![](http://www.doca.gov.mm/sites/default/files/styles/consumer_inner_image__847x424_/public/Shan.png?itok=P_rK2yuh)
ရှမ်းပြည်နယ်(တောင်ပိုင်း)၊ ပင်းတယမြို့နယ်၊ ပင်လောင်းမြို့နယ်တို့တွင် နှစ်စဉ်အမြောက် အများ စိုက်ပျိုးသော နှမ်းလုံးသီးနှံမှာ ယခင်နှစ်တွင် ဈေးကွက်ကောင်းရရှိနေပြီး ဒေသတွင်း တောင်သူများ အကျိုးအမြတ်ကောင်းစွာ ရရှိနေကြောင်းသိရှိရပါသည်။ နှမ်းလုံးသီးနှံအား ဇူလိုင်လတွင် ပျိုးခင်းထောင်၍ ပျိုးသက်တစ်လတွင် စိုက်ခင်းပေါ် ရွှေ့ပြောင်းစိုက်ပျိုးရသည်။ စိုက်ခင်းထိန်းသိမ်းပြုစုခြင်း၊ ရိတ်သိမ်းခြင်းလုပ်ငန်းများမှာ အခြားသီးနှံများထက် လွယ်ကူသက်သာစေခြင်းတို့ကြောင့် တိုးချဲ့စိုက်ပျိုးလျက်ရှိကြောင်း သိရှိရပါသည်။ သီးနှံသက်တမ်း (ဇူလိုင်လ မှ နိုဝင် ဘာလအထိ) (၅)လသာရှိပြီး စိုက်ပျိုးမှု တစ်ဧကလျှင်(၃၂၀)ပိဿာခန့် ထွက်ရှိပါသည်။ နှမ်းလုံး သီးနှံ၏ ၂၀၂၀ခုနှစ် အမြင့်ဆုံးဈေးနှုန်းမှာ တစ်ပိဿာလျှင်(၆၇၀၀)ကျပ်ထိရှိခဲ့ရာမှ (၂၀၂၁)ခုနှစ်၏ လက်ရှိကာလပေါက်ဈေးမှာ တစ်ပိဿာလျှင်(၈၂၀၀)ကျပ်ရှိနေကြောင်း သိရှိရပါသည်။ တရုတ်နှင့် ကိုးရီးယားနိုင်ငံများသို့ အဓိကတင်ပို့လျက်ရှိပြီး အဆင့်မြင့်မုန့်လုပ်ငန်းများတွင် သုံးစွဲကြောင်း သိရှိရပါသည်။ ဒေသတွင်းတွင် ရိုးရာဒေသအစားအစာဖြစ်သော ခေါပုတ်များတွင် အများဆုံး အသုံးပြုပါသည်။ စိုက်ပျိုးစရိတ်နည်းပါးခြင်း၊ ခိုင်မာသောပြည်တွင်း၊ ပြည်ပဈေးကွက်ရှိခြင်း၊ တည်ငြိမ်သောဈေးနှုန်း ရရှိခြင်းတို့ကြောင့် တိုးချဲ့စိုက်ပျိုးသင့်သော ပြည်ပပို့ကုန် နှမ်းလုံးသီးဖြစ်ကြောင်း လေ့လာသိရှိရပါသည်။
စားသုံးသူရေးရာဦးစီးဌာန
ရှမ်းပြည်နယ်