မကွေးတိုင်းဒေသကြီး၊ စားသုံးသူရေးရာဦးစီးဌာန၊ တိုင်းဒေသကြီးဦးစီးမှူး လမ်းညွှန်မှုဖြင့် စားသုံး/ ထုတ်လုံဌာနခွဲမှ ဝန်ထမ်းများသည် မကွေးမြို့ အောင်မေတ္တာရပ်ရှိ ကောင်းစိန်အမှတ်တံဆိပ် မုန့်ဖတ်ခြောက်နှင့် ကောင်းဆန်းအမှတ်တံဆိပ် အဆင့်မြင့်ခေါက်ဆွဲခြောက်လုပ်ငန်းသို့ သွားရောက်ကွင်းဆင်းလေ့လာခြင်းများ ဆောင်ရွက်ခဲ့ပါသည်။ ၎င်းလုပ်ငန်းသည် အလတ်စား စီးပွားရေး လုပ်ငန်းတစ်ခုဖြစ်ပြီး ဈေးကွက်မှာ မကွေးမြို့ပေါ်ရှိ ဈေးများသို့ ဖြန့်ဖြူးလျက်ရှိကြောင်း သိရသည်။ အဓိက ကုန်ကြမ်းမှာ ဆန်နှင့် ဆန်ထွက်ပစ္စည်းများဖြစ်သည့် ဧရာပဒေသာဆန်မှ ထွက်ရှိ သည့် ဆန်ကွဲ၊ ဆန်လတ်အစရှိသည့် ဆန်ထွက်ပစ္စည်းများကို အခြေခံ ထုတ်လုပ်ထားခြင်းဖြစ်ပါသည်။ ပထမအဆင့် အနေဖြင့် ဆန်ကွဲ(သို့)ဆန်လတ်များကို ရေဖြင့် သုံးကြိမ်ခန့် ပွတ်တိုက် ဆေးကြောရကြောင်း၊ ပြီးလျှင် ၎င်းဆန်လတ်များကို (၄၅)မိနစ်ခန့် ရေစိမ်ထားရကြောင်း၊ ဒုတိယအဆင့်အနေဖြင့် ၎င်းရေစိမ်ပြီသား ဆန်လတ်များကို (တစ်ခါကြိတ်လျှင် (၁၂)ပြည်ဆန့်) မုန့်ကြိတ်စက်ဖြင့် မုန့်အနှစ်များရအောင် နှစ်ပြန် ကြိတ်ရပါကြောင်း၊ ပြီးလျှင် မုန့်အနှစ်များကို လွန်အိုးထဲထည့်ကာ မုန့်အမျှင်များရအောင် ပြုလုပ်ရ ကြောင်း၊ ၎င်းမုန့်အမျှင်များကို သင့်တော်သော အချိုးအဆအတိုင်း ဖြတ်တောက်ပြီးလျှင် တန်းများဖြင့် အခြောက်လှန်းရကြောင်း၊ အခြောက်လှန်းသည့်အခါ နေပူလျှင် တစ်မနက်ထဲဖြင့်ခြောက်ပြီး မိုးအုံလျှင် တော့ တစ်နေကုန်လှန်းရကြောင်း သိရှိရပါသည်။
အခြောက်လှန်းပြီးခြောက်သွေ့သော မုန့်ဖတ်များကို စက္ကူများဖြင့်လိပ်ကာ (၂၅)ကျပ်သား တစ်ထုပ်ထုပ်၍ တစ်ပါကင်လျှင် အထုပ်(၂၀)၊ အထုပ်(၄၀) အစရှိသဖြင့် အိတ်များဖြင့် ထုပ်ပိုးရ ကြောင်း၊ ဆန်ခေါက်ဆွဲ အထုပ်(၂၀)ပါ ပါကင်တစ်အိတ်လျှင် ၃၁၀၀ဝိ/ကျပ်၊ မုန့်ဖတ်ခြောက် အထုပ်(၂၅)ထုပ်ပါ ပါကင်တစ်အိတ်လျှင် ၂၄၀၀ဝိ/-ကျပ်နှုန်းဖြင့် မကွေးမြို့ပေါ်ရှိ ဈေးများတွင် တင်ပို့ ဖြန့်ဖြူးလျက်ရှိပါကြောင်း၊ ကျန်ရှိသည့် အလေအလွင့်များကိုမူ ဝက်စာအဖြစ် ရောင်းချကြောင်း သိရှိရသည်။ ဆန်လတ်များကို ဝယ်သည့်အခါ ဆန်လတ်တစ်အိတ်လျှင် (၇၇၀၀ဝိ/-) ကျပ်ဖြင့် ဆန်စက်များမှ ဝယ်ရပြီး ဆန်လတ်တစ်အိတ်လျှင် မုန့်ဖတ်(၂၈)ပိဿာထွက်ရှိကြောင်း၊ အလေအလွင့်များအနေဖြင့်ကတော့ တစ်အိတ်လျှင် (၂)ပိဿာ ခွဲခန့်ထွက်ရှိကြောင်း လုပ်ငန်းရှင်ပြောကြားချက်အရ သိရှိရပါသည်။ ပျမ်းမျှ တစ်ရက်လျှင် မုန့်ဖတ်ခြောက်ပိဿာ (၂၀၀)မှ (၁၅၀)ကြား ထွက်ရှိပြီး နွေရာသီတွင်မူ တစ်ရက်လျှင် ဆန်လတ်အိတ်(၂၅)အိတ်ခန့် ကုန်ကြောင်း၊ ၎င်းရာသီတွင် အော်ဒါအမှာများလည်းရှိကြောင်း၊ အလှူအတန်းအတွက် အော်ဒါမှာကြသည်ကများကြောင်းလည်း သိရှိရပါသည်။
အလုပ်အမားဦးရေ(၁၂)ဦးခန့်ရှိပြီး အမျိုးသားလုပ်သားတစ်ဦးလျှင် တစ်နေ့လုပ်အားခ (၈၀၀ဝိ/-)၊ အမျိုးသမီးလုပ်သားတစ်ဦးလျှင် တစ်နေ့လုပ်အားခ(၇၀၀ဝိ/-)ဖြင့်လည်းကောင်း ရက်ချင်းရှင်းပေး ကြောင်းလည်း သိရှိရပါသည်။ အလုပ်ချိန်မှာ နံနက်(၀၇:၀၀)နာရီမှ ညနေ(၄:၀၀)နာရီထိဖြစ်ကြောင်းလည်း သိရပါသည်။
လုပ်ငန်းစတင်သည်မှာ (၆)နှစ် (၇)နှစ်ခန့်ရှိပြီး ကိုဗစ်ချေးငွေယူ၍ လုပ်ငန်း လုပ်ကိုင်ရာတွင် အဆင်ပြေမှုရှိသော်လည်း အခက်အခဲအနေဖြင့် နေရာအခက်အခဲရှိကြောင်း၊ နေရာကျယ်ကျယ် ဝန်းဝန်းလိုကြောင်း၊ ယခုဆိုလျှင် မြေငှားခတစ်ဝိုင်း တစ်လ (၁၀၀၀၀ဝိ/-)နှုန်းဖြင့် ပေ(၆၅)ပတ်လည် ဝိုင်း(၃)ဝိုင်းကို ငှားရမ်း၍ လုပ်ကိုင်နေရကြောင်းလည်း သိရသည်။ အကြမ်းဖျင်းအားဖြင့်တွက်ကြည့်လျှင် တစ်လအတွင်း ဆန်လတ်အိတ်ဝယ်ယူခ၊ အလုပ်သမားခ၊ မီးစက်ပျက်သည့်အချိန်တွင် မီးစက် မောင်းနှင်ခြင်းအတွက် စက်သုံးဆီဝယ်ယူခြင်း၊ ပါကင်ထုပ်ပိုးခ၊ ဈေးကွက်သို့တင်ပို့သည် ကားခများ၊ အထွေထွေကုန်ကျစရိတ်များကို နှုတ်ပါက တစ်လအမြတ်ငွေ သိန်း(၂၀)ခန့်ရရှိသဖြင့် လုပ်ငန်းလုပ်ကိုင်သူအနေဖြင့် အကျိုးအမြတ်ရရှိသော စီးပွားရေး လုပ်ငန်းတစ်ခုဖြစ်သည့်အပြင် အလုပ်အကိုင် အခွင့်အလမ်း ဖန်တီးပေးလျက်ရှိသော လုပ်ငန်းတစ်ခုဖြစ်ကြောင်း လေ့လာသိရှိရပါသည်။
ဒေသတွင်း တန်ဖိုးမြှင့်ထုတ်ကုန်များ ထုတ်လုပ်လာရေး၊ နိုင်ငံ့စီးပွားရေး၏ အဓိက မောင်းနှင်အားဖြစ်သော အသေးစား၊ အငယ်စား၊ အလတ်စား စီးပွားရေးလုပ်ငန်းများ၏ ကုန်ထုတ်လုပ်မှု ကဏ္ဍဖွံ့ဖြိုးတိုးတက်ရေးအားပေးဆောင်ရွက်ခြင်းသည် ပြည်သူလူထု၏ လူမှုစီးပွားဘဝများကို မြင့်မားလာစေရေးကိုလည်း အထောက်အကူဖြစ်စေပါသည်။ သက်ဆိုင်ရာဌာနဆိုင်ရာမှ တာဝန်ရှိသူများ၊ လုပ်ငန်းရှင်များ အစရှိသဖြင့် ဘက်ပေါင်းစုံမှဝိုင်းဝန်းပူးပေါင်းပြီး အောင်မြင်မှုရရှိအောင် ဆောင်ရွက်ခြင်း ဖြင့်လည်း နိုင်ငံစီးပွားတိုးတက်လာရေးကို တဖက်တလမ်းမှ အထောက်အပံ့ဖြစ်စေမည်ဖြစ်ပါသည်။ ပြည်ပမှတင်သွင်းလာသည့် စားသောက်ကုန်များနှင့်ယှဉ်ပြိုင်နိုင်ရေး ထုပ်ပိုးမှု၊ အရည်အသွေး၊ အနံ့အရသာ စသည်တို့ ပိုမိုကောင်းမွန်အောင်မြှင့်တင်ရေး၊ ဆန်းသစ်တီထွင်နိုင်ရေးနှင့် အရည်အသွေးကို ပိုမိုမြှင့်တင်နိုင်ရန်လည်း အသေးစားစက်မှုလုပ်ငန်းဦးစီးဌာန၊ အစားအသောက်နှင့်ဆေးဝါးကွပ်ကဲရေးဦးစီးဌာနနှင့် စားသုံးသူရေးရာဦးစီးဌာနမှလည်း ကွင်းဆင်းစစ်ဆေး၍ လိုအပ်သည့်နည်းပညာ၊ အကူအညီများပံ့ပိုးပေးလျက်ရှိသည့်အပြင် ဈေးကွက်ရရှိရေး လိုအပ်သည့် ကုန်အညွှန်းအမှတ်အသားများ ပြည့်စုံစွာ ထည့်သွင်းလာရေး ပံ့ပိုးကူညီချိတ်ဆက်ပေးခြင်းများ ဆောင်ရွက်လျက်ရှိသည့်အတွက် ပြည်တွင်း ဈေးကွက်တွင်သာမက ပြည်ပဈေးကွက်အထိ တိုးမြှင့်တင်ပို့ရောင်းချနိုင်ရေး၊ တန်ဖိုးမြှင့်ထုတ်လုပ်မှု တန်ဖိုးမြှင့်ထုတ်လုပ်မှုလုပ်ငန်းများတွင် ပိုမိုရင်းနှီးမြှုပ်နှံနိုင်ရေး၊ MSME လုပ်ငန်းများဖွံ့ဖြိုးတိုးတက်ရေးအတွက် လိုအပ်ချက်များဖြည့်ဆည်းပေးနိုင်ရေး၊ ဘေးအန္တရာယ်ကင်းရှင်းပြီး ကျန်းမာရေးနှင့်ညီညွှတ်သော စံချိန်စံညွှန်း၊ အရည်အသွေးတို့ပြည့်မီကောင်းမွန်သည့် စားသောက်ကုန်များထုတ်လုပ်လာရေး အားလုံးဝိုင်းဝန်ပူးပေါင်း ဆောင်ရွက်ပေးသွားရန်လည်း လိုအပ်မည်ဖြစ်ပါကြောင်း တင်ပြလိုက်ရပါသည်။
DOCA(မကွေး)