ပဲခူးတိုင်းဒေသကြီး၊ ပြည်မြို့နယ်ရှိ ကျေးရွာများဖြစ်သော မှော်ဇာ၊ တောင်လုံးညို၊ ရှမ်းစု၊ ဇီးဖြူကုန်းစသည့် ကျေးရွာများတွင် အများဆုံးစိုက်ပျိုးပြီး ဒေသနှင့်ကိုက်ညီသည့်ရာသီစာ မုန်ညင်းများ စိုက်ပျိုးရောင်းခြင်းဖြင့် နှစ်စဉ်ဝင်ငွေများရရှိလျက်ရှိကြောင်း သိရှိရပါသည်။
တောင်လုံးညိုကျေးရွာတွင် ယိုးဒယားမျိုး မုန်ညင်းအမျိုးအစားများ စိုက်ပျိုးကြပြီး အဖူးမုန်ညင်း၊ အပင်မုန်ညင်း ဟူ၍(၂)မျိုးရှိပြီး အစေ့ထုတ်များကို ဝယ်ယူ၍ စိုက်ပျိုးကြောင်း တောင်သူ ဦးခင်မောင်လင်းထံမှ မေးမြန်းသိရှိရပါသည်။ မုန်ညင်းမျိုးစေ့ တစ်ထုတ်လျှင် (၂၅၀၀ - ၃၀၀၀) ရှိကြောင်း၊ မျိုးစေ့တစ်ထုတ်လျှင် အပင်ပေါက် (၁၀၀၀)ကျော်ရရှိကြောင်း သိရှိရပါသည်။ မုန်ညင်းပင်သည် အအေးကြိုက်သော အပင်မျိုးဖြစ်သောကြောင့် အအေးဒဏ်ကို ခံနိုင်ရည်ရှိသည်။ အစိုဓါတ် လုံလုံလောက်လောက်ရရှိရန် လိုအပ်ပါသည်။ မုန်ညင်းကို မေလမှ ဒီဇင်ဘာလအထိ စိုက်ပျိုး နိုင်ကြောင်း သိရှိရပါသည်။
ဈေးကွက်အနေဖြင့် ပြည်မြို့နယ်အတွင်းရှိ ဈေးများအပြင် ရန်ကုန်သို့လည်းတင်ပို့ပြီး ဒေသထွက်ရာသီစာ လက်ဆောင်အဖြစ် ဝယ်ယူကြကြောင်းလည်း သိရပါသည်။ မုန်ညင်းဖူးများကို ပေါင်း၍ မြို့ပေါ်ရပ်ကွက်များသို့ လှည့်လည်ရောင်းချမှုများလည်း ရှိပါသည်။ ဈေးနှုန်းများအနေဖြင့် မုန်ညင်းဖူး အသေးစည်းလေး(၅)စည်းပါ တစ်တွဲလျှင် (၅၀၀)ကျပ်ဖြင့် ရောင်းချကြောင်း သိရပါသည်။ရာသီစာ မုန်ညင်းဖူးများကို စိုက်ပျိုးရောင်းချခြင်းဖြင့် မိသားစု နှစ်စဉ်ဝင်ငွေရရှိကာ စီးပွားရေးအတွက် တစ်ဖက်တစ်လမ်းမှ ဝင်ငွေများရရှိလျက်ရှိကြောင်း လေ့လာသိရှိရပါသည်။
DOCA(ပဲခူး)