသာဖြင့် ပြည့်စုံစွာ ဖော်ပြရမည့် ကုန်စည်၏ အမျိုးအမည်၊ အရွယ်အစား၊ အရေအတွက် ၊အသားတင်ပမာဏ၊ သုံးစွဲပုံနည်းလမ်းတို့ကို ကုန်အညွှန်းအမှတ်အသား ဖော်ပြထားရှိခြင်း ရှိ/မရှိ ဈေးကွက်စောင့်ကြည့် စစ်ဆေးခဲ့ရာ ကုန်အညွှန်းအမှတ်အသား ပြည့်စုံစွာ ဖော်ပြထားရှိကြောင်း စစ်ဆေးတွေ့ရှိရပြီး ကုန်စုံဆိုင်ပိုင်ရှင်အား ကုန်အညွှန်းအမှတ်အသား ပြည့်စုံမှန်ကန်မှုရှိသော ကုန်စည်များကိုသာ ရောင်းချရန်နှင့် မြန်မာနိုင်ငံစားသုံးသူကာကွယ်ရေးကော်မရှင်မှ ထုတ်ပြန်ထားသော စီးပွားရေးလုပ်ငန်းရှင်များ လိုက်နာဆောင်ရွက်ရမည့် ညွှန်ကြားချက်အမှတ် (၂/၂၀၁၉) အား အသိပညာပေးဆွေးနွေးခဲ့ပြီး ကုန်အညွှန်း အမှတ်အသားဖော်ပြခြင်းဆိုင်ရာ လက်ကမ်းစာစောင်များ ဖြန့်ဝေခဲ့ကြောင်း သိရှိရပါသည်။

DOCA(ကချင်)