တိုက်ကြီးမြို့နယ်သည် စိုက်ပျိုးရေးကိုအဓိကထား၍ စီးပွားရေးလုပ်ကိုင်ဆောင်ရွက်နေသောမြို့များအနက် တစ်မြို့ဖြစ်သည့်အလျောက် လူဦးရေနေထိုင်မှုများပြားပြီး ကူးသန်း ရောင်းဝယ်ရေးလည်း လွယ်ကူသောမြို့တစ်မြို့ဖြစ်သည့်အတွက် စပါးစိုက်ပျိုးထုတ်လုပ်မှုအပြင် သီးပင်စားပင်အများအပြားကိုလည်းစိုက်ပျိုးလျက်ရှိပါသည်။ စားသုံးသီးပင်များအနက် လူအများကြိုက်နှစ်သက်သော ကန်စွန်းဥကို ဧက (၃၁၀) စိုက်ပျိုး၍ တစ်ဧကလျှင် (၁၁၀၀) ပိဿာထွက်ရှိကြောင်းသိရှိရပါသည်။ ထို့ပြင် ကန်စွန်းဥသည် မြေလွတ်၊ မြေရိုင်းများတွင် ပိုမိုဖြစ်ထွန်း၍ ဖုန်းဆိုးမြေများတွင်လည်းစိုက်ပျိုးရရှိသောကြောင့် မြေရိုင်းများအလဟသမဖြစ်စေဘဲ ပြည်သူများစားသုံးနိုင်ရန်အတွက် စိုက်ပျိုးထုတ်လုပ်ခြင်းဖြစ်ပါသည်။ တပေါင်းလနှင့်တန်ခူးလတို့တွင် တောခုတ်မီးရှို့ထားပြီး နတ်တော်လနှင့်ပြာသိုလတို့တွင် ထယ်ထိုးထွန်မွှေ၍ လက်သန်း၊ လက်မ၊ ဥငယ်များကို မြေမြှုပ်၍ပျိုးထောင်ရပါသည်။ တစ်ဧကလျှင် (၆)ပေပန္နက်ချ၍ အပုံ (၁၂၀၀) ခန့်ပန္နက်ရိုက်ပြီး (၃) ပေ၊ (၂) လက်မခန့် မြေပုံအဝိုင်းများပုံ၍ စိုက်ပျိုးရပါသည်။ တစ်ဧကတွင် မြေပုံ (၁၂၀၀) ခန့်ထွက်၍ တစ်ပုံလျှင် (၂၅၀) ပင်မှ (၃၀၀) ပင်ဆန့်ပြီး ဝါဆိုလမှ (၄) လခန့်ကြာစိုက်ပျိုးခဲ့ပြီးနောက် သီတင်းကျွတ်လနှင့် တန်ဆောင်မုန်းလတို့တွင် ကန်စွန်းဥများလှိုင်လှိုင်ပေါ်၍ မိသားစုစားသုံးခြင်း၊ ဈေးကွက်သို့ဖြန့်ဖြူးရောင်းချခြင်း၊ ဖောက်သည်ပေးခြင်းဖြင့် ကန်စွန်းဥတစ်ပိဿာလျှင် (၂၀၀၀/၂၅၀၀) ကျပ်ဖြင့်ရောင်းဝယ်ဖောက်ကားနေရပြီး တစ်အိတ်လျှင် အချိန် (၃၀) ထည့်၍ ကြီး/လတ်/သေးခွဲ၍ရောင်းချပြီး တစ်နိုင်တစ်ပိုင်လုပ်ကိုင်လျက်ရှိကြောင်းသိရှိရပါသည်။
DOCA(ရန်ကုန်)