ပဲခူးတိုင်းဒေသကြီး ၊ တောင်ငူခရိုင်သည် စပါးစိုက်ဧက ၄၅၀၀၀၀ ကျော်ရှိပါသည်။ အချို့ လယ်မြေများတွင် မိုးစပါးသာမက နွေစပါးပါစိုက်ပျိုးနိုင်ပါသည်။ မိုးစပါးရိတ်သိမ်းသည့် အချိန် ကာလဖြစ်သည့် အောက်တိုဘာ၊ နိုဝင်ဘာလများသည်လည်းကောင်း၊ နွေစပါးစိုက်ပျိုးသည့် ဧပြီ၊ မေ လများသည်လည်းကောင်း အချိန်အခါမဟုတ် မိုးရွာသွန်းတတ်သည့် အချိန်ဖြစ်ပါသဖြင့် ရိတ်သိမ်း ထားသောစပါးများ ရေစိုမိုးမိဖြစ်တတ်ပါသည်။
ထို့အတူ စပါးပွဲစားများသည် စပါးရိတ်သိမ်းချိန်တွင် လယ်ကွင်းထဲဆင်း၍ ဝယ်ယူကြရာ တောင်သူဦးကြီးများသည် ရိတ်သိမ်းချွေလှေ့စက်မှ စပါးချသည်နှင့် အိတ်သွပ်၍ ချက်ချင်းရောင်းချ ကြသဖြင့် အစိုဓါတ်များမှာ ၂၀% ဝန်းကျင်ခန့်ရှိနေတတ်ကြပါသည်။ ၎င်းအစိုဓါတ်မြင့်မားနေသည့် စပါးများ စက်ရုံသို့ရောက်ရှိသည့်အခါ အစိုဓါတ် ၁၄% သို့ ရောက်ရှိအောင် အခြောက်ခံကြရပါသည်။ အစိုဓါတ် ၁၄% သို့ ရောက်ရှိအောင် အချိန်မီ အခြောက်ခံခြင်း မဆောင်ရွက်နိုင်ပါက ဆန်ဝါဖောက် ခြင်း၊ အပင်ပေါက်ခြင်းများ ဖြစ်တတ်ပါသည်။
တောင်ငူခရိုင်တွင် ဆန်စက်များအပြင် ဆန်အခြေခံစားသောက်ကုန်ထုတ်လုပ်ငန်းဖြစ်သော မုန့်ဖတ်ခြောက်လုပ်ငန်းများလည်း ရှိပါသည်။ မုန့်ဖတ်စိုများအား အခြောက်ခံရာတွင် အပူချိန် လုံလောက်စွာရရှိရန် လိုအပ်ပါသည်။ လုံလောက်သောအပူချိန် မရရှိပါက မုန့်ဖတ်များ ပျက်စီးပါသည်။ သို့ဖြစ်ရာ စပါးများအခြောက်ခံရာတွင်လည်းကောင်း၊ မုန့်ဖတ်များအခြောက်ခံရာတွင်လည်းကောင်း နေပူချိန် လုံလောက်စွာမရရှိသည့်အချိန်များတွင် အခြောက်ခံစက်လိုအပ်ပါသည်။ အခြောက်ခံစက်များ အသုံးပြုချိန်တွင်လည်း လုံလောက်သောလျှပ်စစ်ဓါတ်အားရရှိရန် လိုအပ်ပါသည်။
ယခုအချိန်တွင် နိုင်ငံတစ်ဝန်း၌ မဟာဓါတ်အားလိုင်းမှ လျှပ်စစ်ဓါတ်အားကို အချိန်ပြည့် အသုံးပြုနိုင်ခြင်းမရှိသေးဘဲ အချိန်အကန့်အသတ်ဖြင့်သာ အသုံးပြုရသေးခြင်းဖြစ်ရာ လုပ်ငန်းရှင်များအနေဖြင့် စပါးခွံဓါတ်ငွေ့အသုံးပြု၍ လျှပ်စစ်ဓါတ်အား ထုတ်လုပ်သည့် Gasifier များ တပ်ဆင် အသုံးပြုမည်ဆိုပါက အကျိုးဖြစ်ထွန်းမည်ဖြစ်ပါသည်။ ယခုအချိန်တွင် တောင်ငူခရိုင်အတွင်း ဆန်စက်များအပြင် မုန့်ဖတ်ခြောက်စက်ရုံများတွင်လည်း Gasifier များ တပ်ဆင်အသုံးပြုနေကြသည်ကို တွေ့ရှိရပါသည်။
တောင်ငူမြို့တွင် Gasifier တပ်ဆင်အသုံးပြုထားသော ဆန်စက်များအား လေ့လာရာတွင် Gasifier တပ်ဆင်အသုံးပြုခြင်းဖြင့် စက်များအချိန်ပြည့် လည်ပတ်နိုင်သကဲ့သို့ Gasifier ဖြင့် လည်ပတ်ခြင်း ကုန်ကျစရိတ်သည် လျှပ်စစ်ဓါတ်အားခထက် ထက်ဝက်ခန့်သက်သာကြောင်း သိရှိရပါသည်။ လုပ်ငန်းစတင်ချိန်တွင် ရင်းနှီးငွေများသော်လည်း ရေရှည်တွင် အမြတ်ရရှိပါသည်။
Gasifier စက်တပ်ဆင်အသုံးပြုရာတွင် Gasifier မှ ထွက်ရှိလာသော ရေဆိုးများကို စနစ် တကျ စွန့်ပစ်နိုင်အောင် ရေစစ်ကန်များ အဆင့်ဆင့်ပြုလုပ်ထားရှိခြင်း၊ အင်ဂျင်စက်များ အသံဆူညံခြင်းမရှိအောင် အသံလုံစနစ်များ တပ်ဆင်ထားခြင်း၊ မီးခိုးများ စနစ်တကျ ထုတ်ထားခြင်းများကိုလည်း ဆောင်ရွက်ထားရပါသည်။
ပဲခူးတိုင်းဒေသကြီးအစိုးရအဖွဲ့ ၊ ဝန်ကြီးချုပ်မှ တိုင်းဒေသကြီးအတွင်း ကုန်ထုတ်လုပ်မှု လုပ်ငန်းများ ပိုမိုဖွံ့ဖြိုးတိုးတက်ရေးဆောင်ရွက်ရာတွင် လျှပ်စစ်ဓါတ်အား လုံလောက်စွာရရှိရန် လိုအပ်သဖြင့် စပါးခွံဓါတ်ငွေ့လောင်စာသုံး လျှပ်စစ်ဓါတ်အားပေးစက် Gasifier များ ပိုမိုတိုးတက် သုံးစွဲနိုင်ရေးဆောင်ရွက်ရန် လမ်းညွှန်မှုပြုထားပါသည်။
ပဲခူးတိုင်းဒေသကြီးအတွင်း လည်ပတ်ကြိတ်ခွဲနေသော ကုန်ထုတ်လုပ်ငန်းများ လျှပ်စစ်ဓါတ်အား ဖူလုံစွာရရှိစေရန်အတွက် စပါးခွံဓါတ်ငွေ့လောင်စာသုံး လျှပ်စစ်ဓါတ်အားပေးစက် Gasifier Power Plant များ ပိုမိုတိုးတက်သုံးစွဲနိုင်ရေးအတွက် မိမိတို့ စားသုံးသူရေးရာဦးစီးဌာနနှင့်အတူ အခြားသက်ဆိုင်ရာဌာနများမှ ဆောင်ရွက်လျက်ရှိပါသည်။
ကုန်ထုတ်လုပ်မှုလုပ်ငန်းရှင်များအနေဖြင့် စပါးခွံဓါတ်ငွေ့လောင်စာသုံး လျှပ်စစ်ဓါတ်အားပေးစက် Gasifier Power Plant များကို သုံးစွဲခြင်းဖြင့် မိမိတို့၏ လုပ်ငန်းများကို အပြည့်အဝ ဆောင်ရွက်နိုင့်မည့်အပြင် ဒေသတွင်း အလုပ်အကိုင်ရရှိရေးကိုလည်း အထောက်အကူပြုနိုင်မည် ဖြစ်ပါသည်။
DOCA(ပဲခူး)