ပြည်ပကုန်သွယ်မှုသတင်းများ
ထိုင်းနိုင်ငံတွင် ၂၀၂၃ ခုနှစ်၊ နိုဝင်ဘာလ ၁၄ ရက်၊ အင်္ဂါနေ့၌ ကျင်းပပြုလုပ်ခဲ့သည့် ပြည်ထောင်စုအစိုးရအဖွဲ့အစည်းအဝေးသည် ပြည်တွင်းသကြားဈေးနှုန်းများကို ၁၀ ရာခိုင်နှုန်း တိုးမြှင့်အတည်ပြုခဲ့ခြင်းကြောင့် စားသုံးသူများအတွက် သကြားတစ်ကီလိုဂရမ်လျှင် ဘတ်ငွေ ၂ ဘတ်နှုန်းဖြင့် မြင့်တက်လာကြောင်းဖြင့် Bangkok Post သတင်းစာဌာနက ဖော်ပြထားသည်။
အောက်တိုဘာလတွင် စတင်ခဲ့သော ၂၀၂၃-၂၀၂၄ ဈေးကွက်ရာသီတွင် ကမ္ဘာ့သကြား ထုတ်လုပ်မှုသည် မျှော်မှန်းထားသော သကြားစားသုံးမှုအပေါ် မက်ထရစ်တန်ချိန် ၂.၄ သန်း ခန့် ရောင်းလိုအား လိုအပ်ချက် လျော့နည်းမှု ဖြစ်နိုင်ကြောင်း စီးပွားရေးအတိုင်ပင်ခံလုပ်ငန်း ဖြစ်သော CovrigAnalytics ကုမ္ပဏီ၏ အစီရင်ခံတွင် ဖော်ပြခဲ့ပါသည်။
တရုတ်နိုင်ငံတွင် စားနပ်ရိက္ခာ ဖူလုံရေးနှင့် ပြည်တွင်း၌ လုံလောက်စွာ ထုတ်လုပ်နိုင်ရေးတို့ အတွက် ကြိုးပမ်းမှုများနှင့်အတူ ၂ဝ၂၃ ခုနှစ်တွင် ကောက်ပဲသီးနှံထွက်ရှိမှုမှာ စံချိန်တင်မြင့်တက် မည်ဖြစ်ကြောင်း စိုက်ပျိုးရေးဝန်ကြီးဌာနက အစီရင်ခံစာ၌ ဖော်ပြခဲ့ပါသည်။
၂၀၂၃ ခုနှစ်၊ နိုဝင်ဘာလ၊ ပထမရက်သတ္တပတ်၌ တရုတ်စိုက်ပျိုးရေးနှင့် ကျေးလက်ရေးရာ ဝန်ကြီးဌာနမှ ထုတ်ပြန်သည့်စစ်တမ်းများအရ ဆောင်းဦးရာသီကာလတွင် ကောက်ပဲသီးနှံ ရိတ် သိမ်းပြီးစီးမှုမှာ ၉၆.၂% ခန့်ရှိကြောင်း သိရှိရပါသည်။
ကမ္ဘာ့ကော်ဖီစေ့ ထုတ်လုပ်မှုမှာ ၂ဝ၂၃ ခုနှစ် စက်တင်ဘာလတွင် ကုန်ဆုံးခဲ့သည့် ၂ဝ၂၂-၂၃ သီးနှံရာသီ၌ ဝယ်လိုအားအပေါ် ဖြည့်ဆည်းပေးရန်အတွက် ၆ဝ ကီလိုဂရမ်ဝင် အိတ်ပေါင်း ၇.၃ သန်းခန့် လိုအပ်ချက်ဖြစ်ပေါ်ခဲ့ကြောင်း အပြည်ပြည်ဆိုင်ရာကော်ဖီအဖွဲ့က ခန့်မှန်းထားပါသည်။
အဆိုပါအဖွဲ့က အောက်တိုဘာလ၌ နောက်ဆုံးထုတ်ပြန်ခဲ့သော အစီရင်ခံစာတွင် ကမ္ဘာ့ ကော်ဖီထုတ်လုပ်မှုမှာ ၂ဝ၂၁-၂၂ သီးနှံရာသီ၌ ၁.၄% ကျဆင်းလျက် အိတ်ပေါင်း ၁၆၈.၅ သန်းသာရှိ ရာမှ ၂ဝ၂၂-၂၃ သီးနှံရာသီတွင် ၁.၇% တိုးတက်ပြီး အိတ်ပေါင်း ၁၇၁.၃ သန်း ထုတ်လုပ်နိုင်မည်ဟု ခန့်မှန်းဖော်ပြထားသည်။
ထိုင်းနိုင်ငံတွင် မိုးသည်းထန်စွာ ရွာသွန်းမှုများနှင့် အစေးခြစ်ဧက လွန်စွာနည်းပါးမှုတို့အရ ယခုနှစ် သဘာဝရော်ဘာထုတ်လုပ်မှုမှာ ၈% မှ ၁၀% အထိ ကျဆင်းလျက် ၂၀၂၀ ပြည့်နှစ် နောက်ပိုင်း၌ အနိမ့်ဆုံးအဆင့်သို့ ရောက်ရှိဖွယ်ရှိကြောင်း ကုန်သည်လုပ်ငန်းရှင်များက ခန့်မှန်းလျက် ရှိပါသည်။
မိုဇမ်ဘစ်နိုင်ငံမှ နှစ်စဉ် ပဲစင်းငုံတန်ချိန် ၂ သိန်းကို ၂၀၂၅-၂၆ ခုနှစ်အထိ အိန္ဒိယနိုင်ငံသို့ တင်ပို့ရန် ကတိကဝတ်ပြုထားသည့် နှစ်နိုင်ငံ အစိုးရများအကြား လက်မှတ်ရေးထိုးထားရှိသော ပဲကုန်သွယ်မှုဆိုင်ရာ နားလည်မှုစာချွန်လွှာကို ပြန်လည်ရုတ်သိမ်းရန် အိန္ဒိယကုန်သည်များက အစိုးရသို့ တိုက်တွန်းခဲ့ကြကြောင်း သိရှိရပါသည်။
ဖိလစ်ပိုင်နိုင်ငံ၌ ၂၀၂၃ ခုနှစ် တတိယသုံးလပတ် ဇူလိုင်လမှ စက်တင်ဘာလအတွင်း စပါးစိုက်ပျိုးထုတ်လုပ်မှုသည် ဒုတိယသုံးလပတ်ထုတ်လုပ်မှု တန်ချိန် ၅.၀၃ သန်းအပေါ် ၀.၄% တိုးတက်လျက် တန်ချိန် ၅.၀၄ သန်း ထွက်ရှိခဲ့ကြောင်း ဖိလစ်ပိုင် စာရင်းအင်းအာဏာပိုင် အဖွဲ့က ပြောကြားခဲ့ပါသည်။
အဆိုပါ စပါးထွက်ရှိမှုပမာဏသည် ယခင်က ကနဦးခန့်မှန်းခဲ့သော တန်ချိန် ၃.၇၉ သန်း ထက် ၃၂.၈% မြင့်မားခဲ့ပြီး ၂၀၂၂ ခုနှစ် ကာလတူ၌ ထုတ်လုပ်မှု စပါးတန်ချိန် ၄.၉ သန်းနှင့် နှိုင်းယှဉ်ပါက ၁.၀% တိုးတက်မှုရရှိခဲ့ခြင်းဖြစ်သည်။
ဗီယက်နမ်နိုင်ငံကဲ့သို့သော ပြိုင်ဖက်နိုင်ငံများမှ ဆန်ဈေးနှုန်းများမှာ မြင့်မားလျက်ရှိရာ ထိုင်းဆန်တင်ပို့သူများအသင်းသည် ၂၀၂၃ ခုနှစ်အတွင်း ဆန်တင်ပို့ရန် လျာထားချက်ကို တန်ချိန် ၈.၅ သန်း သို့ တိုးမြှင့်ဆောင်ရွက်သွားမည်ဖြစ်ကြောင်း သိရှိရပါသည်။
ထိုင်းနိုင်ငံ၌ ဆန်စပါး အရည်အသွေး ဖွံ့ဖြိုးတိုးတက်စေရန် ရည်ရွယ်လျက် ထပ်ဆောင်း ပံ့ပိုးမှု ရန်ပုံငွေအဖြစ် ဘတ်ငွေ ၅၆ ဘီလီယံ သုံးစွဲခွင့်အား အစိုးရအဖွဲ့က အတည်ပြုခဲ့ရာ ၂၀၂၃-၂၄ ခုနှစ် သီးနှံရာသီကာလအတွင်း ဆန်စပါးကဏ္ဍအတွက် အထောက်အပံ့ပေးမည့် ရန်ပုံငွေ စုစုပေါင်း မှာ ဘတ်ငွေ ၁၁၁ ဘီလီယံသို့ တိုးတက်ခဲ့ကြောင်း သိရှိရပါသည်။
အိန္ဒိယနိုင်ငံ၌ စားသုံးသူများ၏ လွယ်လင့်တကူ ဝယ်ယူရရှိနိုင်မှုကို ပိုမိုကောင်းမွန်စေရန်နှင့် သိုလှောင်ဈေးကစားမှုများကို တားဆီးနိုင်ရန်အတွက် ပဲမျိုးစုံ တင်သွင်းသူများနှင့် လက်ကားကုန်သည်များ၏ လက်ဝယ်တွင် အများဆုံး သိုလှောင်ထားရှိနိုင်သည့် ပဲစင်းငုံနှင့် မတ်ပဲ ပမာဏကို တန်ချိန် ၅၀ သာ ခွင့်ပြုထားရာမှ တန်ချိန် ၂၀၀ သို့ တိုးမြှင့်သတ်မှတ်လိုက်ကြောင်း သိရှိရပါသည်။
မလေးရှားနိုင်ငံအနေဖြင့် တရုတ်နိုင်ငံသို့ ပို့ကုန်တင်ပို့မှုတိုးမြှင့်နိုင်ရန် မျှော်မှန်းဆောင်ရွက် လျက်ရှိရာ ယခုနှစ်အတွင်း စားအုန်းဆီပို့ကုန်တန်ဖိုး မလေးရှားရင်းဂစ် ၁၄ ဘီလီယံကျော်အထိ တင်ပို့နိုင်မည်ဟု မလေးရှား ဒုတိယဝန်ကြီးချုပ် Datuk Seri Fadillah Yusof က ပြောကြားခဲ့ ပါသည်။
တရုတ်နိုင်ငံ၏ ဝယ်လိုအားကျဆင်းမှုမှ ဆုံးရှုံးမှုဖြစ်ပေါ်ခြင်းမှာ နည်းပါးမှုရှိခဲ့သော်လည်း အိန္ဒိယ၏ စားသုံးဆီတင်သွင်းမှု နိမ့်ကျခြင်းနှင့်အတူ မလေးရှားနိုင်ငံ၌ သိုလှောင်မှုများပြားခြင်းကြောင့် မလေးရှားစားအုန်းဆီ ကြိုပွိုင့်ဈေးနှုန်းသည် ၃-၁၁-၂၀၂၃ ရက်၊ သောကြာနေ့တွင် အနိမ့်ဈေးဖြင့် ပိတ်သိမ်းခဲ့ကြောင်း Hellenic Shipping News က ဖော်ပြပါသည်။
