သီဟိုဠ်သီးပင်သည် နှစ်ရှည်ပင်ဖြစ်ပြီး ဝင်ငွေကောင်းသောအပင်မျိုးဖြစ်ပါသည်။ သီဟိုဠ်ပင်စိုက်ပျိုးရာတွင်အစေ့အား အပင်ငယ်လေးအဖြစ်ပျိုး၍ စိုက်ပျိုးကြပါသည်။ အပင်စတင် စိုက်ပျိုးပြီး (၃)နှစ်ကြာလျှင်အသီးများ စတင်ထွက်ပေါ်လာပြီဖြစ်ပါသည်။ အပင်မှထွက်ရှိသော အသီး၏အရောင်မှာ အနီရောင်နှင့်အဝါရောင်(၂)မျိုးရှိကြောင်းသိရပြီး အသားမှာ ခပ်ပွပွဖြစ်၍ စားလိုက်လျှင် အရည်ရွှမ်းသောအသီးမျိုးဖြစ်ပါသည်။ အသီးပုံစံမှာ ကျောက်ကပ်ပုံ၊ ဘောက်ဆင်လက်အိတ်ပုံရှိပြီး အသီးအသီး၏အပြင်ဘက်တွင် အစေ့တစ်စေ့သာပါရှိသော အခွံမာအသီး ဖြစ်ပါသည်။
သီဟိုဠ်ပင်မှထွက်ရှိသောအသီးကို အသုံးပြုသူနည်းပြီး အစေ့ကိုသာရောင်းချကြပါသည်။ သီဟိုဠ်စေ့ကို စားသောက်ကုန်လုပ်ငန်း၊ လောင်စာဆီ၊ ဆေးဝါးထုတ်လုပ်သည့်နေရာများ၌ အဓိကထားပြီး ကုန်ကြမ်းအဖြစ်အသုံးပြုကြပါသည်။ သီဟိုဠ်ပင်စိုက်ပျိုးရာဒေသများမှာ မြန်မာနိုင်ငံအနှံ့အပြားတွင်ရှိသော တောင်ကုန်းများတွင်စိုက်ပျိုးကြပြီး ရခိုင်ပြည်နယ်၊ အမ်းမြို့တွင် စိုက်ပျိုးပြီး ပြည်မြို့နယ်၊ တပေါင်းကန်ကျေးရွာ၊ မုဋောကျေးရွာများတွင် တစ်နိုင်တစ်ပိုင်စီးပွားဖြစ်စိုက်ပျိုးကြပါသည်။ သီဟိုဠ်သီးအစေ့ဈေးနှုန်းအနေဖြင့် အစိုတစ်ပိဿာလျှင် ၃၅၀၀ကျပ်မှ ၄၀၀၀ကျပ်ဈေးနှုန်းရှိကြောင်းသိရပါသည်။ သီဟိုဠ်သီးများအား ပွဲစားများက လာရောက်ဝယ်ယူကြောင်းသိရှိရပြီး ရန်ကုန်နှင့်မန္တလေးမြို့များသို့ ပြန်လည်တင်ပို့ကြောင်းသိရှိရပါသည်။
DOCA(ပဲခူး)