သတင်းနှင့် လှုပ်ရှားမှုများ

     တနင်္သာရီတိုင်းဒေသကြီး၊ စားသုံးသူရေးရာကော်မတီအစည်းအဝေး (၂/၂၀၂၃) ကို (၉-၆-၂၀၂၃) ရက်နေ့၊ နံနက် (၉:၃၀) နာရီအချိန်တွင် တိုင်းဒေသကြီးအစိုးရအဖွဲ့ရုံး၊ အစည်းအဝေးခန်းမ (၂) ၌ ကျင်းပပြုလုပ်ခဲ့ပါသည်။

   တနင်္သာရီတိုင်းဒေသကြီး၊ စားသုံးသူရေးရာကော်မတီ (၂/၂၀၂၃) အစည်းအဝေး၌ စားသုံးသူရေးရာကော်မတီဥက္ကဋ္ဌ စီးပွားရေးရာဝန်ကြီးက အဖွင့်အမှာစကားပြောကြားခဲ့ပါသည်။ ဆက်လက်၍ စားသုံးသူရေးရာဦးစီးဌာန၊ တိုင်းဒေသကြီးဦးစီးမှူးက (၁/၂၀၂၃) အစည်းအဝေးဆုံးဖြတ်ချက်များအား ဆောင်ရွက်ထားရှိမှုအခြေအနေနှင့် အမှာစာများ၊ ၂၀၂၃ခုနှစ်၊ မတ်လမှ မေလအထိ စားသုံးသူကာကွယ်ရေးဆိုင်ရာအသိပညာပေးဟောပြောပွဲများကျင်းပခြင်း၊ စီးပွားရေးလုပ်ငန်းရှင်များနှင့်​တွေ့ဆုံဆွေးနွေးခြင်းများ၊ ထုတ်ကုန်လုံခြုံစိတ်ချရမှုဆိုင်ရာ စျေးကွက်စောင့်ကြည့်စစ်ဆေးခြင်းများ၊ ကုန်ညွှန်းအမှတ်အသားများလျှောက်ထားလာမှုများအား စိစစ်တင်ပြအတည်ပြုပေးခဲ့ခြင်းများ၊ စားသုံးသူတိုင်ကြားမှုအား လက်ခံဖြေရှင်းဆောင်ရွက်ခဲ့မှုများနှင့် လုပ်ငန်းဆောင်ရွက်မှုမှတ်တမ်းဓာတ်ပုံများအား Power Point  ဖြင့် ဆွေးနွေးတင်ပြခဲ့ပါသည်။

     အဆိုပါအစည်းအဝေးတွင် ကော်မတီအဖွဲ့ဝင်များက အကြံပြုချက်များတင်ပြခြင်း၊ ရှေ့ဆက်လက်၍ ဆောင်ရွက်မည့်လုပ်ငန်းစဉ်များတွင်လည်း အဖွဲ့ဝင်များအားလုံးက ပူးပေါင်းပါဝင်ဆောင်ရွက်သွားမည်ဖြစ်ပါကြောင်းနှင့် အပြန်အလှန်ဆွေးနွေးခဲ့ကြပြီး အစည်းအဝေးကိုအောင်မြင်စွာရုပ်သိမ်းခဲ့ ကြောင်းသိရှိရပါသည်။

DOCA(တနင်္သာရီ)

   စီးပွားရေးနှင့်ကူးသန်းရောင်းဝယ်ရေးဝန်ကြီးဌာနသည် စားသုံးဆီတင်သွင်း၊ သိုလှောင်၊ ဖြန့်ဖြူးခြင်းလုပ်ငန်းကြီးကြပ်ရေးကော်မတီကို ဖွဲ့စည်းပြီး ပြည်ပမှ တင်သွင်းလာသည့် စားသုံးဆီများ သတ်မှတ်အရည်အသွေး စံချိန်စံညွှန်းများနှင့် ပြည်မီစေရေး၊ စားသုံးသူပြည်သူများ ကျန်းမာရေးနှင့် ညီညွှတ်သော စားသုံးဆီများကို သုံးစွဲနိုင်ရေး၊ စျေးနှုန်းတည်ငြိမ်စွာဖြင့် ဝယ်ယူစားသုံးနိုင်ရေးနှင့် စားအုန်းဆီ ကမ္ဘာ့စျေးနှုန်းဖြစ်ပေါ်ပြောင်းလဲမှုနှင့်အညီ ပြည်တွင်း၌ ဖြစ်သင့်ဖြစ်ထိုက်သည့် စျေးနှုန်းများ ဖြစ်ပေါ်စေရေး ထိန်းကျောင်းဆောင်ရွက်လျက်ရှိရာ စစ်ကိုင်းတိုင်းဒေသကြီး၊ စားသုံးသူရေးရာ ဦးစီးဌာန၊ တိုင်းဒေသကြီးဦးစီးမှူး၏ လမ်းညွှန်မှုဖြင့် (၇.၆.၂၀၂၃) ရက်နေ့၊ (၁၀:၀၀) နာရီအချိန်တွင် မုံရွာမြို့၊ တိုင်းဒေသကြီး ငွေရေးကြေးရေးဦးစီးဌာနရှိ ဝန်ထမ်းများအား ကုမ္ပဏီများမှ ဖြန့်ဖြူးရောင်းချသော စားအုန်းဆီများကို စစ်ကိုင်းတိုင်းဒေသကြီး ဆီကုန်သည်များနှင့် ဆီလုပ်ငန်းရှင်များ အသင်းမှ စျေးကားဖြင့် စားအုန်းဆီ(၁)ပိဿာလျှင် (၄၃၀၀)ကျပ်၊ ဆီဘူးခွံ (၈၀၀)ကျပ် စုစုပေါင်း (၅၁၀၀)ကျပ် နှုန်းဖြင့် ဝန်ထမ်းတစ်ဦးလျှင် (၁)ပိဿာနှုန်း ရောင်းချပေးနေမှုအား မုံရွာမြို့နယ် တာဝန်ခံရုံးမှဝန်ထမ်းများ ပူးပေါင်းကြီးကြပ်ဆောင်ရွက်ခဲ့ကြောင်း သိရှိရပါသည်။

DOCA(စစ်ကိုင်း)

     စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန၊ ကလေးခရိုင်ဦးစီးမှူး ဒေါ်သန်းသန်းဝင်းသည် ဇွန်လ ( ၈ ) ရက်နေ့ နံနက်(၁၁:၀၀)နာရီတွင် အသေးစားစက်မှု လက်မှုလုပ်ငန်းဦးစီးဌာနမှ  ကျင်းပပြုလုပ်သည့် လူသုံးကုန်ထုတ်လုပ်မှုနည်းပညာသင်တန်း ဖွင့်ပွဲ အခမ်းအနား၌ အသိပညာပေးဟောပြောပွဲ ကျင်းပပြုလုပ်ခဲ့ရာ လူဦးရေ(၃၀)ဦးတက်ရောက်ခဲ့ပါသည်။

   အဆိုပါဟောပြောပွဲတွင်  အသေးစားစက်မှုလက်မှုလုပ်ငန်းဦးစီးဌန၊ ဒေါ်ခိုင်ခိုင်ဝင်း (လ/ထညွှန်ကြားရေးမှူး)က အဖွင့်အမှာစကားပြောကြားရာတွင် ယခုလူသုံးကုန် ထုတ်လုပ်မှုနည်းပညာသင်တန်းဖွင့်လှစ်ပို့ချရသည့် ဘာသာရပ်များသည် ကျန်းမာရေးနှင့် ညီညွှတ်သော လူသုံးကုန်များဖြစ်စေရန် ပြည်သူများအား လက်ဆင့်ကမ်းဝေမျှပေးသော သင်တန်းဖြစ်ကြောင်း၊ သင်တန်းသား/သူများအနေဖြင့် သင်တန်းမှ ပို့ချပေးသော စာတွေ့၊ လက်တွေ့ ကုန်ထုတ်လုပ်မှု နည်းပညာများကို ကြိုးစားသင်ယူကြစေလိုကြောင်း၊ သင်တန်းကာလပြီးမြောက်သည့်အခါတွင်လည်း မိမိတို့အားသန်ရာ ကုန်ထုတ်လုပ်မှုလုပ်ငန်းများတွင် အခက်အခဲများရှိပါက သင်တန်းနည်းပြဆရာ/ဆရာမများနှင့် ဆက်သွယ်နိုင်သည့် ဖုန်းနံပါတ်များအပြင် ကလေးခရိုင်၊ အသေးစားစက်မှုလက်မှုလုပ်ငန်းဉီးစီးဌာနနှင့်လည်း ချိတ်ဆက်ဆောင်ရွက်နိုင်ပါကြောင်းနှင့် သင်တန်းသား/သူများနေဖြင့် မိမိတို့ဒေသဖွံ့ဖြိုးတိုးတက်ရေးအတွက် သင်တန်းဆင်းပြီး ပြန်လည်အသုံးချရမှာဖြစ်ပါကြောင်းနှင့် ဌာနမှတာဝန်ရှိသူများအနေနှင့်လည်း ကိုယ်စွမ်း၊ ဉာဏ်စွမ်းရှိသလောက် အင်အားစိုက်ထုတ်ပြီး စိတ်စေတနာရှေ့ထား၍ လုပ်ငန်းတာဝန်များကို ကျေပွန်စွာဆောင်ရွက်သွားကြပါရန် ပြောကြားခဲ့ပါသည်။

   ဆက်လက်၍ စားသုံးသူရေးရာဦးစီးဌာန၊ ကလေးခရိုင်ဦးစီးမှူးမှ ဆွေးနွေးပြောကြားရာတွင် သင်တန်းသား/သူများကို ကုန်စည်ရောင်းချသူ သို့မဟုတ် ဝန်ဆောင်မှုပေးသည့် စီးပွားရေးလုပ်ငန်းရှင်၊ ကုန်စည်ထုတ်လုပ်သူ၊ပြည်ပမှကုန်စည်များတင်သွင်းလာပြီး ပြည်တွင်းရှိစားသုံးသူများအား ပြန်လည်ရောင်းချဖြန့်ဖြူးသူ၊ တစ်ဆင့်ပြန်လည်ရောင်းချဖြန့်ဖြူးသူများသည် စားသုံးသူသည် ကုန်စည် သို့မဟုတ် ဝန်ဆောင်မှုကို အသုံးပြုခြင်းကြောင့် နစ်နာဆုံးရှုံးမှုများဖြစ်ပေါ်လာပါက အာမခံပေးရမည်ဖြစ်ကြောင်း၊ ကုန်ပစ္စည်းများ ထုတ်လုပ်ရောင်းချမှုများနှင့်ပတ်သက်၍ မိမိတို့၏ ထုတ်ကုန်များအား ဈေးကွက်တွင် ဖြန့်ဖြူးမည်ဆိုပါက ဖြန့်ဖြူးသူမှ တာဝန်ယူရမည်ဖြစ်ကြောင်း  ကလေးခရိုင်ဦးစီးမှူးမှ အသေးစိတ်ရှင်းလင်းဆွေးနွေး အသိပညာပေးခဲ့ကြောင်း သတင်းရရှိရပါသည်။

DOCA(စစ်ကိုင်း)

   ဧရာဝတီတိုင်းဒေသကြီး၊ စားသုံးသူရေးရာဦးစီးဌာန၊ မအူပင်ခရိုင်ဦးစီးမှူးရုံး၊  ညောင်တုန်းမြို့နယ်ဦးစီးမှူး ဦးအောင်လွင်နှင့် ဝန်ထမ်းများသည် (၇-၆-၂၀၂၃) ရက်နေ့၊ (၀၉း၃၀) နာရီအချိန်တွင် ညောင်တုန်းမြို့ပေါ်ရှိ ဆေးမျိုးစုံရောင်းချသည့်ဆိုင်များအား မိတ်ဖက်ဌာနဖြစ်သော FDA၊ ကျန်းမာရေးဦးစီးဌာန၊ စည်ပင်သာယာရေးအဖွဲ့တို့နှင့်အတူပူးပေါင်း၍ ဈေးကွက်စောင့်ကြည့်စစ်ဆေးခဲ့ကြပါသည်။

      ကွင်းဆင်းစစ်ဆေးရာတွင် ညောင်တုန်းမြို့ပေါ်ရှိ ဆေးအမျိုးမျိုးရောင်းချနေသောဆေးဆိုင် (၅) ဆိုင်မှ ရောင်းချနေသောဆေးဝါးများသည် တရားမဝင်ဆေးဝါများဈေးကွက်အတွင်း ရောင်းချခြင်းရှိ/မရှိနှင့် မှတ်ပုံတင်ထားခြင်းမရှိသော ဆင်တူယိုးမှားဆေးဝါးအတုအပများရောင်းချခြင်းရှိ/မရှိတို့ကို စစ်ဆေးခဲ့ကြပါသည်။ ဆေးဆိုင်ရှင်များကိုလည်း ကုန်အညွှန်းအမှတ်အသားသတ်မှတ်ချက်ပြည်စုံစွာဖော်ပြပါရှိသော ဆေးဝါးများကိုသာရောင်းချရန်၊ အစားအသောက်နှင့်ဆေးဝါးကွပ်ကဲရေးဦးစီးဌာနမှ တားမြစ်ကုန်စည်များကိုလည်းမရောင်းချရန်နှင့် သတ်မှတ်ချက်စည်းကမ်းများနှင့်မကိုက်ညီသောကုန်စည်များကို ရောင်းချခြင်းမျိုးစစ်ဆေးတွေ့ရှိပါက အရေးယူဆောင်ရွက်ခြင်း၊ ဌာန၏ပြစ်မှု၊ ပြစ်ဒဏ်များခံရမည်ဖြစ်ကြောင်း ရှင်းလင်းဆွေးနွေးအသိပညာပေးခဲ့ပါသည်။

DOCA(ဧရာဝတီ)

    ဧရာဝတီတိုင်းဒေသကြီး၊ စားသုံးသူရေးရာဦးစီးဌာန၊ မအူပင်ခရိုင်၊ ညောင်တုန်းမြို့နယ်ရှိ မြို့နယ်ဦးစီးမှူး ဦးအောင်လွင်နှင့် ဝန်ထမ်းများသည် (၅-၆-၂၀၂၃) ရက်နေ့၊ နံနက် (၀၉း၃၀) နာရီအချိန်တွင် မြို့နယ်အထွေထွေအုပ်ချုပ်ရေးဦးစီးဌာန၏ အစည်းအဝေးခန်းမတွင် မွေးမြူရေးလုပ်ငန်းရှင်(၂၈)ဦးအား စားသုံးသူကာကွယ်ရေးရာဥပဒေ (၂၀၁၉)အရ စီးပွားရေးလုပ်ငန်းရှင်တို့အား အသိပညာပေးဟောပြောခြင်းကို ဆောင်ရွက်ခဲ့ပါသည်။

    အဆိုပါတွေ့ဆုံဆွေးနွေးပွဲတွင် စားသုံးသူရေးရာဦးစီးဌာနမှ ဦးအောင်လွင်က စားသုံးသူကာကွယ်ရေးဥပဒေ ၂၀၁၉ပါ စားသုံးသူကာကွယ်ရေးလုပ်ငန်းစဉ်၊ စီးပွားရေးလုပ်ငန်းရှင်ဆိုသည်မှာ ကုန်စည်ကိုထုတ်လုပ်ခြင်း၊ ဖြန့်ဖြူးခြင်း၊ သိုလှောင်ခြင်း၊ သယ်ယူပို့ဆောင်ခြင်း၊ ရောင်းချခြင်း၊ ပြုပြင်ထုတ်လုပ်ခြင်း၊ ပြည်ပသို့တင်ပို့ခြင်း၊ ပြည်တွင်းသို့ တင်သွင်းခြင်း၊ ပြန်လည်ရောင်းချခြင်းကိုဖြစ်စေ၊ ထောက်ပံ့ပေးခြင်းကိုဖြစ်စေ၊ ဝန်ဆောင်မှုပေးခြင်းကိုဖြစ်စေ၊ ကြော်ငြာလုပ်ငန်းလုပ်ကိုင်ခြင်းကိုဖြစ်စေ၊ တစ်ဦးချင်းသော်လည်းကောင်း၊ အဖွဲ့အစည်းနှင့်သော်လည်းကောင်း ဆောင်ရွက်သူကိုဆိုလိုခြင်းဖြစ်‌ကြောင်းတို့ကိုရှင်းလင်းပြီး လုပ်ငန်းရှင်တို့အနေဖြင့် မိမိတို့ထုတ်လုပ်ဖြန့်ချိမည့်ကုန်စည်များကို စားသုံးသူဘေးအန္တရာယ်ကင်းရှင်းစွာအသုံးပြုနိုင်ရန်အတွက် စားသုံးသူရေးရာဦးစီးဌာနမှထုတ်ပြန်ထားသော ကုန်အညွှန်းအမှတ်အသားပါရှိရမည့်အချက်များအား မြန်မာဘာသာဖြင့်ဖြစ်စေ၊ မြန်မာဘာသာနှင့် အခြားဘာသာတစ်ခု (သို့မဟုတ်) တစ်ခုထက်ပို၍တွဲလျက်ဖြစ်စေ ဖော်ပြရန်လိုအပ်ပါကြောင်း၊ စသည့်ဖြင့် ကုန်စည်တစ်ခုတွင် ကုန်အညွှန်းအမှတ်အသား၊ ကုန်အမှတ်တံဆိပ်၊ ထုတ်လုပ်သည့်ရက်စွဲ၊ သက်တမ်းကုန်ဆုံးသည့်ရက်စွဲ၊ ထုတ်လုပ်သူ၏လိပ်စာ၊ လုပ်ငန်းအမည်နှင့်လိပ်စာ၊ ကုန်ကြမ်းပါဝင်မှုအမျိုးအမည်၊ ပမဏ၊ ပါဝင်မှုအချိုးအစား စသည့်အချက်များပါရှိသောကုန်ပစ္စည်းများကိုသာဝယ်ယူသုံးစွဲတတ်ရန် ဥပမာပေးရှင်းလင်းဟောပြောပြီး စားသုံးသူကာကွယ်ရေးလုပ်ငန်းစဉ်များ၊ ကုန်အညွှန်းအမှတ်အသားနှင့်ပတ်သက်၍ သိရှိလိုပါက  စားသုံးသူရေးရာဦးစီးဌာန၏လုပ်ဆောင်ချက်များကို www. doca. gov. mm website တွင် ဝင်ရောက်လေ့လာနိုင်ကြောင်းနှင့် Consumer Call Center No. (1535) သို့ ဆက်သွယ်မေးမြန်းနိုင်ပါကြောင်းတို့ကို အသိပညာပေးဆွေးနွေးခဲ့ကြောင်း သတင်းရရှိပါသည်။

DOCA(ဧရာဝတီ)