သတင်းနှင့် လှုပ်ရှားမှုများ

     ပြည်ထောင်စုဝန်ကြီး၏ လမ်းညွှန်မှာကြားချက်အရ ရန်ကုန်တိုင်းဒေသကြီး၊ စားသုံးသူရေးရာဦးစီးဌာန၊ အရှေ့ပိုင်းခရိုင်ဦးစီးမှူးရုံးမှ ခရိုင်ဦးစီးမှူး ဦးလှစိုး ဦးဆောင်၍  မြို့နယ်ပြည်သူ့ကျန်းမာရေးဦးစီးဌာနမှ ဒေါက်တာသုဝေ၊ အစားအသောက်နှင့်ဆေးဝါးကွပ်ကဲရေးဦးစီးဌာန(ရန်ကုန်)မှ ဒေါက်တာအောင်ကိုကို စသည့်ဌာနများပူးပေါင်း၍ ၁၇-၅-၂၀၂၄ ရက်နေ့၊ နံနက် (၁၀:၃၀) နာရီအချိန်တွင်  အမှတ် (၁၁၈)၊ စည်ပင်လမ်း၊ (၁၉) ရပ်ကွက်၊ တောင်ဒဂုံမြို့နယ်ရှိ သင့်မြတ်ဆေးဆိုင်မှ  ဆိုင်တာဝန်ခံ‌ ဒေါက်တာကေခိုင်ငြိမ်းနှင့်သွားရောက်တွေ့ဆုံ၍ ဆေးဆိုင်အတွင်းရှိဆေးဝါးများအား စစ်ဆေးမေးမြန်းမှုများပြုလုပ်ခဲ့ကြောင်းသိရှိရပါသည်။

      ထိုသို့စစ်ဆေးမေးမြန်းရာ၌ ဆေးဆိုင်တွင် ဆေးအမျိုးပေါင်း (၁၀၀) ကျော်ရှိပြီး သွေးကျဆေး၊ ရင်ကြပ်ပျောက်ဆေး၊ အပူလိမ်းဆေး၊ အကိုက်ခဲပျောက်ဆေး၊ လေဆေး၊ အစာအိမ်ဆေး၊ ဆီးချိုဆေး၊ သန္ဓေတားဆေး၊ အားဆေးများမှာ ရောင်းအားကောင်းသောဆေးများဖြစ်ပြီး AA, DKSH, UP, Mega စသည့်ဆေးကုမ္ပဏီများမှပေးပို့သည့် ဈေးနှုန်းများအပေါ် ၅%မှ ၁၀%အထိ အမြတ်တင်ရောင်းချခြင်းဖြစ်ကြောင်း အဆိုပါဆေးဝယ်ယူသည့်အရေအတွက်၊ သိုလှောင်ရုံပစ္စည်းလက်ကျန်၊ ဝယ်ယူသည့်နိုင်ငံ၊ သိုလှောင်သည့်နေရာ၊ ဝယ်ယူသည့်ဈေးနှုန်း၊ ရောင်းချသည့်ဈေးနှုန်း၊ ပစ္စည်းပြတ်လပ်မှုရှိ/မရှိ၊ ဖြစ်သင့်ဖြစ်ထိုက်သည့်‌ ဈေးနှုန်းထက် ဈေးနှုန်းမြှင့်တင်ရောင်းချမှုရှိ/ မရှိတို့ကို စစ်ဆေးခဲ့ကြောင်း သတင်းရရှိပါသည်။

DOCA(ရန်ကုန်)

      စားသုံးသူရေးရာဦးစီးဌာန၊ ဘီးလင်းမြို့နယ်တာဝန်ခံနှင့် ဝန်ထမ်းများသည် ၁၇.၅.၂၀၂၄ ရက်နေ့တွင် မြို့နယ်အထွေထွေအုပ်ချုပ်ရေးဦးစီးဌာန၊ မြန်မာနိုင်ငံရဲတပ်ဖွဲ့၊ မြို့နယ်စည်ပင်သာယာရေးအဖွဲ့၊ ပြန်ကြားရေးနှင့်ပြည်သူ့ဆက်ဆံရေးဦးစီးဌာနတို့နှင့်ပူးပေါင်း၍ ဘီးလင်း မြို့နယ်၊ ဘိုရာဇာရပ်ကွက်ရှိ မင်္ဂလာဈေး ၊ ကန်သာယာရပ်ကွက်ရှိ နီလာဈေးရှိ ကုန်စုံဆိုင်များတွင် ရောင်းချနေသော စားဆီအမျိုးအမျိုးတို့အား ဈေးကွက်စောင့်ကြည့်စစ်ဆေးခြင်း ဆောင်ရွက်ခဲ့သည်။

      ထိုသို့ ဈေးကွက်စောင့်ကြည့်စစ်ဆေးရာတွင် စားဆီအမျိုးမျိုးတို့တွင် ကုန်အညွှန်းအမှတ်သား ပြည့်စုံစွာ ဖော်ပြထားခြင်း ရှိ၊ မရှိ၊ သက်ဆိုင်ရာဌာနများ၏ ထောက်ခံချက် ရှိ၊ မရှိနှင့် ဘေးအန္တရာယ်ကင်းရှင်းမှု ရှိ/မရှိ စစ်ဆေးခဲ့ရာ ကုန်အညွှန်းအမှတ်အသားနှင့် ထောက်ခံချက်များ ပြည့်စုံစွာ ဖော်ပြပါရှိသည်ကို စစ်ဆေးတွေ့ရှိရကြောင်း သိရှိရပါသည်။

DOCA(မွန်)

       စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာနအနေဖြင့် စားသုံးသူပြည်သူများအတွက် ကုန်စည်နှင့်ဝန်ဆောင်မှုများအသုံးပြုရာတွင် ဘေးအန္တရာယ်ကင်းရှင်းစေရေး၊ လုံခြုံစိတ်ချရမှုရှိစေရေးအတွက် ဆောင်ရွက်လျက်ရှိပါသည်။

      စားသုံးသူပြည်သူများအတွက် လုံခြုံစိတ်ချရမှုမရှိသောကုန်စည်များ၊ စားသုံးသူကာကွယ်ရေးဥပဒေ အခန်း(၁၈)၊ ပုဒ်မ(၄၁) ပါကုန်အညွှန်းအမှတ်အသားများ ပြည့်စုံမှုမရှိသောကုန်စည်များ ထုတ်လုပ်ဖြန့်ဖြူးရောင်းချခြင်း၊ ဈေးကွက်အတွင်းရောင်းချခြင်းမရှိစေရန်ရည်ရွယ်၍ တောင်ငူမြို့နယ်တာဝန်ခံနှင့်အဖွဲ့သည် တောင်ငူမြို့ပေါ်ရှိ စားအုန်းဆီအရောင်းဆိုင်များအား စစ်ဆေးခဲ့ကြကြောင်းသိရှိရပါသည်။

      မြို့နယ်တာဝန်ခံနှင့်အဖွဲ့သည် တောင်ငူမြို့ပေါ်ရှိ စားအုန်းဆီရောင်းချလျက်ရှိသော ကုန်စုံဆိုင်များတွင်သတ်မှတ်ထားသောရည်ညွှန်းဈေးအတိုင်း ရောင်းချခြင်းရှိ/ မရှိကိုလည်းကောင်း၊ ဘူးသွင်းစားအုန်းဆီများ၌ ညွှန်ကြားချက်များနှင့်အညီ ကုန်အညွှန်းအမှတ်အသားများဖော်ပြထားခြင်းရှိ/ မရှိကိုလည်းကောင်း စစ်ဆေးစောင့်ကြည့်ခဲ့ကြကြောင်း သိရှိရသည်။

DOCA(ပဲခူး)

       စားသုံးသူရေးရာဦးစီးဌာန၊ တောင်ငူခရိုင်ဦးစီးမှူး ဦးမျိုးအောင်သည် ဒုတိယခရိုင်ဦးစီးမှူး ဦးမင်းဇော်၊ အုတ်တွင်းမြို့နယ်တာဝန်ခံ ဒေါ်အေးအေးခိုင်၊ အုတ်တွင်းမြို့နယ် အထွေထွေအုပ်ချုပ်ရေးဦးစီးဌာနမှ အကြီးတန်းစာရေး ဦးမင်းဇော်၊ အုတ်တွင်းမြို့နယ်စည်ပင်သာယာရေးအဖွဲ့မှ စည်းကမ်းထိန်း-၄ ဦးထွန်းအောင်ကျော်တို့နှင့်အတူ (၁၇-၅-၂၀၂၄)ရက်နေ့ နံနက်ပိုင်းက အုတ်တွင်းမြို့ပေါ်ရှိ ဆန်သိုလှောင်ရုံများ၊ ဆန်အရောင်းဆိုင်များနှင့် စားသုံးဆီအရောင်းဆိုင်များသို့ ကွင်းဆင်းစစ်ဆေးခဲ့ပါသည်။

       ခရိုင်ဦးစီးမှူးဦးဆောင်သောအဖွဲ့သည် ဈေးကွက်အတွင်း အခြေခံစားကုန်များဖြစ်သော ဆန်နှင့် စားသုံးဆီများပြတ်လပ်မှုမရှိစေရေးနှင့် ဈေးနှုန်းဈေးကွက်တည်ငြိမ်ရေးအတွက် ဆန်ပွဲရုံ နှင့် ဆန်အရောင်းဆိုင်များ၌ ဆန်သိုလှောင်ထားရှိမှုအခြေအနေ၊ ဈေးကွက်အတွင်းဖြန့်ဖြူးမှုနိုင်မှု အခြေ အနေနှင့် ဈေးနှုန်းများကိုလည်းကောင်း၊ စားသုံးဆီအရောင်းဆိုင်၌ စားသုံးဆီရောင်းချဖြန့်ဖြူးမှုနှင့်ဈေးနှုန်းများ၊ ရည်ညွှန်းဈေးဖြင့် စားအုန်းဆီခွဲတမ်းရရှိသည့် အရောင်းဆိုင်များ၌ ဈေးနှုန်းကိုဖော်ပြထားသည့် ဗွီနိုင်းချိတ်ဆွဲထားရှိမှုများကိုလည်းကောင်း ကြည့်ရှုစစ်ဆေးခဲ့ပါသည်။

      ကွင်းဆင်းစစ်ဆေးစဉ် ခရိုင်ဦးစီးမှူးနှင့် အဖွဲ့ဝင်များသည် အခြေခံစားကုန်များဖြစ်သော ဆန်နှင့်စားသုံးဆီပြတ်လပ်မှုနှင့် ဆန်ဈေးနှုန်းကြီးမြင့်မှုမဖြစ်ပေါ်စေရေးအတွက် ဈေးနှုန်းမြှင့်တင်ရောင်းချဖြန့်ဖြူးခြင်း၊ ဈေးကစားရန်ရည်ရွယ်ချက်ဖြင့်သိုလှောင်ခြင်းများမပြုရန် သက်ဆိုင်ရာလုပ်ငန်းရှင်များအား အသိပညာပေးဆွေးနွေးခဲ့ကြောင်း သိရပါသည်။

DOCA(ပဲခူး)

       စားသုံးသူရေးရာဦးစီးဌာန၊ မကွေးတိုင်းဒေသကြီး၊ တိုင်းဒေသကြီးဦးစီးမှူးနှင့် ပခုက္ကူခရိုင်ဦးစီးမှူး၏ လမ်းညွှန်မှုဖြင့် ပခုက္ကူခရိုင်ဦးစီးမှူးရုံးမှ ဒုတိယခရိုင်ဦးစီးမှူး ဦးဇော်ထွန်းဦး ဦးဆောင်သော ဝန်ထမ်းများအဖွဲ့သည်  ပြည်တွင်း MSMEs ကဏ္ဍလုပ်ငန်းများဖွံ့ဖြိုးတိုးတက်ရေးရည်ရွယ်၍ (၁၆-၅-၂၀၂၄)ရက်နေ့၊ နံနက်(၀၉:၃၀)နာရီအချိန်တွင် ပခုက္ကူမြို့၊ အမှတ်(၁၀)ရပ်ကွက်ရှိ “ စံထူး “ အာလူးကြော်လုပ်ငန်းရှင်နှင့်တွေ့ဆုံကာ ထုတ်လုပ်မှုအဆင့်ဆင့်နှင့် ဈေးနှုန်း၊ ဈေးကွက်များအား ကွင်းဆင်းမေးမြန်းခဲ့ပါသည်။

       ထိုသို့ကွင်းဆင်းမေးမြန်းရာတွင် အာလူးကြော်လုပ်ငန်းရှင်က ယခုလက်ရှိအချိန်တွင် အာလူးကြော်များ ရောင်းအားသွက်လျက်ရှိပါကြောင်း၊ ရှမ်းအာလူး(ရှယ်)များကို အောင်ပန်းမြို့မှ ကျောက်ပန်းတောင်းမြို့သို့ရောင်းချပြီး  ကျောက်ပန်းတောင်းမြို့မှတစ်ဆင့် ဝယ်ယူကြောင်း၊ အာလူး(၁)ပိဿာကို ပခုက္ကူမြို့အရောက် ကျပ် (၂၅၀၀) ဖြင့် ဝယ်ယူရကြောင်း၊ အာလူးတစ်ပိဿာကြော်လျှင် အာလူးကြော်(၂၅)ကျပ်သားထွက်ရှိကြောင်း၊ တစ်နေ့လျှင် ပျမ်းမျှပိဿာအချိန်(၃၀)ပါ (၂)အိတ်ကြော်ရကြောင်း၊ ကျပ်(၂၀၀)တန်နှင့် ကျပ် (၁၀၀၀)တန်များထုတ်လုပ်ရောင်းချကြောင်း၊ ပခုက္ကူမြို့မဈေးတွင် အဓိကထားရောင်းချကြောင်း၊ ယခင်အချိန်က ရန်ကုန်နှင့် မုံရွာမြို့သို့ တင်ပို့ရောင်းချပြီး လက်ရှိအချိန်တွင် မြို့ပေါ်တွင်သာရောင်းချရကြောင်း၊ အာလူးကြော်လုပ်ငန်းမှာ စဉ်ဆက်မပြတ်ကြော်နေရပြီး ဖောက်သည်များလည်းရှိပါကြောင်း၊ မိသားစုတစ်နိုင်တစ်ပိုင်လုပ်ငန်းဖြစ်၍ လုပ်သားများအနည်းငယ်သာထားရှိကြောင်း၊ အကျိုးအမြတ်အနေဖြင့် ဝင်ငွေမှာ မိသားစုစားဝတ်နေရေးအဆင်ပြေ၍ တွက်ခြေကိုက်မှုရှိပါကြောင်း လုပ်ငန်းရှင်၏ ပြောပြချက်အရသိရှိရပါသည်။

DOCA(မကွေး)