မကွေးတိုင်းဒေသကြီး၊ ဂန့်ဂေါခရိုင်၊ ယောနယ်ဒေသမှထွက်ရှိသည့် တင်းဝါးများကို ကျောက်ထု၊ ပေါက်၊ ဂန့်ဂေါ၊ ဆောမြို့နယ်များရှိ ရွာများမှပြုလုပ်ကြောင်း ဒေသခံတစ်ဦးထံမှ သိရှိရပါသည်။ တင်းဝါးသည် မြန်မာတို့၏ ရိုးရာအစားအစာတစ်ခုဖြစ်ပြီး မိုးအကုန် ဆောင်းဦးတွင် ပေါ်သောရာသီစာလည်းဖြစ်ပါသည်။ တင်းဝါး(ခေါ်)ကောက်ညှင်းကျည်ထောက်ကို ပြုလုပ်ရာတွင် အဓိကလိုအပ်သောပစ္စည်းများမှာ တင်းဝါး၊ ကောက်ညှင်းဆန်၊ ငချိတ်ကောက်ညှင်းဆန်တို့ဖြစ်ပြီး တင်းဝါးတစ်လုံးလျှင် ကျပ် (၇၀၀)၊ ကောက်ညှင်းဆန်တစ်ပြည်လျှင် ကျပ်(၈၅၀၀-၉၀၀၀)ပေးရပြီး တင်းဝါးကို အရှည်(၁၈)လက်မ ဖြတ်ပြီး အပေါ်ယံအခွံများကို ခွာရကြောင်း၊ ကောက်ညှင်းဆန်ကို ရေဆေးပြီး ပွလာအောင်(၄)နာရီခန့် ရေစိမ်၍သော်လည်းကောင်း၊ ရေနွေးဖြင့်စိမ်၍သော်လည်းကောင်း ပြုလုပ်၍ တင်းဝါး၏အတွင်းထဲသို့ ရေနှင့်ဆေးပြီး ကောက်ညှင်းဆန်များထည့်၍ အပေါ်ယံလက် တစ်ဆစ်ချန်ကာ တင်းဝါး၏အဝကို ငှက်ပျောဖတ်ဖြင့်သော်လည်းကောင်း၊ ကောက်ရိုးများဖြင့်သော် လည်းကောင်းအုပ်ရကြောင်း၊ တင်းဝါးများကိုစောင်းကာ မီးဖိုထားသောသံချောင်းပေါ်တွင် ကောက်ညှင်း ဆန်ကျက်သည်အထိ မီးအေးအေးဖြင့် မိနစ်(၃၀)ခန့်ဖုတ်ရကြောင်း၊ မီးဖုတ်ပြီးရရှိသော ကောက်ညှင်းကျည်ထောက်များကို နေရာဒေသအနှံ့အပြားတွင်တင်ပို့ကြောင်း သိရှိရပါသည်။
တင်းဝါး(ခေါ်)ကောက်ညှင်းကျည်ထောက်၏ ဈေးနှုန်းမှာ ယခင်ကတစ်လုံးလျှင် ကျပ်(၇၀၀-၈၀၀)ရှိခဲ့ပြီး ယခု၂၀၂၃ခုနှစ်၊ နိုဝင်ဘာလတွင် ကောက်ညှင်းတင်းဝါးတစ်လုံးလျှင် ကျပ်(၂၀၀၀)၊ ငချိတ်တင်းဝါးတစ်လုံးလျှင် ကျပ်(၂၅၀၀)ပေးရကြောင်း ဒေသခံတစ်ဦးထံမှ သိရှိရပါသည်။
DOCA(မကွေး)