ပြည်ခရိုင်အတွင်းရှိ ပြည်ဈေးကွက်သို့ ဆောင်းမြေပဲဆံများကို ပြည်မြို့အနီးတဝိုက်ရှိကျေးရွာများ၊ ပြည်-အောင်လံကြားရှိ ကျေးရွာများနှင့် ရွှေတောင်မြို့၊ ကျေးရွာများဖြစ်သော ကျီးသဲ၊ ညောင်စာရေးကျေးရွာများမှ နေ့စဉ် ပိဿာ(၃၀)ဝင်အိတ် (၇၀၀/၈၀၀) ခန့်ဝင်ရောက်မှုရှိပါသည်။ ပြည်ဈေးကွက်သို့ဝင်ရောက်လာသော မြေပဲဆံများကို ရန်ကုန်၊ မန္တလေးဝယ်လက်များနှင့် ဒေသတွင်းဆီစက်သမားများက အဝယ်ရှိ၍ နေ့စဉ် အရောင်းအဝယ်ဖြစ်လျက်ရှိပါသည်။
ပြည်ခရိုင်အနေဖြင့် (၂၀၂၃-၂၀၂၄) ဘဏ္ဍာနှစ်တွင် မိုးမြေပဲစိုက်ဧကမှာ ၄၁၃၀၈ဧကစိုက်ပျိုးပြီး ၄၁၃၀၈ဧကရိတ်သိမ်းခဲ့၍ တစ်ဧကအထွက်နှုန်းမှာ (၇၀.၁၇)တင်းထွက်ရှိခဲ့ပါသည်။ ယခုအချိန်တွင် ဆောင်းမြေပဲများစိုက်ပျိုးနေချိန်ဖြစ်၍ စိုက်ဧက ၃၁၀၁၄ဧကစိုက်ပျိုးထားရှိကြောင်းသိရပါသည်။ စိုက်ပျိုးသည့်မျိုးများမှာ စပိန်မျိုး၊ ရေဆင်းမျိုး၊ တွန်တာနီ၊ ဆင်းပဒေသာနှင့် မကွေးမျိုးတို့ဖြစ်ပါသည်။
မြေပဲဆံဈေးနှုန်းများအနေဖြင့် ယခုဇန်နဝါရီလ ဒုတိယပတ်တွင် ဆီဆံ(အဖြူ) တစ်ပိဿာလျှင် ၆၅၀၀ကျပ်၊ ဆီဆံ(အနီ)တစ်ပိဿာလျှင် ၇၂၀၀ကျပ်နှင့် လုံးဆံ(အဖြူ)တစ်ပိဿာလျှင် ၇၀၀၀ကျပ်၊ (အနီ)တစ်ပိဿာလျှင် ၇၈၀၀ကျပ်ဖြင့် ပြည်ဈေးကွက်ရှိ ပွဲရုံများတွင် လက်လီ/ လက်ကားရောင်းချလျက်ရှိပါသည်။ ၂၀၂၃ခုနှစ်၊ ဇန်နဝါရီလဆန်းပိုင်းတွင် ရောင်းချခဲ့သော မြေပဲဆန်ဈေးနှုန်းများမှာ ဆီဆံတစ်ပိဿာလျှင် ၄၃၀၀ကျပ်၊ လုံးဆန်တစ်ပိဿာလျှင် ၅၅၀၀ကျပ်ဖြင့် မန္တလေးဝယ်လက်များနှင့် မြို့တွင်းဆီစက်များက ဝယ်ယူမှုရှိခဲ့ပါသည်။ ထိုကြောင့် မြေပဲဆံဈေးနှုန်းများကို ယခင်နှစ်နှင့် ယခုနှစ်ကာလတူအချိန် ဈေးနှုန်းတို့ကိုနှိုင်းယှဉ်ကြည့်လျှင် ယခုနှစ်တွင် ဈေးနှုန်းပိုမိုမြင့်တက်လာကြောင်းတွေ့ရှိရပါသည်။ ထိုသို့ ဈေးနှုန်းများမြင့်တက်လာရခြင်းမှာ ဝယ်လိုအားအပေါ်မူတည်၍ ဈေးနှုန်းအတက်အကျရှိကြောင်းသိရပါသည်။
DOCA(ပဲခူး)