ပဲခူးတိုင်းဒေသကြီး၊ ပြည်ခရိုင်တွင် ၂၀၂၁-၂၀၂၂ ဘဏ္ဍာနှစ်တွင် နှမ်းစိုက်ဧကမှာ ၉၇၆၆၄ဧက ရှိပြီး အထွက်နှုန်းအားဖြင့် ၁၀ တင်းခန့်ထွက်ရှိသည့်အတွက် အထွက်တင်းစုစုပေါင်းမှာ ၉၇၀၀၀၀ခန့် ထွက်ရှိပါသည်။ ယခုအချိန်တွင် ဆောင်းနှမ်းအသစ်များကို လက်ပံတန်း၊ သာယာဝတီ၊ ကြံခင်းနှင့် မြန်အောင်ဘက်မှ နေ့စဉ် ၄၅ပိဿာဝင် နှမ်းအိတ် ၄၀၀/၅၀၀ခန့် ပြည်စျေးကွက်သို့ ဝင်ရောက်လျှက်ရှိပါသည်။ ဆောင်းနှမ်းများစျေးကွက်သို့ နေ့စဉ်ဝင်ရောက်မှု ရှိသော်လည်း မိုးနှမ်း အဟောင်းလောက် အရောင်းအဝယ်မဖြစ်ကြောင်းသိရှိရပါသည်။ မိုးနှမ်းမှာဆီကြိတ်လျှင် ဆီထွက် အားကောင်းခြင်း၊ အရည်အသွေး ကောင်းသဖြင့် နှမ်းလှောင်လက်သမားများနှင့် ဝယ်လက်များ အကြိုက်တွေ့သောနှမ်းဖြစ်ပါသည်။ ဝယ်လက်အကြိုက်တွေ့သဖြင့် မိုးနှမ်းစျေးမှာ ဆောင်းနှမ်းထက် စျေးမြင့်လာပါသည်။
ပြည်စျေးကွက်ရှိနှမ်းစျေးနှုန်းများမှာ ၂၀၂၂ခုနှစ် ဖေဖော်ဝါရီလ (ပထမအပတ်) အတွင်း မိုးနှမ်းနီ(၃)တင်းတစ်အိတ်လျှင် ၁၆၀၀၀၀ကျပ်၊ မိုးနှမ်း နက် (၃)တင်းတစ်အိတ်လျှင် ၂၀၀၀၀၀ကျပ်နှင့် မိုးစမုံနက်နှမ်း (၃)တင်းတစ်အိတ်လျှင် ၂၂၀၀၀၀ ကျပ်ဖြစ်ပါသည်။ ဆောင်းနှမ်းနီမှာ (၃)တင်းတစ်အိတ်လျှင် ၁၃၀၀၀၀ကျပ်၊ ဆောင်းနှမ်းနက် (၃)တင်းတစ်အိတ်လျှင် ၁၃၀၀၀၀ကျပ်နှင့် ဆောင်းစမုံနက်နှမ်း (၃)တင်းတစ်အိတ်လျှင် ၁၇၀၀၀၀ ကျပ်ဖြင့် ရောင်းဝယ်လျက်ရှိပါသည်။ နှမ်းနက်နှင့်စမုံနက်နှမ်းကို မန္တလေးဝယ်လက်များက အဝယ်ရှိပြီး၊ နှမ်းနီကို မြို့တွင်းဆီစက်များနှင့် နယ်ဘက်ရှိဆီစက်သမားများက အဝယ်ရှိသဖြင့် တစ်နေ့လျှင် အိတ်၄၀၀ခန့် အရောင်းအဝယ်ဖြစ်လျှက်ရှိပါသည်။
ထို့ကြောင့်နှမ်းစိုက်တောင်သူများအနေဖြင့် ရာသီ(၃)ရာသီတွင် မိုးနှမ်းစိုက်ပျိုးလျှင် အထွက် နှုန်းလည်းကောင်း၊ အရည်အသွေးလည်းကောင်း၍ ဆီထွက်အားကောင်းသဖြင့် ဝယ်လက် ကြိုက် သဖြင့် ပိုမိုတိုးချဲ့စိုက်ပျိုးလျှင် အကျိုးအမြတ်ဖြစ်ထွန်းမည်ဖြစ်ပြီး ဆီစက်သမားများအနေဖြင့်လည်း ဆီထွက်နှုန်းပိုမိုလာ၍ တွက်ခြေကိုက်မည်ဖြစ်ကြောင်း သိရှိရပါသည်။
DOCA(ပဲခူး)