ပဲခူးတိုင်းဒေသကြီး၊ ပြည်ခရိုင်၊ ရွှေတောင်မြို့နယ် အင်ကြင်းစင်ကျေးရွာတွင် ကြယ်ဖြူပန်းများ စိုက်ပျိုးထားရှိသဖြင့် ရွှေတောင်မြို့နယ်တာဝန်ခံနှင့် ဝန်ထမ်းများသည် သွားရောက် လေ့လာခဲ့ရာ တောင်သူ ဦးလှထွန်းမြင့် မှ စိုက်ပျိုးထားသော ကြယ်ဖြူပန်းများကို ပြင်ဦးလွင်မှ တစ်ပင်လျှင် (၁၀)ကျပ်နှုန်းဖြင့် အပင်ရေ(၁၅၀၀)ခန့်ကို ဝယ်ယူစိုက်ပျိုးထားကြောင်း သိရှိရပါသည်။ ကြယ်ဖြူပန်းစိုက်ပျိုးထုတ်လုပ် ကုန်ကျစရိတ်အနေဖြင့် (၅)သိန်းခန့်ကုန်ကျပြီး နတ်တော်လဆန်းမှ စတင်၍စိုက်ပျိုးကာ တပို့တွဲလဆန်းတွင် ခူးယူရောင်းချရပါသည်။ ပန်းများ ထွက်ပေါ်ချိန်တွင် ပန်းဒိုင်များမှ လာရောက်ဝယ်ယူကြသဖြင့် ဘုရားပန်းအိုးတစ်အိုးထိုးစာ ပန်းတစ်စည်းလျှင် ၁၀၀-၁၅၀ကျပ်ဖြင့် ရောင်းချကြောင်းသိရှိရပါသည်။ ဈေးများတွင် လက်ကား ရောင်းချရာ ပန်းတစ်စည်းလျှင် ၃၀၀ကျပ်ဖြင့် ရောင်းချသဖြင့် တစ်ဆင့်ခံရောင်းချသူများ အနေဖြင့်လည်း အမြတ်အစွန်းများရရှိသလို ပန်းစိုက်တောင်သူများအနေဖြင့်လည်း ကြယ်ဖြူပန်း ရာသီချိန်တွင် အကျိုးအမြတ်အနေဖြင့် ပျမ်းမျှ သိန်း(၂၀)ခန့်ရရှိကြောင်း သိရှိရပါသည်။
ထို့ကြောင့် ရွှေတောင်မြို့နယ်တွင် ပန်းများစိုက်ပျိုးသူတောင်သူများအနေဖြင့် တွက်ချေကိုက်ပြီး အပိုဝင်ငွေများရရှိကြောင်း လေ့လာသိရှိရပါသည်။
DOCA(ပဲခူး)