မကွေးတိုင်းဒေသကြီး၊ ပခုက္ကူခရိုင်၊ ရေစကြိုမြို့နယ်ကို သဘာဝပထဝီအနေအထားအရ ကုန်းပိုင်း၊ ကုန်းတစ်ပိုင်းကျွန်းတစ်ပိုင်း၊ ကျွန်းပိုင်းဟူ၍ အပိုင်း (၃)ပိုင်းခွဲခြားထားကြောင်း၊ ရေစကြို /ပခုက္ကူကားလမ်းမ၏ အနောက်ဘက်ခြမ်းအား ကုန်းပိုင်း၊ ချင်းတွင်းမြစ်နှင့် ဧရာဝတီမြစ်၏ အနောက်ဘက်ခြမ်း၊ ရေစကြို/ ပခုက္ကူကားလမ်းမ၏ အရှေ့ဘက်ခြမ်းကို ကုန်းတစ်ပိုင်း ကျွန်းတပိုင်း၊ ချင်းတွင်းမြစ်၏အရှေ့ဘက် ဧရာဝတီမြစ်နှင့် ချင်းတွင်းမြစ်တို့ ပေါင်းစုံရာနေရာကို ကျွန်းပိုင်းဟုခေါ် ဆိုကြပါသည်။ ကုန်းပိုင်းတွင် မိုးသီးနှံများဖြစ်သည့် မြေပဲ၊ နှမ်း၊ ပဲတီစိမ်း၊ ပဲစဉ်းငုံ၊ ငရုတ်နှင့်ဝါသီးနှံများကို စိုက်ပျိုးကြပါသည်။ မိုးသီးနှံများထဲတွင် တောင်သူများတွက်ခြေကိုက်သည့် ငရုတ်သီးနှံများကို စိုက်ပျိုးလျက်ရှိကြောင်းသိရှိရပါသည်။ ငရုတ်သီးနှံများကို စိုက်ပျိုးသည့် ဆင်ချောင်း၊ ကုန်းတလင်း၊ မြေဖြူ၊ ဂွေးချို၊ စည်သာ၊ လက်ပံပင်၊ ကံစွယ်၊ သာစည်၊ ဆည်ရွာကျေးရွာများတွင် အများအပြားစိုက်ပျိုးထားရှိကြောင်း ကုန်းတလင်းကျေးရွာနေ တောင်သူတစ်ဦး၏ ပြောပြချက်အရသိရှိရပါသည်။
ငရုတ်မျိုးများအနေဖြင့် ကျောက်စိမ်း (ငရုတ်တို၊ ငရုတ်ရှည်)၊ ငရုတ်ပုနှင့် ဒေသခေါ် ဆင်ခြေယာငရုတ်မျိုးများကို ၂၀၂၃ခုနှစ်၊ ဩဂုတ်လတွင် စတင်စိုက်ပျိုးကြကြောင်း၊ မိမိအနေဖြင့် (၇)ဧကစိုက်ပျိုးထားရှိကြောင်း၊ (၁)ဧကအနေဖြင့် မျိုးစေ့ (၂)ဘူး၊ ကျဲပတ်ပေါင်မှာ အလျား (၃၀)ပေ၊ အနံ (၃)ပေခန့်ရှိသော ပျိုးပေါင် (၅)ပေါင်ခန့်ဖြင့်စိုက်ရကြောင်း၊ (၁)ပေါင်လျှင် ကျပ်(၅၀၀၀၀)ပေးရပြီး ထွန်ယက်ခ၊ စိုက်စရိတ်၊ သွင်းအားစု၊ ခူးဆွတ်ရိတ်သိမ်းခြင်းတို့အတွက် စုစုပေါင်းကုန်ကျစရိတ်မှာ ကျပ်(၁၀)သိန်းခန့်ကုန်ကျပြီး အထွက်နှုန်းအနေဖြင့် (၁)ဧကလျှင် ငရုတ်စို(၁၅၀မှ ၂၀၀) တင်းထွက်ရှိပြီး ငရုတ်ခြောက်(၁၀၀မှ ၁၅၀)တင်းခန့်ထွက်ရှိကြောင်း၊ ဈေးနှုန်းဈေးကွက်ပေါ်မှုတည်၍ အခြောက်မထားဘဲ အစိုခူးစွတ်၍လည်းရောင်းချကြောင်း၊ ဒီဇင်ဘာလ(ဒုတိယပတ်)တွင် (၁)ပိဿာလျှင် ကျပ်(၄၅၀၀မှ ၅၀၀၀)ခန့်ဖြင့်ရောင်းရပြီး ငရုတ်ခြောက်အနေဖြင့် (၁)တင်းလျှင် ကျပ်(၁၂၀၀၀မှ ၁၅၀၀၀)ခန့်ရရှိကြောင်း၊ အကျိုးအမြတ်အနေဖြင့် ကျပ်(၇)သိန်းခန့်ရရှိကြောင်း စိုက်ပျိုးတောင်သူ၏ ပြောကြားချက်အရသိရှိရပါသည်။
DOCA(မကွေး)