![](http://www.doca.gov.mm/sites/default/files/styles/consumer_inner_image__847x424_/public/ဆီစက်_0.jpg?itok=OU2pod58)
စီးပွားရေးနှင့်ကူးသန်းရောင်းဝယ်ရေးဝန်ကြီးဌာနသည် နိုင်ငံခြားသုံးငွေလျော့ချရေး ပြည်သူများကျန်းမာရေးနှင့် ညီညွတ်သည့် ဆီကောင်းဆီသန့်များ ပိုမိုစားသုံးလာရေး ပြည်တွင်းဆီစက်လုပ်ငန်းများ ဖွံ့ဖြိုးပြီး ဆီထွက်သီးနှံကဏ္ဍဖွံ့ဖြိုးတိုးတက်ရေးအတွက် နိုင်ငံခြားမှ စားအုန်းဆီ တင်သွင်းမှုကို ဆီထွက်သီးနှံများ ထွက်ပေါ်ချိန်တွင် လျော့ချတင်သွင်းခဲ့ရာ ပြည်တွင်းဆီစက်လုပ်ငန်းများ၏ ကြိတ်ခွဲထုတ်လုပ်မှု၊ စားသုံးမှုအခြေအနေများအား ယခင်နှစ်နှင့် နှိုင်းယှဉ်နိုင်ရေးအတွက် ဈေးကွက်ဆန်းစစ်ခြင်းလုပ်ငန်းများကို ဆောင်ရွက်စေခဲ့ရာ မကွေးတိုင်းဒေသကြီးအတွင်း စက်မှုလုပ်ငန်း မှတ်ပုံတင်ထားသည့် ဆီကြိတ်ခွဲစက်များ၏ ထုတ်လုပ်မှု၊ ဖြန့်ဖြူးရောင်းချမှု အခြေအနေများအား သိရှိနိုင်ရန် မကွေးခရိုင်၊ စားသုံးသူရေးရာဦးစီးဌာနမှ ဒု-ခရိုင်ဦးစီးမှူး ဦးဆောင်သောအဖွဲ့သည် (၇.၂.၂၀၂၂) ရက်နေ့ နံနက်(၀၉:၃၀)အချိန်တွင် ရေနံချောင်းစက်မှုဇုန်ရှိ အသေးစား၊ အလတ်စား ဆီကြိတ်ခွဲစက်ရုံ(၂၆)ရုံသို့ ကွင်းဆင်း မေးမြန်းဆောင်ရွက်ခဲ့ပါသည်။
ကွင်းဆင်းမေးမြန်းချက်အရ ယခင်နှစ်များက တစ်ရက်ကို(၄)နာရီလောက်သာ လည်ပတ်ခဲ့သော်လည်း ယခုတစ်ရက်ကို ပျမ်းမျှ(၁၂)နာရီ လည်ပတ်နေကြောင်း၊ မီးပျက်သည့်အချိန်သာ စက်ရပ်နားပါကြောင်း၊ မီးလာပါက (၂၄)နာရီ အချိန်ပြည့် အလုပ်သမားများအား နေ့ဆိုင်း၊ ညဆိုင်းခွဲ၍ ကြိတ်ခွဲထုတ်လုပ်ပါကြောင်း၊ ယခုအချိန်တွင် စားအုန်းဆီဈေးနှုန်းမှာ (၅၀၀ဝိ/-) ကျော်ဖြစ်ပြီး ပဲဆီ၊ နှမ်းဆီမှာ တစ်ပိဿာ(၆၅၀ဝိ/)ဖြစ်၍ ဈေးသိပ်မကွာတော့သည့်အတွက် ကျန်းမာရေးအသိရှိသည့် လူလတ်တန်းစားများမှ ပဲဆီ၊ နှမ်းဆီကိုသာ စားသုံးမှုများလာကြောင်း၊ ဆီစက်များအနေဖြင့် စက်ကြိတ်ခွဲအားနှင့် စက်အင်အားများ တိုးချဲ့ဆောင်ရွက်လာရကြောင်း၊ အလုပ်သမားများလည်း အလုပ်မပြတ် ဆောင်ရွက်နေရသည့်အပြင် ဘေးထွက် ပဲဖတ်၊ နှမ်းဖတ် များမှာလည်း တိရိစ္ဆာန်အစာအတွက် လုံလောက်စွာရရှိ၍ ပြည်ပမှ တိရိစ္ဆာန်အစာတင်သွင်းမှု လျော့ချနိုင်ပြီး တာဝန်ရှိသူလူကြီးများ၏ စီစဉ်ပေးမှုကြောင့် ဒေသထွက် ပြည်တွင်း စားသုံးဆီ၏ ရောင်းအားမှာ ယခင်ကထက် နှစ်ဆကျော် တိုးမြင့်လာပါကြောင်း ရေနံချောင်း စက်မှုဇုန်ရှိ ဆီစက်လုပ်ငန်းရှင်တစ်ဦး၏ ပြောကြားချက်အရ သိရှိရပြီး ၎င်းစက်ရုံအနေဖြင့် တစ်လလျှင် ပဲဆီ၊ နှမ်းဆီ(၁၆၃) ပေပါထိ ထုတ်လုပ်ဖြန့်ဖြူးရောင်းချရကြောင်း၊ ရန်ကုန်၊ မန္တလေး၊ မိတ္ထီလာ၊ နေပြည်တော်၊ ပြင်ဦးလွင်မြို့များအထိပါ တင်ပို့နေရပါကြောင်း ပြောကြားချက်အရ သိရှိရပါသည်။
စားသုံးသူရေးရာဦးစီးဌာန
မကွေးတိုင်းဒေသကြီး